الشيطان وقع أسيرها ج3

-المهم جواهر دلوقتي كويسة ؟!
قالها أمير وهو ينظر إلى عبير التي تمشط شعرها أمام المرآة فترد هي :
-أيوة اتحسنت …حتى من شوية قبل ما نيجي هنا اتصلت وأصرت اني ابقى معاك النهاردة وبكرة اروحلها …قالت إنها هتقولي على خبر حلو …كان باين من صوتها أنها مبسوطة اووي …
ابتسم أمير وقال:
-كويس ربنا يسعدها ويجبر بخاطرها…
تنهدت عبير وقالت:
-يسمع من بوقك ربنا يا أمير …ربنا يسعدها يارب. ..جواهر أطيب بنت شوفتها في حياتي وتستاهل السعادة …
تركت المشط ثم اتجهت إلى أمير وجلست على الفراش وهي تقول بشرود :
-تعرف على قد أن اللي عرفته صعب بس انا فرحانة اووي أن جواهر طلعت اختي …دايما كنت بحس ان في رابط بيننا …دايما لما اكون في مشكلة هي اللي بتساعدني من غير ما تفكر مرتين حتى …لما بابا كان عايز يجوزني لعدي بالعافية مفكرتش مرتين وهي بتساعدني على الهروب رغم أنها عارفة أنها هتقع في مشكلة مع بابا بس مهمهاش …حتى لما بابا ورطها وخلاها تتجوز عدي مفكرتش تقول على مكاني بعد ما عرفته …دايما جواهر كانت حاسة اني مسؤوليتها…شكل في عقلها الباطن كانت عارفة اني اختها …
تسطحت على الفراش وتنهدت قائلة:
-حاسة أن بقالي عيلة جديدة…عيلة تعوضني عن اللي شوفته من بابا …
نظرت إليه وابتسمت بينما تظهر نواجزها الساحرة وقالت وهي تتلمس وجنته :
-بقى معايا زوج زي القمر …حنين وطيب وبيحبني …راجل مثالي من الآخر …
ابتسم أمير وهو. يقبل كفها لتكمل هي:
-وبقا معايا اخت زي تحية بتحبني وتقدرني وجواهر كمان …أنا دلوقتي في قمة سعادتي يا أمير بجد …حاسة اني طايرة من كتر السعادة …
-حبيبتي ربنا يسعدك دايما يارب …
قالها أمير وهو يضمها إليه بقوة ويقبل رأسها ويكمل :
_أنتِ اجمل هدية في حياتي …احيانا مبقدرش اصدق اني اتجوزتك …
تألقت عيني عبير وقالت :
-ولا أنا بصراحة …
صمتا.قليلا ليتنهد أمير بعمق ..
-ايه فيه ايه ؟!
سألته عبير
-أنا حاسس اني وشي فقري عليكي ..
قالها أمير بتعب لتعبس عبير وتقول:
-ليه بتقول كده ؟!
هز كتفه وقال ؛
-من أول ما اتجوزتك وانتِ المصايب بترف على رأسك زي الرز ..
ضحكت عبير بقوة وضربته على كتفه وقالت:
-بطل بواخة ايه وشك فقر دي …
امسك كفها وقال:
-يا بنتي افتكري احنا ليلة دخلتنا.بيت تحية ولع وجات عندنا …أنا واحد فقري امي الله يرحمها، كانت بتقول عليا كده…
انطلقت ضحكات عبير أكثر وهي تمسك وجهه وتقبله قائلة :
-أنت اجمل انسان شوفته في حياتي … متقولش على نفسك كده …
ثم اقتربت ثانية وهي تقبله مرارا على وجنته …
ضحك أمير وهو يضمها …اتجهت يديه بخبث إلى بطنها وبدأ يدغدغها …
صرخت عبير فجأة وهي تدفعه وتقول:
-لا لا يا أمير بطل بواخة بقا …
وكادت أن تهرب الا أن أمير امسكها وثبتها على الفراش بيد واليد الآخر استخدمها لكي يدغدغها …
-يا أمير لا …لا يا أمير بغير خلي عندك دم
قالتها عبير وهي تضحك وتصرخ في آن واحد ولكنه لم يرحمها ابدا وهو مستمر في فعلته …
طفرت الدموع من عينيها بسبب أفراطها في الضحك وقالت:
-خلاص عشان خاطري يا أمير هموت …خلاص عشان خاطري.لو بتحبني .. …
توقف فجأة وقال:
-بحبك طبعا ..
ابتسمت بهيام وقالت:
-وانا كمان ..
♡♡♡♡♡♡♡♡♡♡♡♡♡♡♡
في اليوم السابق …
جلست جوري أمام القبر وقالت ودموعها تتساقط :
-انا لقيتك يا بابا …جيت ولقيتك ..
