كيف اعيش معك ج١

ثم نظرت الى سهام التى كانت تتابعهم بعدم فهم وقالت : سهام اعرفك استاذ شهاب ابن عمه دكتور ممدوح

فهمت سهام على الفور انه الشاب الذى حكت لمار عنه ووصفته باللزج ! فابتسمت تلقائيا
: اه اه اهلا وسهلا

شهاب : ما بلاش الالقاب دى خليها شهاب وانتى لمار برده

لمار : تمام مفيش مشكله اقدر اساعدك فى حاجه ؟

اقترب شهاب من مكتبها وجلس امامها

شهاب : ايه المعامله الرسميه دى دا احنا حتى قرايب ولا ايه ؟

ابتسمت لمار ابتسامه صفراء وقالت : اصله مكان شغل ولازم يبقى المعامله رسمى زى ما حضرتك شايف

شهاب : اممم ماشى ياستى انا قولت اجى اسلم عليكى ونتعرف اكتر عشان ملحقناش امبارح ايه رأيك اعزمك بره فى اى كافيه تختاريه

اندهشت لمار كثيرا من عرضه ولم ينقذها منه سوى دخول ممدوح ..

ممدوح باستغراب : ايه دا شهاب بتعمل ايه هنا ؟

شهاب بتردد : انا ؟ لا ابدا كنت جاى اسلم بس وطالع ليك عشان عايزك فى موضوع

نظر له ممدوح قليلا ثم قال بهدوء : تشرف يا شهاب

ثم نظر الى لمار وسهام وقال : انتوا خلصتوا ورق الجرد ولا لسه ؟

سهام : اه يا دكتور اتفضل دا ورق الجرد اللى عملناه ودا ورق فيه احتياجات الادويه بتاعت الشهر دا

اخذ ممدوح منها الورق : تمام يا سهام

ثم نظر لشهاب وقال له : يلا ياشهاب انا طالع مكتبى

وبعد خروجهم

سهام : اوووف يا ساتر ايه كتله البرود دى تلاجه 14 قدم

ضحكت لمار كثيرا وقالت : بس يابنتى عيب كده

سهام : لا مش عيب وبعدين دا اللى حكتيلى عنه فى حفله امبارح صح ؟

لمار : اه هو

سهام : ايه حكايته هو كمان هى العيله دى هتاخدك مقاوله ولا ايه

لمار : مقاوله ايه بس خليكى فى اللى بتعمليه

نظرت سهام للساعه ثم ردت قائله : لا احنا يدوب نروح نستلم المرتب قبل ما المحاسب يمشى

لمار :اااه ايه دا هو احنا هنقبض انهارده

سهام مشاكسه : اه ما المرتب مش من مستواكى بقى مش بتحطى فى دماغك يا ست هانم

لمار : يلا يا بت من خلينا نروح يلا

سهام : طب استنى خلاص اخر حاجه بعملها ونقبض ونروح بدرى بقى انهارده

لمار : تمام وانا هقوم اقفل الحاجه دى

وبعد انتهائهم من عملهم ذهبت لمار وسهام معا الى مكتب المحاسب واستلموا راتبهم

لمار بفرحه : الحمد لله احساس اول مرتب دا حلو اوى

سهام ضاحكه : اه منا كنت زيك فى اول مره برده بعد كده هتتعودى

لمار : اول حاجه فى كل حاجه بتبقى احلى حاجه