جنتي على الأرض

***************************
It’s our body we can do what we want
…….It’s our body

كانت كلمات تلك الأغنيه تصدح في شقة تامر لتفيقه من نومه غاضبا.

صاح تامر و هو مازال مستلقيا في فراشه : وطي الزفت ده مش ع الصبح كمان.

جاءه الرد الأنثوي سريعا : صبح ايه …احنا داخلين ع العصر!

رد تامر غاضبا : و لما احنا داخلين عالعصر ..بتعملي ايه هنا.؟ مش المفروض تروحي تشوفي مصالحك !

ضحكت بدلال و قالت: ما أنا قاعده بسلي صاحبك .. وكله مصالح .

قال تامر متاففا : و ده عايز ايه ….

أزاح الأغطيه و دلف إلى الحمام …ليخرج لاحقا و يستقبل صديقه هيثم .

قال تامر : أهلا يا وحش… أخبارك..؟

قال هيثم : depressed يا مان و اوي كمان.

قال تامر ساخرا : و ده شعر و لا ايه ؟

قال هيثم : أنا بتكلم جد .

تنهد تامر و قال : انت مش ناوي تشيل البت دي من دماغك ؟

قال هيثم : مش قادر…. تفتكر ممكن اقابلها تاني؟

قال تامر بتهكم : تقابلها تاني …على أساس كنتو زمايل في كي جي تو وتوهتو من بعض..ده انت كنت ناوي و لا بلاش اكمل احسن تزعل.

قال هيثم مؤنبا : ما هو كله من الزفت اللي ادتهولي .

ضحك تامر و قال : يا راجل !

ثم أضاف : يابني ما البحر مليان سمك… اغطس و بلبص .

قال هيثم : بس زي ما قلت الحاجه اللي بنتعب عليها ليها طعم تاني خالص .

قال تامر : عارف أنا دلوقتي جتلي فكره إنما ايه .

قال هيثم : قول يا برنس .

قال تامر : بما إن سبق ليلة راس السنه فشل فشل ذريع و محدش يقدر يكمل …أنا بفكر أعمل حاجه في الفلانتاين و بالمره اكسب فيك ثواب .

سأل هيثم : ازاي يعني؟

قال تامر : مبدئيا كده لازم نجيب الواد زيكو .

قال هيثم : يابني ماتفهمني الاول ايه هي الفكره .

قال تامر : شوف هنعمل مسابقه اللي يلاقي السندريلا بتاعتك ياخد الجايزه و انت ياوحش مع نفسك ترسم و تخطط و توقعها زي ما تحب.

قال هيثم : عارف دي اكتر فكره سخيفه سمعتها في حياتي ..ازاي هيلاقوا واحده لا يعرفوا اسمها و لا شكلها .

قال تامر موضحا : الشكل انت هتوصفه للواد زيكو لحد ما يرسم صوره طبق الاصل عنها..و الاسم ساعتها مش مهم..و بعدين هي كانت شايله شنطه يعني معقول جدا تكون مسافره هنا للدراسه و كل متسابق و شطارته و غير جروبات الفيس لما الصوره تتشير اكيد حد هيعتر فيها .

قال هيثم : انا نفسي افهم العيال دول بيسمعوا كلامك و يشتركوا فالهبل ده ازاي؟