الخدعه
الواحد منهم لما مبيلاقيش لقمة عيش
من ورا التاكس بيسيبه ويشوف غيره
فهمت بقى انا ليه بقول ربنا يفك العقدة على إيدك
والتاكسي يرجع يشتغل زي الاول
ربنا ييسر يا حج …دعواتك
ربنا معاك ..اهو عاصم وصل هناك اهو
نزل خالد ابن صاحب التاكسي سلم عليا
ومد لي مفاتيح التاكسي
أخدته وتوكلت على الله
التاكس واضح انه اتشد من تاني بعد الحاډثه
العفش جديد وحالته مش بطالة
فضلت أكتر من ساعه بلف في الشوارع
ومفيش ولا زبون شاور لي
كنت مستغرب بصراحه ..يمكن صدفه
لفيت كمان ساعه وبرضو ولا زبون عبرني
رغم ان التاكسيات كلها شغالة ..اشمعنا التاكسي دا !!
حسيت ان
صاحب التاكسي هيدور على سواق خامس
بعد ما هرجع له واسلمه المفاتيح ..ويشوف غيري
لاني بجد أبتديت أتشائم ..بعد شوية
نزلت عند كولدير مايه على جنب عشان اشرب منه
واول ما رجعت لقيت بنت ركبت في الكرسي الامامي
معقول النحس أتفك وفي زبون ركب العربية !!
كانت بنت جميلة وبشعرها في أواخر العشرينيات من عمرها تقريبا
ركبت التاكسي وهي كانت شارده
على فين يا آنسه
…
يا آنسه
نعم !
على فين أن شاء الله
اي حته اي حته
يعني ايه
يا سيدي اطلع انت مش ليك أجرتك
طيب زي ما تحبي !
اتحركت بالتاكسي وفضلت الف بيها
كانت ساكته وحزينه ..شعرها بيتطاير على وشها
وكانت بترفعه بصوابعها من وقت للتاني
بعد نص ساعه من الصمت ..سألتها
حضرتك زعلانه من حاجه
بصت لي وقالت
انت اسمك ايه
انا !!
ايوه اومال حد غيرك معانا
لأ..انا اسمي عمرو
اه عمرو ..بتشتغل سواق من امتى
الحقيقة انا اشتغلت كذا شغلانه ..وكنت سائق تاكسي
من مدة ..وسبته والليلة دي اول مرة اشتغل فيها ع التاكسي دا ..ليه حضرتك
ممكن اعرف انت ليه مش حاطط حزام الامان
ليه هو احنا داخلين على لجنة
وهو لازم يعني ..مش المفروض حزام الامان دا
يكون عليك طول الوقت حماية ليك
ولكل الركاب الي معاك
اه فعلا ..عندك حق ..حاضر هلبسه أهو
انتي مين بقى وايه حكايتك
لازم تعرف يعني
لو مش هيدايقك يعني
طب مش تعرفني بيك الأول
ماشي ياستي انا عمرو عبدالله
ابويا ماټ من عشر سنين ومن يومها وانا بقيت المسئول عن بيتنا.. عندي اخت واحده الحمدلله ربنا قدرني وسترتها
واتجوزت من سنتين ودلوقتي عايش انا وامي لوحدنا
وليه متجوزتش لدلوقت
مفيش
مفيش ايه
مفيش فلوس ولا شقه.. معاش ابويا الله يرحمه يادوب مكفي علاج امي
وانا اهو بتنقل من شغلانه لشغلانه.. عشان الاحق ع الأكل والشرب وفواتير الغاز والميه والكهربا.. زي مانتي شايفه الدنيا ولعت
