نقطه تحول ج2

ماجد : غاااده .. غاااده سمعانى
( يلاقيها بتبص حوليها باستغراب )
ماجد : غااااده فوقى
غاده : مممم
ماجد : غااااده اصحى وركزى
غاده بتعب : انا فين
ماجد : فوقى بقي
( تبتدى تحرك راسها وصوت ماجد عمال يفوقها .. تفتكر اللى حصل وتتفزع من مكانها ومتعرفش تتحرك .. تعيط )
غاده بعياط : ماجد احنا فين ! مين دول ؟؟
ماجد : اهدى متعيطيش انا جنبك
( يبص حوليه ويحاول يشوف طريقه يفك نفسه بيها .. شويه والباب يتفتح ويدخل راجل وحوليه اتنين )
اهلا بالغالى
( يبص ماجد للوش باستغراب شديد )
ماجد : انت !!
مش قولتلك سليم الانصارى ميخسرش ابدا
ماجد : انت عامل كل دا ليه ؟؟ انا مش فاهم حاجه ! وبعدين الوسخ دا مش كان محبوس !!
عمر بابتسامه بارده : خرجت بكفاله وجه وقت مقابلتنا التانيه
ماجد : خير يعنى !
سليم : حلو هدوءك دا .. توقعت غير كده
ماجد ببرود : ليه انت شايف انك شخص اتعصب منه اصلا !
سليم : يستحسن متغلطتش انت تحت رحمتى دلوقتى
ماجد يضحك بتريقه : بتعجبنى ثقتك اللى بتتكلم بيها حقيقى
عمر : سليم باشا انا من رأيي نخرسه بطريقتنا
( يسكته سليم بحركه من ايده )
سليم بابتسامه : سيبه يتكلم .. هو ميملكش غير الكلام دلوقتى
ماجد بجديه : عاوز ايه يا سليم ! مكتفنى وجايبنى هنا وتاعب نفسك ورجاله ومكان قديم كده وكل دا ليه ؟!!! وارتكبت جر..يمه ونسيت انك مش حمل عقباتها .. ف كل دا ليه ؟؟
سليم : صفقه نيويورك
ماجد : مالها !
سليم : تتنازل عنها وتثبت ان النجاح دا لشركتى وانك سارق منى التصاميم
( يضحك ماجد بصوته كله .. وكلهم يبصوله باستغراب )
ماجد : يعنى مش بس حرامى لا وبجح كمان
سليم : كنت عارف انك هتلاوع معايا .. ( يبص لغاده ويبتسم ) .. اومال انا جبتها معاك ليه
( يبص ماجد ع غاده ونسي وجودها تماما .. وهنا اكتشف ضعف موقفه لانه مش هيستحمل ان حاجه وحشه تمسها )
ماجد بصوت عالى : مراتى ملهاش علاقه بالشغل بينا .. خليك معايا انا .. راجل لراجل ومتتعاملش مع الحريم .. بين ع الاقل قدام نفسك انك راجل
عمر : متخلهوش يستفزك بالكلام دا يا باشا .. هى اللعبه اللى تقدر تحركه بيها
( يقرب سليم ع ماجد ويحط ايده ع الكرسي )
سليم بابتسامه : ومين قالك انى هتعامل معاها .. تقريبا ف طار قديم بينها وبين عمر .. وعمر بقي من اكفئ رجالتى .. يعنى يرضيك انه يمشي شغله ع اكمل وجه وانا مكافئهوش .. عيب ف حقي والله
ماجد بعصبيه وصوت عالى : اقسم بدينى اللى هيقربلها لنهايته هتبقى ع ايدى
سليم : ايه دا انت اتعصبت .. تؤ تؤ .. ميصحش تتعصب من واحد زيي يا بشمهندس
( يبتسم باستفزاز وماجد اتعصب جامد وحس انه فعلا متكتف مش قادر يعمل حاجه .. يبعد سليم وهيخرج )
سليم : هديك فرصه لحد بكره تقلبها ف دماغك كويس .. ( يبص لعمر ) .. وانت خليك معاهم .. ( يبص لماجد ويضحك ) .. تسالى خفيفه يا عمر .. خلى التقيل كله لبكره
عمر بضحك : متقلقش مش هنتعبها اوى
( يخرج سليم ويقفل الباب وعمر يبصلهم ويقرب ع غاده )
ماجد بعصبيه : وحيات امى لو لمستها ما هسيبك
( يتجاهل عمر ويقعد قدام غاده ويمسح دموعها وهى تبعد وشها عنه .. يمسك وشها ويعدله بعنف وتبصله )
عمر : اتعدلى معايا ماشي
ماجد بزعيق : ابعد ايدك عنها يا وسخ
( عمر يسيبها ويروح لماجد ويوطى عليه )
عمر بابتسامه : متقلقش مش هعملها حاجه دلوقتى .. لانى مش ف المود الحقيقه .. هأجلها لبكره عشان اتبسط انا وصحابي .. انت عارف اللى ياكل لوحده يزور
( يبصله ماجد بعصبيه .. كان عمر مقرب منه اوى .. يديله ماجد بدماغه ف مناخيره .. تنزف )
عمر بنرفزه : وحيات امى ما هرحمك يا ماجد .. الصبر بس وانت اللى هتترجانى
( يحط ايده ع مناخيره ويخرج بره ويقفل عليهم )
ماجد : احنا لازم نخرج من هنا انهارده
غاده بعياط : انا خايفه اوى
ماجد : ممكن تهدى وتبطلى عياط .. اوعدك مفيش حاجه هتحصلك او حد هيقربلك اصلا .. ثقى فيا اوك ؟
غاده باطمئنان : اوك
( يبص ماجد ف الاوضه يلاقى شباك مقفول )
ماجد : بصي ف شباك اهو معرفش بيودى ع فين بس اكيد المحاوله مش هتخسرنا حاجه .. دورى معايا ع حاجه افك نفسي بيها
غاده : انت عاوزنا ننط من الشباك !
