الجديده

_ أنتِ مش عايزة تنزلي تعملي الأكل عند أمي لي؟!

_ عشان دي مش عيشة، إن كل يوم فطار غدى عشى، تحت، أنا مش خدامة، أنا ليا بيت و حياة

بص ليا كأن بقول حاجة غريبة

_ يعني أي ليكِ خصوصيات! ما إحنا متعودين على كدا، بناكل كلنا مع بعض

_ لا أنا مش متعودة على كدا، أنا نزلت أول يومين و خلاص، لكن أنا هطبخ الأكل في بيتي و هناكل في بيتنا

_ أنتِ عايزة تقطعي بأهلي! وبعدين ما مراتات أخواتي بينزلوا عادي، عايزة أنتِ إللي تتنمردي؟!

_ كل واحد و عاداته و تقاليده، أنا مش بتعامل كدا، أنا أحب يكون في خصوصية في بيتي، و أقعد في بيتي براحتي، ألبس إللي عايزاه، و أعمل إللي عايزاه

_ طب ما تعملي كل دا لما تبقي تطلعي هنا، أمي مش عاجبها إللي حصل دا، كدا هتعملي تفرقة

_ بقولك أي دا بيتي و أنا قاعدة في بيتي، عايز تنزل تاكل تحت براحتك، عايز تأكل هنا من أكلي اهلًا و سهلًا، هبقى أنزل آخر النهار شوية يومين في الأسبوع ولا حاجة، لكن كل يوم من صباحية ربنا لمساها، لي ما ليش بيت، مليش حياة

_ أنتِ كنتِ عارفة إن دي عادتنا ودي عيشتنا

_ آه أنت حكيت عنها، لكن قولتلها إحنا مش عندنا كدا، أنا بحب أقعد في بيتي مع حاجتي، بخصوصياتي، ومش بحب الدوشة ولا الحاجات إللي بتعملوها

_ أنا قولت أكيد هتتعودي

كنت لسه هتكلم، بس لقيت الباب بيخبط، ولما راح فتح كانت مامته إللي دخلت مكشرة و سألتني بحده

_ في أي منزلتيش ولاوية وشك علينا لي خير عيانة!!

لقيت جوزي أتدخل

_ آه يا ماما هي بس

قاطعته وأنا بقول بتحدي، لما لقيته هيبرر عدم نزولي بإني تعبانة

_ لا يا طنط أنا الحمد لله كويسة، هبقى أنزل لما أعمل الأكل و اتغدى، ممكن لو فضيت أبقى أنزل اشرب معاكوا الشاي

_ نعم!! تشربي الشاي، ومين إللي هيطبخ تحت بقا إن شاء الله

_ معرفش، شوفوا مين كان بيطبخ، و يكمل طبخ، أنا ليا بيت وزوج بس مسؤولة عنه و بطبخ ليه، عايزاني أنزل يوم في الأسبوع من الصبح نتغدى مع بعض مفيش مشكلة

بصت ليا بذهول و بصت لجوزي تسأله

_ أنت شايف مراتك بتقول أي! مش عارف تسيطر على بيتك و تمشيها تحت طوعك؟

بص ليا وزعق عشان يرضيها على حسابي

_ اسمعي الكلام بلاش اوريكي الوش التاني