وللنصيب رأي آخر ج3

للنصيب رأي أخر《جمود أنثى》
الحلقة ( ٣٩ )….
وائل بغلاسه: وماله جوزها بقى إن شاء الله!!! مش عجبك فى حاجه؟؟؟
محمد بضحك: ههههه…. وهو أنا أقدر اقول حاجه… محمد برخامه: إمتى بقى تتلموا أنتو الأتنين فى بيت واحد وأخلص من جنانكوا ده….
وائل ونهى بصوله بإستغراب، ومره واحده إنفجروا من الضحك….
محمد برخامه: طب الحمد لله إن دعوتى عجبتكوا أوى كده….
وائل بضحك: خلاص يا عم أنت هانت كلها ١٠ أيام وهدخل قفص الزوجيه عن طيب خاطر….
نهى بصتله بصدمه: قفص الزوجيه… ماشى يا وائل، أنا بقى هروح أجيب قفل عشان أقفل على القفص ده بالضبه والمفتاح…..
محمد إنفجر من الضحك: ياعينى على الحلو لما تبهدله الأيام….
وائل ونهى بصوله أوى، و فنفس واحد: محمااااد….
محمد وهو بيحاول يكتم ضحكته: سكت أهو….
نهى و وائل ضحكوا على منظره… ونهى قالت لوائل: وائل…. إيه رأيك لو نعمل عزومه يوم الجمعه الجايه فى المزرعه وأكلم ولاء وأحمد يبقوا معانا؟؟؟
محمد بإبتسامه: والله فكره حلوه… دى ناديه والعيال هينبسطوا أوى…
وائل قرب منها بحب وبإبتسامه: طبعا موافق يا قلبى أنا…. كلمى ولاء وعرفيها هى وناديه وفايزه، وأنا هكلم شادى وأقوله…
نهى بإبتسامه وبتلقائيه: و ماتنساش تكلم مروان وتقوله، عشان لو عرف إنك عملت العزومه دى من غير ما تعزمه هيزعل منك….
محمد و وائل بصوا لبعض بس كانت نظرته فيها ضيقه من سيرة مروان، دراها بسرعه عشان نهى متلاحظش عليه حاجه…. بصلها وبإبتسامه هاديه: حاضر يا قلبى هكلمه…. وائل بيغير الموضوع: المهم يا حبيبى…. هتروحى لناديه البيت؟؟؟؟
نهى إبتسمت بهدوء: آه يا حبيبى…. هروح لناديه البيت وبعديها هنروح النادى وفايزه هتقابلنا هناك….
وائل بحب: ماشى يا قلبى…. وإحنا هنخلص شغلنا ونقابلكوا هناك نتغدى مع بعض….
نهى بحب: تمام…. أسبكوا أنا بقى… سلام….
وائل و محمد بنفس واحد: سلام……
نهى مشيت و محمد بص لوائل بضيقه وغيظ: أنت بجد هتعزم مروان…. محمد بنرفزه: بصراحه أنا مش طايق أشوف وشه….
وائل قعد على مكتبه ومسح وشه بإيده وهو مخنوق: طب أعمل إيه!!! مقدرش أقول لنهى لأ… هى ماتعرفش موقفى منه، وبصراحه بقى…. وائل سكت واخد نفس جامد وخرجه جامد، وبتنهيده: أنا كمان متضايق أوى منه… وائل بحزن: الحب والقلب مش بإيدينا يا محمد… مش بإيدينا نأمر قلبنا نحب مين ومنحبش مين….
محمد بيحاول يخفف من حزنه شويه: حاول تتعامل معاه عادى… محمد بإنتباه: بص قوله وخلاص مش يمكن هو من نفسه ميجيش العزومه…. محمد بيكمل بجديه: عشان لو حصل أى حاجه وصدفت إن نهى قابلتهم يبقوا هم إللى إعتذروا، وتبقى فوشك حلوه…
وائل بصله بإبتسامه حزينه: ماشى يا محمد هكلمه وأقوله، يمكن تيجى من عنده…
محمد بيغلس على وائل عشان يخرجه من إللى هو فيه: ها ماقولتليش!!! هتفطرنى طعميه سخنه؟؟؟؟
وائل بصله أوى وانفجر من الضحك، ومحمد شاركه فضحكته…
نهى راحت لناديه البيت وفطروا مع بعض ونزلوا على النادى….
