نجع الصعيد الجواني
يمنى بقى اتقدم لها عرسان كتير، مهندسين ودكاترة من البندر، وولاد عمها من بعيد، بس هي كانت بترفض، تقول لأبوها الحاج إسلام يا بوي أنا مش هتجوز، أنا قلبي مات مع حمادة، أبوها يقول لها يا بتي ما تظلميش نفسك، تقول له سيبني يا بوي، أنا لو اتجوزت هظلم اللي هتجوزه معايا، وفضلت على الحال ده أربع سنين كاملين، لا اتجوزت ولا خطبت، بقت تروح المدرسة اللي اشتغلت فيها مدرسة عربي وتجي تذاكر لآيات وتقعد لوحدها.
بعد أربع سنين، حصل اللي محدش كان متوقعه، نور بنت العمدة وهي بتولد ابنها التاني جالها نزيف وماتت هي والجنين، النجع كله اتقلب، وحمادة اتصدم صدمة عمره، مكنش زعلان عليها كزوجة بس، كان زعلان عليها كإنسانة طيبة ملهاش ذنب، وشال ابنه صلاح الصغير اللي عنده تلات سنين وفضل قاعد جنب قبرها يعيط.
بعد ما عدت الأربعين بتاعة نور، الحاج صلاح نفسه اللي كان غصبه قبل كده، هو اللي راح لحمادة وقال له يا ولدي روح رجع يمنى، أنا اللي ظلمتكم، أنا اللي كسرت قلوبكم عشان شوية طين، روح يا ولدي استسمح عمك وبنت عمك، حمادة ما صدق، قام لبس جلابيته البيضا وراح على بيت عمه الحاج إسلام.
خبط على الباب، الحاج إسلام فتح له، أول ما شافه وشه قلب، قال له عايز ايه يا حمادة، مش كفاية اللي عملته في بنتي، حمادة وطى على إيده يبوسها وقال له يا عمي أنا جاي أطلب السماح، وجاي أطلب إيد يمنى من تاني، أنا عمري ما نسيتها، ومراتي ماتت وربنا خد أمانته، وأنا عايز ألم اللي اتكسر.
الحاج إسلام نده ليمنى وآيات وإيمان اللي كانت جاية زيارة، يمنى خرجت من أوضتها، أول ما شافت حمادة قدامها بعد أربع سنين، قلبها وقع في رجلها، لسه بتحبه، لسه نفس النظرة اللي كانت بتحبها، بس الوجع اللي جواها كان أكبر من الحب.
حمادة قال لها يا يمنى أنا رجعت لك، أنا عارف إني ظلمتك، بس والله كنت مغصوب، أبوي كان هيموت، سامحيني واديني فرصة تانية، أنا هعوضك عن كل يوم عيطتي فيه، يمنى بصت له وعينيها مليانة دموع وقالت له بكل قهر السنين، دلوقتي افتكرت يا حمادة، دلوقتي جاي بعد ما بقيت أرمل ومعاك عيل، جاي بعد ما سبتيني في نص الطريق لوحدي، بعد ما بقيت أضحوكة النجع.
آيات قامت قالت لها يا يمنى اسمعيه، الراجل مكانش بإيده، وإيمان قالت لها يا يمنى المسامح كريم، ده ابن عمك وبيحبك، الحاج إسلام بقى سكت شوية وبعدين قال جملة هدت حمادة، قال له يا ولدي اللي ساب مرة يسيب ألف مرة، انت سبت بنتي مرة عشان كلام أبوك، ايه اللي يضمن لي ما تسيبهاش تاني عشان أي مصلحة تانية، انت كسرتها وكسرة القلب ما بتتلمش.
