اسكريبت غصب عني ضعفت

رد عليها الاستاذ اللي بعت لها وقال لها :

_ما تتصوريش كلامك ده من امبارح وانا قاعد بقرا فيه كله احساس ان اللي كاتبه عايش مغمور جوه دوامه الدنيا والحياه اللي ما بتنتهيش فكرني بنفسي وبحالي وحسيت ان هو لايق على المرار اللي انا عايش فيه .

كانت بتقرا كلامه اللي قطع في نفسها وفي قلبها وحست ان هم الاتنين شبه بعض بالظبط وقالت له :

_هي الدنيا كده مش على كيف حد وما حدش بيعيشها زي ما هو عايز كله مقدر ومكتوب وأدينا ماشيين والعمر بيعدي هي الدنيا لحظه راحه وابتسامه ولحظات وجع وانين وعذاب .

ابتسم معتز جدا لأنها تجاوبت معاه في الكلام وده اللي هو كان عايزه فبعت لها وقال لها :

_قد كده حياتك إنتي كمان مش مريحاكي والدنيا جايه عليكي قوي انا بجد مش مصدق اني لقيت حد شبهي وبيتعذب في الدنيا دي شكلي .

وفضلوا الاتنين يبعتوا لبعض لحد ما الوقت اخذهم في الرسايل ساعه بحالها وده كله وزهره ما حسيتش بنفسها غير وابنها بينادي عليها ،

وخلصت المحادثه والاتنين ما يعرفوش اسم بعض بعد ما تكلموا مع بعض المده دي كلها ،

وعدى يومين وفي اليوم التالث بعث لها معتز تاني :

_معذره ان انا بعت لك تاني بس احنا اتكلمنا مع بعض وحسيت اني ارتحت في الكلام معاكي جدا ممكن نتكلم مع بعض كاصدقاء كل واحد فينا يشكي للتاني همه ونخفف عن بعض .

ابتسمت زهره على احساسه بيها وبتعبها في عز ما جوزها ما بيكلمهاش غير كل يومين يسألها عن الأولاد وخلاص فقالت في نفسها :

_وايه يعني لما اتكلم معاه كصديق احكي له على همي ومشاكلي وهو كمان يحكي لي والاقي حد يشيل هموم قلبي من على قلبي احسن من ما اشتكي لجارتي ولا لسلفتي وفي الاخر يعايروني ،

وبعتت له رساله :

_والله انت من القليلين اللي موجودين في الدنيا يا حضره من ساعه ما قفلت معاك المره اللي فاتت واتكلمنا مع بعض كاصدقاء مكالمه كلها محترمه وما فيهاش اي قله ذوق ولا اساءه للادب وانا حاسه ان انا مرتاحه نفسيا في عالم مش بلاقي حد فيه يسمعني الا صوت نفسي بس .

ابتسم معتز ابتسامه انتصار لانه متابعها من زمان ونفسه ان هو يتكلم معاها فقال لها :

_باين عليكي من صورك الحزينه اللي انت بتنزليها انك مش مرتاحه ولا مبسوطه في حياتك ،

وشوفي احنا بنتكلم مع بعض بقى لنا قد ايه بس ولا أعرف اسمك ولا إنتي تعرفي اسمي ممكن اتعرف عليكي علشان ما ينفعش نبقى اصدقاء نشتكي همومنا لبعض من غير ما نعرف اصلا اسامي بعض .