ماجد : مفيش حل تانى
غاده : افرض الدور عالى
ماجد : معتقدش دا شكله مخزن .. المهم دلوقتى لازم ننجز ونفك نفسنا
غاده : ماجد انا مش هينفع انط .. انا حامل
( يبصلها ماجد بصدمه ويبرق )
ماجد بزهول : نعم !!!!!
غاده : لسه عارفه امبارح وكنت هقولك وانت مدتنيش فرصه اتكلم
( ماجد يغمض عينه بوجع مش عارف يفرح انها حامل ولا يخاف ع اللى جاى .. كل اللى يعرفه انه لازم يمشيها من المكان دا )
غاده بدموع : انا خايفه يتأذى
ماجد : اهدى خلينى افكر
( تسكت غاده وماجد عمال يفكر .. يسمعهم بره )
سليم : انا همشي دلوقتى وانتو احرصوا المصنع بره مش هنا يا اغبيه
عمر : بس كده ممكن يهربوا
سليم : مفيش فرصه للهرب عندهم .. ومتربطين كويس جدا .. اخرجوا بره احرصوا المصنع عشان محدش يجى ويدخل وقتها هننتهى بجد
عمر : طيب
( يلاقى النور اللى بره اطفي ويعرف انهم كلهم خرجوا .. يقعد يفكر ويبص حوليه وفعلا مفيش اى حاجه تفكهم .. يبص يلاقي غاده بتعيط بصمت .. يتعصب اكتر هو المفروض يحميها هى وابنه ازاى قاعد عاجز كده .. يطلع راسه لقدام ويقف ع رجله موطى والكرسي ع ضهره .. ينط بالكرسي وحاسس بوجع بس لازم يتحمل وينجز عشانهم .. يقف ف نص الاوضه وينط مره واحده ع ضهره يقع ع الارض والكرسي يتكسر والحبل يتفك من عليه )
غاده بصوت عالى وقلق : ماجد ضهرك
ماجد بهمس ونرفزه : اسكتى
( يقف جنب الباب ويتابع عشان لو حد سمع كسره الكرسي .. يعدى شويه ومحدش يجى يطمن ويقرب عليها يفكها بحذر واول ما يفكها تحضنه .. يضمها ويهديها )
ماجد : بس خلاص كفايه عياط .. تعالى بسرعه وامشي براحه
( تمشي وراه بالراحه .. يقرب ع الشباك يلاقيه مقفول بقفل )
غاده : هنعمل ايه دلوقتى
( يبصلها ومش عارف يتصرف .. كانت رافعه شعرها كحكه .. يشد بنسه من شعرها وشعرها يفك شويه )
غاده : ايه دا !!
ماجد : اسكتى خلينى اركز
( يحاول يعمل ف القفل بالبنسه .. شويه ويتفتح .. يديها البنسه ويشل القفل يفتح الشباك يلاقيه بيطل ع جنينه مفتوحه .. يبص من بره ميلاقيش نور او حد ف المكان )
ماجد : بصي دا دور ارضي .. هشيلك وتنزلى براحه بس اوعى تنطى وانا هاجى وراكى .. لو حد دخل تمشي انتى .. فاهمه
غاده : همشي واسيبك !
ماجد : ايوه
غاده : لا طبعا
ماجد : مش وقته اخلصي
( يشيلها ويساعدها تنزل .. وهى تحاول متنطش وفعلا تنزل .. ينط وراها ماجد ويقفل الشباك من بره )
ماجد : يلا بسرعه
( كان المكان كله زرع طويل .. يجرى وهى بتمشي وراه بالعافيه وهو ماسك ايدها بيشدها .. الرجاله كانوا قاعدين بره بيتفرجوا ع التلفزيون وعمر كان بيجيبلهم سجاير .. يرجع عمر )
عمر : محدش فيكو دخل يشوفهم !
محمد : ياعم هتلاقيهم متنيلين مكانهم .. هيعملوا ايه يعنى !
عمر : انا هدخل اشوفهم
( يدخل ويلاقيهم مش موجودين ويلاقى الشباك متوارب .. ينادى ع الرجاله ويفتح الشباك بسرعه يلمحهم بيجروا بس بعيد شويه .. واحد من الرجاله يضرب عليهم نار )
عمر بزعيق : بس يا غبي متموتهمش .. هاتو الشوم بسرعه
( ينط والرجاله ينطوا وراه ويجروا عليهم .. ماجد ياخد باله منهم ويشدها اكتر ويجرى )
ماجد : اجرى بسرعه يا غاده .. اسرع
غاده بتعب : مش قادره بموت
ماجد : انجزى بسرعه
غاده بتعب : ماجد مش قادره .. بطنى بتتقطع
ماجد : حاولى مفيش وقت .. دول ورانا
( تجرى معاه وهى تعبانه اوى .. ماجد مخه واقف وعقله مع اللى بيجروا وراهم مش مع غاده خالص .. مره واحده تقف )
ماجد : غاده مش وقته انجزى
غاده بوجع : مش قادره بطنى .. ااااه
( كانت لابسه فستان ..ماجد يبصلها ويلاحظ دم ع رجلها……