أمنية ج2

قالت في توتر:

– يا خالد، افهمني.

– أنا خايفة.

– خايفة أبعد عن أهلي.

– خايفة أحس بالغربة هناك.

قال خالد:

– خايفة؟

– المفروض إنك مسافرة معايا.

– يعني مفيش مجال للخوف أصلًا.

– إلا لو كنتِ خايفة مني أنا شخصيًا، إنك تسافري معايا لوحدنا.

قالت مرتبكة:

– لا… وأنا هخاف منك ليه يا خالد؟ أنت جوزي.

قال:

– اسألي نفسك يا غادة…

– إيه اللي يخليكي تخافي تسافري مع جوزك؟

– إيه اللي يخليكي دايمًا تبعدي عنه، وتهربي منه؟

– إيه اللي يخليكي تتعمدي تعصيه، ومتسمعيش كلامه؟

ثم صاح بها:

– إيه اللي يخليكي خايفة تخلفي مني… وبتاخدي حبوب منع الحمل من ورايا؟

شهقت غادة، وقالت:

– إيه؟! أنت عرفت؟

قال بألم:

– للأسف… عرفت.

– عرفت الحاجة اللي كسرت آخر قشة نجاة في علاقتنا.

– عرفت إنك كنتِ بتشوفيني بتوجع قدامك، ومستمتعة بوجعي.

– عرفت إني كنت بخاف أجرحك، وبحافظ على مشاعرك.

– وإنتِ… بتموتيني في ضهري.

– عرفت إني اتجوزت إنسانة قاسية، قلبها عمره ما شاف الحب ولا عرفه.

– إنسانة مش شايفة غير نفسها وبس.

انفجرت غادة في البكاء، وقالت:

– لا… أنا مش قاسية.

– أنا خايفة.

– عارف يعني إيه خايفة؟

– أنا عشت طول عمري خايفة أحلم، لأني عارفة إن كل حلم هحلمه، وأتعلق بيه، هيموت قبل ما أحققه.

– خفت أجيب طفل، وأفرح بيه، وفي الآخر أبوه يسيبه، ويعيش من غير أب.

– عارف يعني إيه طفل يعيش يتيم، وأبوه عايش؟

– عارف يعني إيه نظرتي للولاد وهم كل يوم أبوهم بيوصلهم المدرسة، وأنا بروح لوحدي؟

– عارف يعني إيه طفل يشتاق لحضن أبوه، وميلقهوش؟

– يعني إيه طفل بينام كل يوم خايف، لأن أمانه في الدنيا مش موجود؟

– أيوه يا خالد…

– أنا خفت أخلف منك.

– عشان متجيش في يوم وتسيبني، وابني يشوف اللي أنا شوفته.

قال خالد في هدوء موجوع:

– وليه افترضتي إني ممكن أسيبك؟

– أنا عملت إيه خلاكي تفترضي إني أعمل فيكي وفي ابني كده؟

قالت غادة في انهيار:

– عشان كلكم كده.

– كل الرجالة كده.

– محدش فيكم بيفكر غير في نفسه.

– بتدوسوا على القلوب بجزمتكم، ومحدش بيفكر يبص وراه، يشوف ضحيته عاملة إيه.

– عشان كلكم أسهل حاجة عندكم الخداع، وتمثيل الحب، والكلام المعسول.

– ووقت الجد… إحنا اللي بنطلع فاهمين غلط.

– عارف؟

– أنا من ساعة ما اتجوزتك، وأنا مستنية اللحظة اللي تقولي فيها: “إنتِ كنتِ فاهمة علاقتنا غلط.”