آشباح المخابرات2 عزازيل الفصل 32

#آشباح_المخابرات2…(#الجزء_الثاني!..)
#عــزازيـل! … (A. O. 666).
#وحش_غير_معروفٍ_للبشر_ولم_يكن_منقرضًا_لتعرفه!!
#الفصل_الثاني_والثلاثون.

(الله يا محي العضام وهي رميم اللهم أحي ما مات في حياة بسبب الحسد والعين وأعدلي مافقدت من راحة وبركة اللهم ابطل اثر كل عين وحسد أصابت روحي وأحزنتها اللهم أخرج كل عين وحسد من جسدي وبيتي يارب العالمين 💙)

صدمته طالت في محاولات فاشلة لمعرفة مقصده، وبصعوبة حرر عنه ثقل ما يخوضه بسؤالٍ طرحه بدهشةٍ:
_جزيرة أيه اللي بتتكلم عنها يا عمر؟

طالعه بنظرةٍ متفحصة، كصقر يدرس نقاط ضعف فريسته، وإذا به يرد بثباتٍ ثقيل:
_مش أنا اللي بتكلم عنها، دي البنت اللي هارون كان زقيقها عليا من البداية عشان تجيب رجليا هي اللي حكيتلي عنها، وعن بنتها اللي أخدها هارون سلعة بيع على مواقع الـ. ـدرك ويب، وأعتقد أنك على علم بجزء من اللي بيحصل فيها، بدليل منافسة القتال اللي كانت دايرة في المكان القذر اللي لسه راجعين منه!

نجح الجنرال في تحقيق مبتغاه دون أي مجهود منه، لقد منحه عثمان فرصة ذهبية وبالطبع لن يتنازل عنها، فاذا بتيام يبرق في صدمة وهو يردد بصوتٍ إختفى عن حنجرته:
_ورحيق مالها ومال قذارتهم دي؟

منحه ابتسامة ساخرة، ومال صوب محل جلوسه، وهو يخبره بما سيجعله يصيب هدفه:
_أنت بنفسك قولت إنها في مكان صعب تلاقيه، وشخص زي هارون هيكون ليه مكان سري فين غير الجزيرة اللي صوفيا حكت عنها، والوكر السري للمزاد اللي بيعملوه عشان يرضوا بيه رغبات الاشخاص المريضة اللي بتشارك فيه.

وأضاق عليه السُبل حتى يتمكن منه:
_كلامك اللي لسه قايله من شوية، ان عثمان عايز يزرعني مكان هارون، هيزرعني فين وتقريبًا كِنان على كلامك ماسك كل حاجه؟ واشمعنا بعد ظهوري في المنافسة اللي حضرها كل افراد الدرك ويب ده؟

هز رأسه بجنون وهو يرفض استيعاب ما يُطرح إليه من منطقية حديث ياسين، بينما يستكمل هو تضيق الحصار:
_زمان قولتي إن في شغل سري محدش يعلم بيه غير عثمان وهارون، ودلوقتي عثمان قرر يضحي بيه عشان ميخسركش انت وكِنان مع بعض، أعتقد واضحة زي الشمس قدامك.

نصب تيام عوده المهزوز، وهو يتمتم بخفوت وصعوبة:
_رحيق مالهاش ذنب في كل ده، أنا لازم أخرجها من المكان ده مهما حصل.

ارتسمت بسمة خبيثة على وجهه، فاذا به يسترخي بجلسته وهو ينطق بغموض:
_وهو ده اللي أنا بقولهولك.