أمينة وسر السيارة السوداء

سمير زهق مني وراح على الفزة وكان هيخبطني بيها
وانا اول ما شفته
_خلاص خلاص هسكت … اتفضل اتكلم
_اسمعي … محدش هيعرف اللي بينا نهائي .. كل اللي المطلوب يعرفوه … اننا متجوزين بعض عن حب وبنموت في بعض كمان .. يعني هنمثل قدامهم كدا … هتعرفي ولا هتفضحيني يا مصيبة انتي .

_هعرف هعرف ان شاء الله

_والله انا شاكك فيكي

_لا لا ..متقلقش

_لا أنا غيرت رأي

_استنى بس والله ثق فيا… تعرف اني كان نفسي أكون ممثلة بس محصلش نصيب

_يا شيخة … طب مدلما اشوف ولو غلطتي ولسانك ذل يا ويلك مني يا أمينة

_ايه يا سمير انت هتقلب ليه … انت جايبني هنا تحميني ولا تهددني انت كمان
_اسمعي ماهو غباء انا مش عاوز

_حاضر … لس قولي بالله عليك أنا هنام فين علشان أنا خلاص جبت أخرى وعايزة أنام .

سمير بص على الأوضة وشاوري

تعالي ورايا

دخلت اوضة كلها هدوم وقال
_انتي هتنامي هنا

_فين وسط الهدوم .. هتعلق في شماعة ولا هناك على رف … وبعدين تعال. هنا.. كل دي اوضة للهدوم بس .. دي أكبر من العشة اللي كنت قاعدة فيها… حظوظ فعلا.. يا ريتني كنت قطعة ملابس او حتى دولاب بضلفتين كان زماني عايشة في عز دلوقتي.

زهقني بعيد وقالي

_اوعي ده انتي صداع…افصلي شوية

_خلص يا سمير عايزة اتنيل أنام انجز .. أفرش وانام على الأرض ولا إيه

ضغط على مفتاح جنب الدولاب لقيت حاجة بتنزل وظهر مرتبة ومخدات معاها كمان

فضحكت وسقفت وقلت
_يا حلاوة ده السرير اللي كنت بشوفه في الأفلام زمان … والله وللدنيا حظها بيلعب معاكي يا أمينة هتنامي على سرير متخفي عامل نفسه دولاب .

_ها كدا كويس … هتنامي هنا

_طيب السرير ده زانا نايمة مش هيترفع يموتني مفعوصة!

_ياريت واخلص

_اية

_أمينة لما تحبي ترفعيه أضغطي على الزرار ده هيترفع لوحده

_طايب يلا اتطرق خليني أنام

بصلي بغيظ وخرج وانا مسافة ما حطيت دماغي على السرير نمت
___
نمت كتير وقمت وانا مبسوطة أوي قد ايه السرير حنين وناعم اوي
_والله والدنيا ابتسمتلك يا بت يا أمينة وبقيتي تنامي على حرير بدل الخيش اللي كسر ضهرك.

بعدها ضربت دماغي
_فوقي يا بت يا أمينة دي فترة مؤقتة لحد ما يزول الخطر وترجعي تاني عشتك … اه يا عشتي يا حبيبتي وحشتيني

___
على الأكل
الكل اتجمع على السفرة
بدأت أكل نعمة أم سمير بنفسي وأهتم بيها
لقيت سمير بيقولي وهو بيأكلني
_وأنا مليش نصيب من أدوق الشهد من إيديكي.