فريده

فريده قامت وقفت وقالت يا دكتور لو سمحت ممكن اغير الجروب انا مش عايزه اشتغل مع اسر الدكتور بص لها ببرود وقال لها مفيش تغيير في المجاميع اللي انا قسمتها هو ده قرار نهائي فريده كانت هتعيط من الغيظ وقعدت مكانها وهي بتبص لاسر اللي كان قاعد يضحك ضحكه مستفزه وكأنه بيقول لها انا كسبت

بعد المحاضره راحت فريده للدكتور مكتبه تاني وقالت له يا دكتور ارجوك انا واسر مش بنتفق خالص ومش هنعرف نشتغل مع بعض مشروع التخرج ده مستقبلي وارجوك غيره قال لها وهو بيبص في الورق اللي قدامه انا شايف انكم لايقين على بعض في الشغل وانتي محتاجه حد زي اسر شاطر وبيعرف يفكر كويس وانتي شاطره فهتكملوا بعض فريده خرجت وهي مش فاهمه هو ليه مصر اوي كده انها تشتغل مع اسر

اسر جه وقال لها بصي يا فريده انا عارف انك مش طايقاني وانا كمان مش طايقك بس ده مشروع تخرج ولازم نخلصه فخلينا نشتغل وخلاص من غير مشاكل فريده قالت له وانا موافقه بس بشروطي انا اللي هكون الليدر بتاع التيم وكل حاجه هتمشي بكلامي اسر ضحك وقال لها لا يا حبيبتي احنا الاتنين ليدر وكل حاجه بالنص

بدأوا الشغل في مشروع التخرج وكان كل يوم خناقه جديده فريده عايزه تعمل حاجه واسر عايز يعمل حاجه تانيه وكانوا بيقعدوا في المكتبه بالساعات يتخانقوا وبلال صاحب اسر كان دايما بيحاول يهدي الجو بلال كان ولد طيب وجدع جدا وكان بيحب غاده من بعيد ومش عارف يقول لها وغاده كانت بتحب بلال برضه بس كانت بتتكسف وياسمين كانت بتحاول تصلح بين فريده واسر كل شويه

في مره كانوا قاعدين في المعمل بيشتغلوا وفريده كانت مركزه جدا في اللاب توب بتاعها واسر كان بيبص عليها وهي مش واخده بالها وفجأه قال لها على فكره انتي لما بتركزي بتبقي شكلك حلو فريده بصت له بقرف وقالت له احترم نفسك يا اسر وخليك في شغلك قال لها خلاص يا ستي بهزر معاكي انتي قفوشه اوي كده ليه

الايام عدت والمشروع بدأ يظهر له ملامح وفريده بدأت تلاحظ ان اسر مش مغرور زي ما كانت فاكره بالعكس كان شاطر جدا وبيساعدها وبيشيل عنها حاجات كتير وكان بيجيب لها قهوه كل يوم الصبح وهو عارف انها بتحب القهوه زياده وبدأت نظرتها له تتغير شويه بشويه بس كانت بتكابر ومش عايزه تعترف