عاشقة مع وقف التنفيذ بقلم مروة جمال١
الفصل التاسع
نظرت غادة لصديقتها في دهشة وهي تخبرها بطلب يوسف ……….
غادة : إيه !!!!!! عرض عليكي الجواز
سارة بسعادة : اه
غادة : وإنتي قلتي ليه إيه
سارة : ماقلتش حاجه بس كنت مبسوطة وهو حس بده
غادة : طيب وناوية تعملي إيه
سارة : أهم خطوة بابا لو عدت خلاص كل الأمور حتمشي بعد كده ………..أهم حاجه بابا يوافق وكمان يوافق على السفر
غادة : سفر !!!!!
سارة : ماهو يوسف خلاص لازم يسافر يكمل علاجه بره علشان كمان العملية صعبة وبره حتكون أفضل
غادة : وإنتي حتسافري معاه
سارة : طبعاً لازم أكون جنبه ……..حننجوز ونسافر علطول
غادة : سارة ممكن تهدي ……..تقفي وتفكري شوية
سارة : في إيه
غادة : في كثير يا سارة إنتي مندفعة قوي في قصة الحب دي وعينك مش شايفة حاجات كتير
سارة : لأ شايفة ………..بس يوسف حيخف الموضوع مجرد وقت
غادة : لا يا سارة إنتي دكتورة وفاهمه يوسف محتاج أكثر من عملية ويا عالم
سارة : أنا حافضل مع يوسف مهما حصل ميهمنيش
غادة : سارة إنتي فاهمه إن مشكلة يوسف مش مجرد شلل رجليه وبس وإن إصابته مأثرة على حاجات تانية
سارة : غادة لو سمحتي أسكتي
غادة : لأ مش حاسكت إنتي ليه بتهربي من الحقيقة دي
سارة : غادة أنا عارفه كل حاجه وميهمنيش حافضل معاه لغاية ما يخف بعد سنة بعد عشرة ميخفش خالص ميهمنيش ……….
غادة : سارة إنتي صغيرة ورومانسية قوي ………..الحقيقة غير القصص والأفلام يا سارة
سارة : هو مش اللي بيحب بيضحي علشان حبيبه ………..طيب مش ممكن كان يكون الوضع معكوس أنا اللي عاجزة وهو اللي سليم ساعتها كنت حتمنى اللي أنا بعمله معاه ………..بلاش مش ممكن أتجوز واحد سليم وكويس وبعدها يحصله زي ما حصل ليوسف ساعتها ايه اسيبه ……
غادة : الوضع مختلف يا سارة …….هو مش جوزك وبصراحه بقه ومن غير زعل أنا شايفاه أناني
سارة : أناني !!!!!
غادة : أيوه يا سارة المفروض ماكنش يعرض عليكي الجواز هو بيستغل حبك علشان مصلحته
سارة : غادة لو سمحتي ماتقوليش على يوسف كده
غادة : بنوته وصغيرة وزي القمر وبتحبه ومش شايفة حاجة تانية غير الحب ده ……..هو إستغل الفرصة دي عروسة وزوجة وراضية بظروفه وحتسافر معاه لآخر الدنيا وتسيب كل حاجه المفروض يضحي علشانك زي مانتي بتضحي علشانه
سارة : غادة ……….إفهمي مفيش تضحية سعادتنا إننا مع بعض هي دي كل الحكاية وخلاص بقه يا غادة قفلي على الموضوع ……….لما إنتي بتقولي كده أمال بابا حيعمل إيه
غادة : باباكي مش حيوافق يا سارة ……..حضري نفسك لده
