فريده

فريده كانت بنت شاطره جدا في كليتها بس كانت عنيده ودمها حامي مبتسكتش على حقها ابدا وكانت في اخر سنه ليها في الكليه وكل تفكيرها في مشروع التخرج اللي هيحدد مستقبلها كله وكانت بتحلم من اول يوم دخلت فيه الكليه انها تعمل مشروع يبهر الكل ويخلي الدكاتره يفتخروا بيها وكانت صاحبتها المقربه ياسمين دايما معاها في كل حاجه ياسمين كانت عكسها تماما هاديه ورقيقه وبتسمع اكتر ما بتتكلم وغاده كانت صاحبتهم التالته اللي دايما بتضحك وتهزر حتى في عز التوتر والقلق وكانت بتقول ان الضحك هو اللي بيخلي الواحد يكمل

السنه الاخيره بدأت وفريده كانت متحمسه جدا لمشروع التخرج وقدمت فكره عبقريه للدكتور ياسين دكتور الماده اللي كان معروف عنه انه بارد جدا ومبيضحكش خالص وملامحه دايما جامده وكأنه قالب تلج ماشي على رجلين والطلبه كلهم كانوا بيخافوا منه وبيعملوا له الف حساب بس في نفس الوقت كان اشطر دكتور في القسم وكل كلمه بيقولها كانت دهب

فريده دخلت مكتبه وهي ماسكه ملف مشروعها وقلبها بيدق بسرعه وقالت له يا دكتور انا عندي فكره مشروع حلوه جدا وعايزه اعرضها على حضرتك بص لها ببرود كده من فوق النضاره وقال لها اتفضلي اقعدي واحكي قعدت فريده وبدأت تشرح الفكره بحماس شديد وهو بيسمعها وهو ساكت تماما ومبيبينش اي رد فعل وبعد ما خلصت سكت شويه وبعدين قال لها الفكره كويسه بس محتاجه شغل كتير ومحتاجه تيم قوي فريده فرحت انه وافق على الفكره وقالت له انا هشتغل عليها لوحدي لو ينفع قال لها لا مينفعش مشروع التخرج لازم يكون جروب من اتنين على الاقل

فريده خرجت من المكتب وهي طايره من الفرحه وراحت لياسمين وغاده وقالت لهم الدكتور وافق على فكرتي ياسمين حضنتها وقالت لها الف مبروك يا حبيبتي انتي تستاهلي كل خير وغاده قالت لها طب هتختاري مين يكون معاكي في التيم فريده قالت لها اكيد انتي يا ياسمين ياسمين قالت لها للاسف انا خلاص اتفقت مع جروب تاني من بدري وغاده قالت لها وانا كمان مع جروب تاني فريده اتضايقت شويه بس قالت مش مشكله هشوف حد تاني

تاني يوم في المحاضره الدكتور ياسين وقف وقال هنقسم مجاميع مشروع التخرج دلوقتي وبدأ ينادي الاسامي وفريده كانت مستنيه تسمع اسمها مع حد تكون بتحبه او على الاقل بترتاح له وفجأه سمعت الدكتور بيقول فريده واسر مع بعض في جروب واحد فريده اتصدمت ووشها قلب الوان اسر ده كان اكتر ولد بتكرهه في الدفعه كلها كان مغرور وشايف نفسه وكل ما يشوفها لازم يستفزها بكلمه وكانت بينهم خناقات كتير طول الاربع سنين