مع وقف التنفيذ ج٤

******************************************

هاتف بلال والد مُهرة وأتفق معه على موعد فى المركز الخاص بالدكتور بلال وبالفعل ذهب إليه والدها فى المعاد المتفق عليه نهض بلال من خلف مكتبه مصافحاً أياه بحرارة وجلس قبالته
فقال والد مُهرة على الفور :
– انا عارف انت كنت عاوز تقابلنى ليه يا دكتور ووالله لو مكنتش غالى عليا مكنتش وافقت اجى اقابلك علشان عارف أنك عاوز تتكلم فى ايه

أخرج بلال زجاجة مسك متوسطة واعاطها له قائلاً بابتسامة :
– طب مش هتقبل هديتى كمان ولا ايه
أخذها والدها على استحياء قائلا:
– هديتك مقبولة يا دكتور
قال بلال مبتسماً :
– اوعدنى بقى أنك هتسمعنى من غير ما تقاطعنى ولا تتعصب

أومأ والدها برأسه موافقاً بغير ترحيب .. فقال بلال :
– أنا عارف انك بتحب النبى عليه الصلاة والسلام وبتحب تسمع كلامه مش كده ؟
قال والدها على الفور :
– عليه الصلاة والسلام
تمتم بلال :
– عليه الصلاة والسلام ..
ثم قال بهدوء :
– بص بقى يا راجل يا طيب النبى عليه الصلاة والسلام
قال :
– ” درهم ربا يأكله الرجل وهو يعلم أشد من ستة وثلاثين زنية”
وقال كمان عليه الصلاة والسلام
“لعن الله آكل الربا، وموكله، وكاتبه، وشاهديه. وقال: هم سواء”
وأنا بحبك يا عم أبو يحيى ومرضالكش ابدا أنك تاكل ربا والكلام ده يطبق عليك
وعلشان كده فارس قال ان عم عامر على حق علشان هو كمان بيحبك وميرضاش عليك أنك تبقى ملعون والعياذ بالله أو أنك تاكل ربا

قال ايو مُهرة حانقاً :
– يا دكتور بلال ده مش ربا ده زى قرض البنك كده وليه فوايد وبعدين هما اتفقوا من الاول والعقد شريعة المتعاقدين

قال بلال على الفور :
– بس اللى نعرفة يا عم ابو يحيى أن ما بنى على باطل فهو باطل ولو العقد ده عقد ربا يبقى باطل
ويبقى الاتفاق بينهم باطل برضه الكلام ده لو العقد ده بيوافق شرع ربنا لكن لو يخالفه ميبقاش شريعة المتعاقدين ولا حاجه
أما بقى بالنسبة لحكاية أن البنك بيسلف بالفوايد ومين قال ان فوايد البنوك دى مش ربا أصلا
ده بغض النظر عن انك مش بنك ولا حاجه أنت جار بيسلف جاره

طرق الباب فقال بلال :
– أتفضل

دخل عامر ومعه ولده مينا ومد يده يصافح ابو يحيى الذى صافحه ببرود وجلسا بجواره
فقال ابو مُهرة متبرماً وفوايد البنوك بقى مالها ما كل الناس بتاخدها دى تجارة البنك بيتاجر بيها وبيردهالنا بفوايدها
قال بلال بهدوء شارحاً كلامه ببساطة:
– هو أنت يا عم ابو يحيى لما بتاجر بفلوس مش الفلوس دى بتبقى ممكن تكسب وممكن تخسر
قال على الفور :
– ايوا صح