بعد ما وائل ومحمد فطروا وائل أتصل بمروان على مضض وعزمه على يوم الجمعه، ومروان مأكدش عليه إذا كان هيروح العزومه ولا لأ…
عدى الوقت و وائل ومحمد راحوا على النادى وقابلوا نهى وناديه وفايزه، نهى كانت قالتلهم على عزومه الجمعه وطبعا كلهم رحبوا و وافقوا عليها… شويه وفايزه قامت عشان تعرف تكلم شادى: الو…. أيوه يا شادى أنت فين كده؟؟؟؟
شادى بضيقه: أيوه يا فايزه… أنا لسه فى الشغل…. عندى مشكله كده وهتأخر شويه…
فايزه بخنقه: أيوه يعنى شويه قد إيه، محمد و وائل هنا والعيال عايزه تتغدى…
شادى بنرفزه: معرفش يا فايزه أنا يمكن كمان مش هعرف أجيلكوا….. شادى اخد نفس جامد وخرجه بالراحه: خلاص يا فايزه اتغدوا أنتو و لما تخلصى قعدتك خدى أوبر وروحى البيت…
فايزه بتنهيده وزعل: ماشى يا شادى… سلام….
شادى: سلام…
فايزه رجعتلهم وهى مكشره، فنهى بتسألها بإهتمام: مالك يا فايزه!!! زعلانه ليه؟؟؟؟
فايزه بضيقه: شادى عنده مشكله فى الشغل ومش هيعرف يجيى…
ناديه بتهون عليها: ما تزعليش يا فايزه ممكن فعلا مقدرش يجيى ما تعرفيش ظروف شغله إيه…
فايزه بصتلها بهدوء: عندك حق يا ناديه، فعلا معرفش ظروفه إيه…
محمد بيغير الموضوع: طب إيه نطلب الأكل…. أنا جعان أوى….
كلهم ضحكوا على كلامه وطلبوا الغدا…
بعد ما خلصوا الغدا وشربوا وانبسطوا… وائل أصر أنه يروح فايزه والأولاد عشان ميروحوش لوحدهم…. ويدوب فايزه نزلت من عربية وائل لقوا شادى بيركن عربيته…
شادى بزعل: ليه كده يا وائل تعبت نفسك فتوصيل فايزه… أنا قولتلها تاخد أوبر…
وائل بضيقه: أنت عبيط يلا… أسيب مرات أخويا وعيالهم يروحوا فى أوبر ليه يعنى… ورحمه أبوك يا شيخ بلاش الكلام إللى لا هيودى ولا هيجيب ده…
شادى بحب: تسلم يا حبيبى…. نردهالك فى الأفراح….
وائل بضحك: ماشى يا خويا ردها يوم الخميس إللى بعد الجاى….
شادى بعدم فهم: إشمعنى يعنى الخميس إللى بعد الجاى؟؟؟
فايزه بفرحه: عشان وائل حدد يوم فرحه الخميس إللى بعد الجاى….
شادى بسعاده: بجد يا وائل… خلاص هتدخل عش الزوجيه برجليك…
وائل بضحك: آه يا خويا…. عقبال عندكوا…
شادى أخده بالحضن وباركله هو ونهى…
نهى بإبتسامه: الله يبارك فيك يا شادى…
نهى بتكمل كلامها: هنستناكوا يوم الجمعه الجايه ان شاء الله فى المزرعه… ماشى….
شادى بصلهم بإستغراب: الجمعه الجايه؟؟؟؟
وائل بإبتسامه: آه يا وحش… هنعمل قعده كده خفيف خفيف قبل فرحنا…
شادى بهزار: الله…. الخفيف ده هيبقى خروف محشى صح؟؟؟؟
كلهم بصوله بذهول وضحكوا أوى على كلامه، و وائل بضحك: آه يا وحش خروف محشى… بس اتجدعن انت وادبحه…
شادى بسرعه: لأ طبعا… شادى بهزار: انت تعرف عنى إنى جدع أوى كده…. خالص… ابسيلوتلى….. أنا يدوب أخرى اصطاد سمك بيغرق…
كلهم ضحكوا… وقبل ما وائل يمشى شادى قاله قدام نهى بتلقائيه: وائل!!! ما تنساش تعزم مروان عشان مايزعلش، هو معرفش بخروجه إمبارح عشان جت على غفله….
وائل بضيقه متداريه: آه يا شادى عزمته بس مش عارف ظروفه إيه… هيعرف يجيى ولا لأ…
شادى بجديه: المهم إنك قولتله وهو يشوف ظروفه…..
وائل إبتسم بتهكم: ماشى يا شادى… المهم ما تتأخرش يوم الجمعه… فاهم؟؟؟
شادى بحماس: هتلاقينى بايت على باب بيتك….
