(أشباح المخابرات2) الفصل ال27
بقلم أية محمد رفعت
تعالى طرق باب الغرفة، فإذا بـ “رزان” تسرع بمسح دموعها، وتمسك كفيها قائلة بتحذير:
_أوعي تقولي حاجة يا تالا، بلاش دلوقتي، أرجوكِ بلاش، إنتِ هتبدأي صفحة جديدة مع نوح، وبدايتها هي الخروج من هنا، خديه وابعدوا، صدقيني جحيم هارون وعثمان هيقتل كل اللي في القصر بالبطيء.
سألتها من بين شهقاتها المتتالية:
_ورحيق؟
ردت عليها بكل عزم:
_مش هتخلى عنها، دي صاحبتي وأختي الوحيدة، مش هسيبها يا تالا، مهما كان التمن.
وأضافت بعقلانية نجحت فيها باستمالتها كليًا:
_انتِ ونوح لازم تبعدوا من هنا، اعملي زي ما كنان وتيام طلبوا منكم، انفدي بجلدك يا تالا، الشر هنا غالب وهيطولكم مهما أخدتوا احتياطاتكم.
أزاحت دموعها وقد أستعادت جزءا من ثباتها المهدور، تحرر باب الغرفة وظهر “نوح” ببنطاله الأبيض وقميصه الأبيض، وحذائه الاسود اللامع، وبالمنتصف عقد حزامه الجلد الفخم.
اقترب منها وهو يتطلع لها بافتتان، وخاصة من شدة أناقتها رغم بساطة ما ترتديه، وقف قبالتها وهو يتنحنح مرات عديدة كأنه يستدعي كلمة مناسبة توفي بما يود قوله:
_إيه العسل والحلاوة دي كلها يا تالا، ناقصلك جناحين وتطيري.
كانت مازالت تحاول أن تفيق مما عانته، فمنحته ابتسامة رقيقة، وهي تهتف بصوتها المتحشرج:
_ميرسي يا نوح.
تقوس حاجبيه بينما يسألها باسترابةٍ:
_مالك؟ فيكِ إيه؟
حكت منخارها وهي تجيبه بارتباكٍ:
_تيام قالي إنه ممكن ميقدرش يجي، فده مزعلني، متخيل إنه ميكنش موجود معايا في مناسبة زي دي يا نوح.
صم كتفها بذراعه وقال بحنانٍ:
_هييجي وهيحضر هو وكِنان، متقلقيش.
انزوت على ذراعه، ففتح الآخر وضمها بقوةٍ عليه، جعلت “رزان” تستغل الفرصة وتتسلل من الغرفة، فاذا ب”نوح” يوقفها:
_على فين يا مرات الغالي؟
استدعت صوتها الهادر ليصبح شبه طبيعي:
_هروح أظبط الميكب بتاعي وراجعة يا نوح.
رد يمازحها:
_لا إنتِ زي الفل ومش محتاجة لأي نقاشة تانية، ادخلي تممي على سلفتك لو عايزة فرشة شمال ولا يمين بعد الدمعتين اللي نزلوا دول؟
ضحكت “تالا” رغمًا عنها، بينما لكزته “رزان” بغضب:
_قولتلك ألف مرة اتأدب معايا، أنا مرات أخوك الكبير وليا احترامي!
لوى شفتيه بتهكمٍ:
_مش لما أحترمه هو الأول!! اخويا ده إسمه كيوي يا مرات أخويا يا غالية!
اتسعت ضحكات “تالا”، بينما استشاطت” رزان” من فرط الغضب، وعادت تلكزه بعنفوان:
_والله لأقوله لما يرجع وهخليه يأدبك وقدامي.