كانت تضحك بطريقة غريبة …دموعها تنهمر تباعا وتقول :
-أنت اذيتني كتير بس انا جيتلك…..جيتلك رغم انك اذتني كتير …ليه كنت بتعمل فيا كده ؟!أنا بسبب طلعت إنسانة وحشة …امي بتقول اني مجنونة…بتقول اني مش متزنة نفسيا يا بابا ..حتي ياسين سابني …حتى ياسين بيقول اني مش متزنة نفسيا …هو طلقني وسابني وراح اتجوز…اتجوز واحدة غيري وحرق قلبي …ومهما اعمل رافض يرجعني…أنا عملت سحر عشان يرجعلي برضه مرجعش يا بابا …مرجعش …أنا زعلانة اووي …أنا خسرت كل حاجة …كل حاجة خسرتها يا بابا …ياسين وبنتي ..حتى نفسي خسرتها …
انفجرت الدموع من عينيها وقالت :
-تعرف أنا ضربت ماما وشكلها ماتت …ماما اكيد سابتني ومشيت وانا دلوقتي لوحدي مليش اي حد …مليش حد …وده كل بسببك … بسببك…
ثم أخذت تضرب على الأرض وتصرخ :
-أنت السبب في ده كله …انت السبب …انت اللي خلتني إنسانة مش متزنة نفسيا …أمي كانت كل شوية بتقول اني شبهك …بتقول اني مجنونة زيك …وانا تعبت …أنا ذنبي ايه اتحمل ده كله …قولي ذنبي ايه ؟!!
انفجرت الدموع من عينيها غزيرا وهي تشعر بألم كبير في قلبها وقالت:
-ليه عملت كده فيا …ليه دمرت حياتي يا بابا …ليه ؟!..أنا كان نفسي اعيش كويس …كان نفسي ياسين يكون معايا …بس انت كنت واقف في طريقي ..كنت بأذي بنتي بنفس الطريقة اللي أنت كنت بتأذيني بيها …كنت بحرقها …
ضحكت ودموعها تنهمر أكثر واكملت :
-أيوة …أيوة كنت بحرقها بالنار يا بابا …فاكر انت برضه كنت بتعمل فيا كده …كنت بتحرقني بالنار …فاكر على أقل غلطة كنت بعملها كنت بتحرقني بالنار….وكنت بتضربني وبتحبسني …فاكر لما حبستني في الاوضة الضلمة …انت كنت عارف اني بخاف من الفيران بس دخلت فيها فأر …كنت بتسمعني بصرخ ومحاولتش تساعدني …سيبتني كده ……قلبك طاوعك انك تسيبني تصرخ …أنا بكرهك …وبكره امي وبكره ياسين …سمعتني يا بابا …بكرهك …بكرهك …وبتمنى انك تكون بتتعذب دلوقتي انت وماما …أنا برضه قتلتها …هي حصلتك …بتمنى انتوا الاتنين تتحرقوا في نار جهنم .!!
ابتلعت ريقها وهي تخرج السكين التي معها وقالت :
-خلاص دي النهاية المناسبة لعيلة توكسيك زينا …انت موت وماما ماتت وفاضل أنا أموت …نهاية سعيدة …هنجتمع سوا أخيرا …صح.؟!
ثم دون أي تردد مررت السكين على رسغها حتى انفجرت الدماء منه ملطخة القبر …استلقت بجوار القبر وهو تنزف بقوة …تشعر أن قواها تغور ..ابتسمت بوهن وقالت :
-تعرف رغم انك اذيتني كتير الا اني حبيتك يا بابا …أنا حبيتك حتى اكتر من أمي …وانهارت يوم وفاتك ..احيانا بسأل نفسي ليه زعلت عليك وليه بحبك رغم كل اللي عملته فيا بس صدقني مش لاقية أي إجابة !!
أغمضت عينيها وهي تلفظ أنفاسها الأخيرة !!!
………
في الوقت الحالي ….
في المشفى ….
فتحت عفاف عينيها لتجد ياسين بجوارها …كان يبدو عليه التعب ….
-ياسين …
قالتها عفاف بتعب لينتبه لها ياسين ويمسك كفها ويقول بلهفة :
-انتِ كويسة …
هزت رأسها وقالت بتعب :
-ايه اللي حصل مخي مش مجمع …
ابتلع ياسين ريقه …الطبيب بالفعل اخبره عن هذا ..أخبره أن السيدة عفاف قد تتشوش ذكرياتها بسبب ارتجاج في الدماغ تسببت به ضربة جوري ….
وجد ياسين نفسه عاجز عن الشرح ونظر إلى عفاف بيأس فقالت عفاف:
-ياسين قولي حصل ايه ؟!وفين جوري….آه ..
فجأة تأوهت وهي تضع كفها على رأسها والصور تندفع إلى عقلها بشكل مؤلم …أنها تتذكر …نعم تتذكر !!..تتذكر كل شئ…جوري…لقد ضربتها ابنتها ….
-ياسين جوري ضربتني هي اللي …
-عارف ..عارف …
قالها ياسين بتعب وقد ارتاح قليلا لأنها تذكرت بنفسها ….
