سند الكبير ج4

ردت عليها الأخرى بسخرية :

_ لأ ده غضبان عند أهله سيبك منه ويلا نعمل حاجة مفيدة بدل الكلام عليه..

_ زي ايه؟!..

_ اتكلمي معايا عن الحرباية بنت عمك وتفاصيل جوازه منها…

____ شيماء سعيد _____

بالمندرة الخاصة بسند..

كان صامت يتابع قول أحد الرجال :

_ يا كبير دي بت عمي وأنا أولى بيها من الغريب..

أشار اليه بالصمت ثم نظر الي والدتها لتقول بخوف :

_ من يوم ما أبوها مات وإحنا عايشين في خيرك يا كبير، أكل وشرب وعلام، لكن اسأله هو وابوه فين ورث بنتي هو عايز يتجوزها بس عشان تبقى تحت رجله، حمدي ابن اختي مربيها على ايده وبيعشق التراب اللي بتمشي عليه..

تدخل ابن العم قائلا :

_ ايه التخاريف دي يا ولية يا خرفانة، بت عمي محدش ياخدها غيري..

باشارة من كف الكبير صمتت كل القاعدة ليقول هو :

_ هاتي سمر بتك يا عزيزة والكلمة الأخيرة هتبقى ليا انا مش عايز صوت بعدها…

حركت عزيزة رأسها مردفة بطاعة :

_ أمرك يا كبير أمرك..

دقائق وكانت الفتاة تقف، نظر لها سند لتجلس على المقعد المقابل له ثم قال بصوت وصل للجميع :

_ عايزة مين فيهم يا سمر؟!..

تعالت دقات قلبها ونظرت لوالدتها التي بعثت لها نظرة حنان لتأخذ نفس عميق قائلة :

_ ولا واحد فيهم أنا عايزة أكمل تعليمي وأبقى زي الدكتورة وعد..

صرخت عزيزة :

_ إيه الكلام ده وابن خالتك يا قليلة الأدب..

_ أنا مش قليلة الأدب ياما، حمدي على عيني ورأسي ولو يستنا لحد ما أوصل لأحلامي مش هبقي لغيره، لكن لو مش قادر يبقى ربنا معاه..

قبل أن تتحدث عزيزة قال سند :

_ رايك ايه يا حمدي..

رد بصوت يفوح منه العشق :

_ هستنها العمر كله..

_ يبقي خلاص سمر لحمدي وأنت يا ابن زهران ورث بنت عمك يبقي عندي الليلة..

رحل الجميع لياخذ نفسه بتعب، دائماً عادل ومعها هي يجعلها تعيش كل أنواع الظلم، فاق على صوت فخر الذي قال :

_ ممكن أتكلم معاك شوية يا كبير..

_ قول اللي عندك يا فخر..

_ هدى بنت شيخة القبيلة عايزها تبقى مراتي..

ضحك سند ثم قال بسخرية :

_ مهي مراتك بقى لها شهرين وعايشة جوا دارك إيه الجديد؟!.. كل ده مش رافع راسنا يا خيبة أملي فيك…