كلهم ضحكوا وسلموا على بعض و وائل مشى يوصل نهى وندى البيت……
نهى بعد ما روحت إتصلت بولاء وقالتها على معاد فرحها وعلى عزومة يوم الجمعه….
ولاء بفرحه: لولولولووووى…. مبروووووك ألف مليون مبروك يا نهى….. يا أخيرا يا قلبى هشوفك فى عش الزوجيه… ولاء بسعاده أكتر: ومع مين؟؟؟؟ مع واحد عرف قيمتك وحبك وقدرك…. ولاء من قلبها: ربنا يتمملكوا بألف خير يا نهى….
نهى بفرحه: الله يبارك فيكى يا قلبى…. نهى بحب و بود: أنا مش عارفه من غيرك كنت هعمل ايه…
ولاء عنيها دمعت من فرحتها بصاحبتها، وبتحاول تقلب الوضع بهزار عشان نهى ما تحسش بيها وهى دموعها بتنزل من فرحتها: طبعا ولا حاجه…. ماكنتيش هتعرفى تعملى حاجه من غيرى، أمال مين إللى شجعك على إللى حصل…. ولاء بغلاسه بس بحب: إتفضلى يا ستى.. عدى الجمايل…..
نهى و ولاء ضحكوا جامد، شويه وهديوا، ونهى بتسألها بإهتمام: طبعا هتيجي يوم الجمعه صح؟؟؟؟ نهى بجديه أكتر: مش هقبل رفضك سامعه… أنا بقولك أهو…
ولاء بتنهيده: يا بنتى إذا كان عليا أنا… فأنا موافقه، بس الدور والباقى على أحمد…
نهى بزعل وحزن: لأ يا ولاء أوعى… والله هزعل منك بجد أنتى وأحمد… لو عايزه وائل يكلمه ويعزمه بنفسه هخليه يكلمه…
ولاء بحب: يا حبيبتى انتى و وائل واحد، بس الفكره ان احمد ممكن يرفض عشان عايز يرتاح… ولاء بتطمنها: ما تقلقيش يا قلبى أنا هقوله إنهارده ومش هسيبه غير لما يوافق….
نهى بإبتسامه: أيوه بقى هو ده الكلام ولا بلاش… نهى برخامه: أقولك تقنعيه إزاى ولا بلاش؟؟؟
ولاء بضحك: آه يا سوسه طول عمرك فهمانى صح….
نهى بتضحك جامد: عيب عليكى… تلميذتك أباشا….
نهى و ولاء فضلوا يضحكوا ويهزروا مع بعض وبعدين قفلوا…..
تانى يوم فى الشركه…..
وائل قاعد هو و محمد وبيظبتوا أمور الشغل قبل ما وائل يطلع أجازته، و بعد ما محمد خلص مع وائل سابه وراح مكتبه….
فات ساعتين ثلاثه، وحنان إتصلت بوائل: باشمهندس وائل…. فى واحده عايزه تقابل حضرتك بس رافضه تقول إسمها، ومصممه إنها تدخلك….
وائل بإستغراب: يعنى إيه رافضه تقول إسمها؟؟؟ دى جايه من شركة إيه ولا تبع مين؟؟؟
حنان بضيقه: مش عايزه تقول حاجه خالص… حاولت أعرف منها أى حاجه هى رافضه نهائى….
وائل بنرفزه: إيه الكلام ده… يعنى إيه رافضه…… وائل سكت شويه و اخد نفس جامد وخرجه بالراحه: حنان… إبعتيها لمحمد وخليه يشوف مين دي وعايزه إيه…
حنان بتنهيده: حاضر يا باشمهندس….
وائل قفل مع حنان وحس بصداع نتيجه نرفزته وعصبيته، شويه وسمع صوت عالى بره فى مكتب حنان… إتعصب أكتر لما سمع البنت بتزعق لحنان وصوتها عالى… قام من على مكتبه وبعصبيه فتح الباب و بيشوف إيه إللى بيحصل بره ولسه هيزعق… إتفاجأ بوجود سلمى…..
وائل إتصدم أول ما شافها، وحنان وسلمى سكتوا أول ما شافوا وائل….
وائل بصدمه: سلمى!!!! إنتى بتعملى إيه هنا؟؟؟؟
سلمى بتوتر: أنا آسفه يا وائل… بس السكرتيره مش عايزه تدخلنى ليك….
وائل بلع ريقه بتوتر: طب خلاص إتفضلى إدخلى….