كيف اعيش معك ج١
بقلم حسناء محمود
عمر : لا يا سعد مش عايز حلول كفايه لحد كده
سعد بحزن : معلش ياصاحبى
قاطعه عمر : لا معلش ولا حاجه انا واخد ع كده
سعد : طب هى عرفت هتعمل ايه مع عمها ؟
عمر : لا متكلمناش فى حاجه واكمل بسخريه .. كنت ناوى لما اقولها تتجوزنى هعرفها الحل اللى وصلتله
سعد : وكده مش هنقولها ؟
عمر : لا ياسعد اكيد هقولها حتى لو مكنتش ليا انا وعدتها انى هحميها
وقال بألم .. لحد ما اوصلها لبيت جوزها
صاح سعد قائلا : بيت جوزها ايه انت مصدق نفسك انت تايه عن ابن عمك هو اسامه بتاع جواز اكيد هيضحك
قال عمر بهدوء : ممكن يكون بيحبها فعلا
سعد بعصبيه : انت هتجننى من امتى اسامه بتاع جواز عمر بقولك ايه لو لمار تستحق انك تحميها يبقى مفروض اولى تحميها من ابن عمك
وضع عمر يده ع راسه : انا صدعت من التفكير يا سعد هعمل ايه يعنى
سعد : ليها حل اكيد ليها حل هنفكر سوا …
——————————————————————————
سهام بصدمه : أسامه ! بتتكلمى جد ؟ مش دا ابن عمهم اللى حكتيلى عنه قبل كده ؟
لمار : ايوه هو انتى مالك مصدومه كده ؟
سهام : بصراحه فكرتك هتقولى عمر هو اللى بيحبك مش أسامه
لمار : يوووه يادى عمر اللى انتى مركزه معاه
سهام : خلاص بلاش عمر بس انتى هتعملى ايه مع اسامه .. انتى بتحبيه ؟
شردت لمار قليلا ثم قالت : مش عارفه
سهام : يعنى ايه مش عارفه ما هو يا بحبه يا مبحبوش
لمار : مش عارفه يا سهام ساعات بحس انى بحبه وساعات بيبقى عادى
سهام : ازاى ؟
لمار : يعنى ببقى فرحانه معاه وبحس انه بيحبنى بس ممكن لو قعدت مع حد تانى انساه عادى فاهمه ؟ مش فى بالى طول الوقت
سهام : مش عارفه يا لمار انا مش مرتحاله من اللى حكتيه عنه حساه بتاع بنات كده وانتى طيبه وهبله
لمار ضاحكه : طيبه وهبله ماشى ياستى متشكرين طب انتى رأيك ايه ؟
سهام : لمار انتى لو بتحبيه فعلا مش هتستنى رأى ولا هتقوليله افكر صدقينى دا مش حب وفى نفس الوقت هو فرصه كويسه ليكى
يعنى شاب وناجح ومستواه المادى كويس وبيحبك زى ما بيقول ممكن تجربى
لمار بتعجب : اجرب ازاى ؟ مش فاهمه قصدك
سهام : قصدى عشان تأمنى نفسك لازم كل حاجه بينكوا تبقى رسمى يعنى تقوليلوا اتقدملى
لمار : بس يتقدم لمين ؟ انتى عارفه ظروفى ولسه مش عارفه هعمل ايه مع عمى
سهام : خلاص شوفى هتعملى ايه مع عمك و لازم اللى بينكوا يبقى رسمى عشان تضمنى انه فعلا بيحبك
