نبضات لا تعرف المستحيل ج1
بقلم أميره أحمد
الفصل الأول:
في إحدى المقاهي الهادئة، جلست حنين في إحدى الأركان الجانبية مبتعدة عن الزحام، بعينين حزينتين، يملؤها الصراع من داخلها، يداها ترتجف و تحاول ان تسيطر عليها، دخل شادي، عيناه مليئة بالغضب الممزوج بالحزن، سحب كرسي و جلس أمامها، يحاول أن يسيطر علي انفعاله، صمت قليلا، نظر إلي عينيها بإنكار وهتف: بجد؟ وافقتي؟
هربت بعينيها عنه، و حركت رأسها بإيجاب دون ان تنبث بكلمة.
ضحك بسخرية و قال و هو يقترب منها: وانا؟….. نسيتي أنك بتحبيني؟
رمشت بعينيها بتوتر تحاول ان تمنع دمعة كادت تفر منها، اطرقت برأسها بخزي و قالت بصوت بالكاد مسموع: غصب عني يا شادي…. الضغط عليا كان كبير، هو اتقدملي و أهلي وافقوا… مكنش ليا قرار.
تغيرت نبرة صوته وأصحبت أضعف وقال: حنين انا بحاول…. كل اللي محتاجة شوية وقت.
رفعت عينيها لتتلاقي مع عينيه أخيرا، تجمدت الدموع داخل مقتليها وقالت بصوت بالكاد مسموع: افهمني يا شادي…. انا ملياش قرار.
ارتفع صوته فجأة وقال: يعني خلاص؟ كل اللي بينا ضاع؟
نظرت له بعينين بلا حياة وقالت: شادي انا مستعدة أقف قصاد أهلي، بس تعالي اخطبني.
صرخ شادي بعصبية: حنين…. أعتقد اتكلمنا كتير في الموضوع ده، أروح أقول لباباكي ايه؟ جوزني بنتك بس انا مش معايا فلوس، ومش هاقدر أصرف عليها لأني بأصرف علي أهلي؟
دمعت عيناها و قالت بصوت مهزوز: انا بحبك، ولو جيت انا هاقول لبابا اني موافقة و مش عايزة عمر.
صمتوا لدقائق مضت وكأنها الدهر، بعينين حمراء من الغضب وقف شادي و هتف: كنت فاكرك ليا، كنت فاكر هتستني، بس انتي اللي اختارتي تبعدي يا حنين.
وضع حساب قهوتها علي الطاولة وأدار ظهره لها وانصرف.
شاهدته حنين يمضي مبتعدا و شعرت كأن جزء من روحها يخرج خلفه، وضعت وجهها بين كفيها وانفجرت في البكاء.
قامت حنين من مكانها، خطواتها بطيئة و كأن قدماها لا تقوي علي حملها، كان كل خطوة تبعدها عن شادي تبعدها عن حلمها، عن حبها، عن قلبها المعلق بشادي.
عادت إلي المنزل، دخلت إلي غرفتها، اضاء هاتفها بتنبيه رسالة جديدة، أمسكت الهاتف، رسالة جديدة من شادي ” كنت فاكرك هتفضلي… كنت فاكرك هتستحملي”
ألقت بالهاتف علي السرير بارتباك، وقفت أمام المرآة تنظر إلي عينيها الخاوية من الحياة وهمست لنفسها: لازم تجمدي يا حنين…. انتي أخترتي الصح…. قرار العقل أهم من القلب.
