عاشقة مع وقف التنفيذ بقلم مروة جمال١
كانت ليلى والدة سارة سيدة هادئة الطبع سارة هي أبنتها الكبرى والصغرى رباب وكان زوجها يتمتع بشخصية قوية طالما طغت على أي أراء لها وهكذا كانت سارة تعلم جيداً أن صاحب القرار هو أبيها وحده وأن أمها لن تستطيع أن تغير من رأيه حتى لو أقنعتها سارة
ليلى : مالك يا سارة من ساعة ما جيتي من الشغل وشكلك مش عاجبني
سارة : أبداً تعبانه شوية ……….هي رباب لسه نايمة
ليلى : أختك دي بتصحى علشان تنام تاني
سارة : رايقة
ليلى : بس إنتي مش رايقة في حاجه مزعلاكي
سارة : يعني شديت مع بابا في الشغل
ليلى : ليه
سارة : في حالة بتابعها وهو دلوقتي مانعني إني أدخلها ينفع كده يا ماما
ليلى : من غير سبب يعني
سارة : اه مفيش سبب مقنع
ليلى : وده موضوع يستاهل إنك تضايقى نفسك كده
سارة : طبعاً ماهو ده شغلي ومتابعة الحالة دي بالذات مفيد ليا
ليلى : خلاص لما يجي بالليل حاعمله كباية يانسون تهديه وكلميه بالراحه
سارة : طيب يا ماما ما تكلميه إنتي
ليلى : يا بنتي هو أنا أفهم في شغلكم إنتي اللي لازم تتكلمي معاه
– تتكلم معايا في إيه ………….قالها ممدوح وهو يدخل عليهم غرفة المعيشة
ليلى : إيه ده جيت بدري النهارده يعني
ممدوح : اه تعبان ومحتاج أرتاح
سارة : طيب عنئذنكم
ممدوح : سارة إستني
سارة : أيوه
ممدوح : كنتي عايزة تتكلمي معايا في إيه
سارة : لا يا بابا مش وقته ………بعدين
ممدوح : قولي اللي إنتي عايزاه دلوقتي
سارة : بخصوص مناقشتنا الصبح
ممدوح : بيتهيألي المناقشة إنتهت والقرار إتاخد خلاص
سارة : بس يا بابا لازم تسمع رأيي
ممدوح : يا دكتورة لما مديرك في العمل ياخد قرار ما تناقشيش تسمعي الكلام وتنفذي
سارة : خلاص يبقى كده معنديش حاجه أقولها عنئذنك يا دكتور
ممدوح : سارة إستني
سارة : أيوه
ممدوح : يوسف في خلال أسبوع خلاص حيسافر على ألمانيا أنا إتفقت مع المستشفى هناك وبعتلهم كل التقارير الخاصة بحالته يعني كده كده الحالة حتسيب المستشفى مفرقتش بقه الأسبوع ده
سارة : بسرعة كده أنا كنت فاكره لسه فاضل شهر
ممدوح : قعدته في المستشفى مالهاش لازمه علاجه هنا صعب …….في ألمانيا برده صعب وحياخد وقت بس هناك في أمل
سارة : وهو عرف قلت ليه
ممدوح : قلت لدكتور إبراهيم يبلغه
ساره : اممممممم
ممدوح : نفوق لنفسنا بقه ……..عندنا مرضى تانيين غير يوسف
نظرت سارة لأبيها وهي حزينه ………..قالت محدثة نفسها : فعلا في مرضى تانيين غير يوسف محتاجين عقلي ………..لكن قلبي مفيهوش غير يوسف ………..يوسف بس