-ازاي عرفت ؟!
سألته بفضول ليسرد عليها ما حدث بكل تفاصيل …كما أخبرها أنها نائمة منذ أمس بالمشفى ولم تستيقظ حتى الآن ….
-طيب هي فين يا ياسين …فين جوري ؟!
-هربت ..
قالها بيأس وهو يفرك عنقه ثم اكمل؛
-بعد ما روحت عشان اشوف فيكي ايه واتصدمت باللي بنتك عملته انشغلت معاكي واتصلت بالإسعاف كان وقتها هي هربت ..
وضعت هي كفها على رأسها والدم ع تطفر من عينيها وقالت:
-جوري بقت خطر على نفسها وعلى اللي حواليها يا ياسين …ساعدني قولي اعمل ايه ؟!
زفر ياسين بضيق وهو ينظر إليها وقال بإنفعال :
-انا قولتلك قبل كده تعملي ايه صح ولا لا …نبهت عليكي تاخديها لدكتور نفسي لأن بنتك مش سليمة نفسياً….قولتلك قربي منها …بس يا مدام أنتِ مسمعتيش كلامي و ..
صمت ياسين فجأة وهو يتذكر الوضع الذي هي به …ليس وقت اللوم الآن ..نظر إلى عفاف ليجد الدموع تطفر من عينيها والذنب يطل منهما …
-أنا اسف ده مش وقته …
تنهد.واكمل ؛
-بس متقلقيش هيلاقوا جوري بإذن الله البوليس بيدور عليها ولما يلاقيها هنتصرف أنا مش هسيبك لوحدك
ابتسمت عفاف بإطمئنان وقالت:
-شكرا …شكرا اووي يا ياسين …
هز رأسه وقال:
-ارتاحي دلوقتي هجيبلي قهوة واجيلك تاني …
هزت رأسها وقالت:
-لا لا خلاص كتر خيرك على كده روح بيتك شكلك تعبان وانا …
-لا مستحيل مش هروح واسيبك…خلاص أنا هجيب قهوة وهفضل هنا انتهى الكلام و
وبالفعل خرج من الغرفة ليجلب قهوة له …توقف فجأة وهو يرى ورد تقترب منه ثم تعانقه بقوة …
أبعدها قليلا وقال:
-ايه اللي جابك هنا ؟!أنا اتصلت بأمي عشان تروحلك يا ورد….ليه تتعبي نفسك وتيجي …الدكتور منبه و…
-بس بس اهدى شوية !!
قالتها ورد وهي تضع كفها على شفتيه ثم تكمل بإبتسامة :
-يا حبيبي أنا والله كويسة متبقاش أوفر لو سمحت …المهم قولي دلوقتي ايه اللي حصل …أنا قلقت …فين جوري …
هز ياسين رأسه وقال:
-للأسف معرفش هربت مني ومدام عفاف بس اللي موجودة جوا …
فركت ورد كفيها وقالت:
-طيب ايه …هي كويسة دلوقتي ؟!
-أيوة كويسة ..جالها ارتجاج بسيط في المخ بس الدكاترة قالوا مفيش اي خطر بس هي هتفضل تحت الملاحظة يومين وانا لازم افضل معاها …
ابتسم ورد وهي تمسك كفه وتقول :
-اكيد يا حبيبي لازم تفضل معاها …ربنا يصبرها ويقويها …بجد صعبان عليا اووي….حتى جوري صعبانة عليا …
نظر ياسين عليها ببرود وقال:
-ميصعبش عليكي غالي يا اختي …
ضربته جوري على كتفه وقالت:
-يا اخي بطل قسوتك دي …جوري واضح انها غير متزنة نفسيا …
-ورد أنا بطلت أشفق عليها بسبب اللي عملته أنا مستحيل انسى انك كنتِ هتضيعي مني بسببها هي …
شدت على كفه وقالت:
-بس أنا دلوقتي كويسة الحمدلله يبقى مفيش داعي للقلق والخوف ده يا حبيبي …ولا فيه داعي انك تحقد على جوري المسكينة برضة بتعاني وانت لازم تساعدها دي أم بنتك مهما كانت.
زفر ياسين بضيق وقال:
-ما هو ده من سوء حظي أنها ام بنتي…من سوء حظي والله …
قاطع كلامه رنين الهاتف ..رد سريعا عندما رأى أن المحقق هو من يتصل به …
-أيوة يا فندم
قالها ياسين بلهفة متمنيا الحصول على بعض معلومات عن جوري..
فجأة شحب وجه ياسين وقال:
-بتقول ايه ؟!!!
توقف قليلا وهو يسمعه فرد بتعب :
-حاضر ..حاضر يا فندم ..
ثم أغلق الهاتف لتقول ورد:
-فيه ايه يا ياسين قلقتني ؟!
-ما تت …جوري ما تت!!!
قالها ياسين بصدمة لتضع ورد كفها على فاها.بصدمة…