وادي النسيق
بقلم شاهندة
ليغمض عينيه لثوان شعر فيهم نبيل أن مؤيد يحاول أن يحتوى ألمه النابض بعروقه..ليفتح مؤيد عينيه فجأة ليتأكد نبيل من ظنه ..يرى قسوة إحتلت عينا صديقه وهو يقول:
بس وحياة ليالى مدقتش فيها النوم عشان حرمتنى حضنها..وحياة أيام كنت بتعذب فيها كل أما اغمض عينى وأشوف صورتها أو أسمع إسمها..وحياة دقات قلبى اللى كانت بتزحف من الألم وبتبهت فى كل ثانية مرت وهي مش جنبى..لأدفعها التمن غالى..وأخليها تعرف إن مش مؤيد الحسينى اللى تلعب بيه وبمشاعره وتعتبره لعبة فى إيديها ممكن تلعب بيها شوية وتكسرها وبعدين تدور على لعبة غيرها..لأ..مبقاش أنا إن ما خليتها تركع على رجليها أدامى..تتمنى منى السماح وساعتها بس همسح صورتها من قلبى وإسمها من عقلى وحبها من تكوينى..ساعتها بس هنساها..للأبد.
قال نبيل بقلق:
هتعمل إيه يامؤيد؟
قال مؤيد فى صرامة:
هرجع مصر ..بكرة الصبح.
********************
كان خالد يلاعب طفلته الصغيرة ..يبتسم بحنان على طفوليتها وضحكاتها البريئة العفوية..ليتذكر صاحبة الضحكات التى تماثلها عفوية وسحرا..تلك التى سلبته راحة البال وأصبحت تشغل عقله..يتساءل عن سبب غزوها لأحلامه التى تقض مضجعه ولكنها فى الوقت نفسه تمنحه شعورا رائعا بالحياة..أفاق من أفكاره على يد تلك الصغيرة التى قرصته بخفة فى وجنته ليقول بحنان:
بتقرصى بابى ليه ياريمو؟
قالت ريم بشقاوة محببة:
عشان تبطل تسرح وأنا جنبك يا بابى..حتى لو كنت بتفكر فى مامى..مش مسموح طول ما إنت معايا..مفهوم؟
إتسعت إبتسامته وهو يقول:
حبيبتى الصغيرة كبرت وبقت بتغير على بابى.
قالت ريم ببراءة :
عشان بحبك لازم أغير عليك..عادل قاللى كدة.
إتسعت عينا خالد بدهشة قائلا:
عادل ده مين ياريم؟
قالت ريم :
زميلى فى المدرسة يابابى..بيحبنى وأنا بحبه..بس هو كان زعلان منى عشان انا مبغيرش عليه من ساندى ..وقاللى عشان أكون بحبه لازم اكون بغير عليه.
قال خالد بحنق:
حب إيه وغيرة إيه فى سنكم ده..انتى قلتى الكلام ده لمامى ياريم؟
قالت ريم ببراءة:
قلتلها يابابى..
قال خالد :
وقالتلك إيه؟
قالت ريم:
ضحكت هي وطنط ماهى .
قال خالد بحنق هامس:
ضحكت ! دى أم بتربى دى؟..حاجة تعلى الضغط.
ليقول بتروى موجها حديثه إلى ريم :
بصى ياريم..إنتى عندك ٧ سنين..يعنى لسة صغيرة أوى على موضوع الحب ده..عادل زميلك وبس..وإنتى كمان زميلته وبس..لما تبقى أد مامى..هتحبى وتنحبى..ومن هنا ورايح متقعديش مع عادل ده ولا تكلميه أصلا..اقولك..أنا بكرة هنقلك من المدرسة دى خالص.
