مع وقف التنفيذ ج٤

عقدت عزة ذراعيها امام صدرها وقالت بتبرم:
– وأنتى عرفتى ازاى اصلا توقع كده ولا هى لمحتلك

رفعت عبير كتفيها وقالت :
– مش هى دي المشكله دلوقتى أنا مش عارفه ايه اللى فتح السيرة دى ..أ حنا دلوقتى فى مشكلة مُهرة وباباها لازم أكلم بلال يدخل ويحاول يحلها بطريقته… ياريتك يا عزة قولتيلى أول ما عمرو قالك

لوحت عزة بيديها وهى تقول :
– ياختى نسيت مش شايفه ماما كانت تعبانه ازاى
دفعتها عبير لتنهض وهى تقول بمكر :
– طب أمشى بقى شوفيلك حته تنامى فيها علشان عاوزه أكلم جوزى شويه براحتى

رفعت عزة حاجبها وهى تقول :
– بتطردينى من أوضتى اصلا ماشى يا عبير .. وبعدين أنتى فاكرانى ماليش جوز انا كمان ولا ايه طب انا بقى هروح البلكونه ونقعد نشاور لبعض زى الحبيبة … ثم ضحكت وخرجت من الغرفة وأغلقت الباب خلفها

أخرجت عبير هاتفها وهاتفت بلال وبمجرد أن أجابها حاولت أن تغير نبرة صوتها وهى تقول :
– مين معايا
كان بلال مستلقياً على الفراش يستعد للنوم فابتسم وهو يتكإ على جنبه الأيمن وقال :
– حضرتك انتى اللى متصله
قالت عبير بدلال :
– طيب ممكن نتعرف .. اصل صوتك عاجبنى اوى

اعتدل جالساً على الفراش بحماس وقد أعجبته اللعبة وقال :
– بس انا متجوز
رفعت كتفيها وهى تقول برقة :
– وايه يعنى الشرع محلل اربعة
قال هامساً :
– بس انا بحب مراتى ومفيش واحده غيرها تملى عينى حتى لو كان الشرع محلل عشره

كتمت ضحكتها وقالت بتبرم طفولى :
– خلاص بلاش جواز نتعرف بس
هتف ضاحكاً :
– أيه ده يا عبير أنتى انحرفتى أمتى يا حبيبتى
ضحكت وهى تقول :
– ياسلام يعنى دى اللى وقفت عندها يعنى
قال بحنق :
– كده برضه تضحكى الضحكه دى وأنتى بعيد عنى طب انا هاجى أخدك دلوقتى

حاولت ان تخفض صوت ضحكاتها و تسائلت قائلة :
– ياسلام يعنى هتضحى بوقت نومك وتنزل وتيجى تاخدنى
همس قائلا بحرارة :
– الضحكه دى تخالينى اضحى بعمرى مش بنومى بس

قالت على الفور:
– لالا أنا بهزر معاك اهدى كده علشان احكيلك على حاجه مهمه اوى تخص فارس ومُهرة
أنتبه وارهف سمعه لها وهى تقص عليه ما قاله عمرو لعزة فى الهاتف عن مشكلة فارس ومُهرة وحتى هذه اللحظة ……

****************************************

استيقظت مُهرة فزعة على صوت صراخ زوجة أبيها وهى توقظها صائحه :
– قومى معايا ياختى بقولك قومى
نهضت مُهرة بفزع وهى تصيح :
– فى ايه
صرخت بوجهها :
– جيرانى أتصلوا بيا وقالولى ان شقتى اتسرقت قومى يالا تعالى معايا