جنتي على الأرض
بقلم Fallen Angel
أطل برأسه و قال : مساء الخير يا جدي.
قال رفعت طه : أهلا أهلا ..تعال واقف عندك ليه .
قال إياد : ايه اللي مسهرك لحد دلوقتي ؟
قال رفعت طه : مش جيلي نوم .
سأل إياد بقلق : خير يا جدي ، في حاجه بتوجعك ؟
أشار رفعت طه إلى قلبه و قال : البنت نسرين تعبتلي قلبي اوي .
قال إياد : مش فاهم حضرتك.
قال رفعت طه مؤنبا : انت برده اللي مش فاهم ، ده إنت تفهمها و هي طايره.
تنهد إياد و قال : أنا شايف نسيبها شويه تشوف نتيجة قرارها .
قال رفعت طه : و انت يا هندسه ، مفيش حاجه جديده عندك .
قال إياد مازحاً : أوعى تعمل زي ماما و تقولي شفتلك عروسه حلوه .
ضحك رفعت طه و قال : الحقيقه ، آه فعلا أنا عندي ليك عروسه ممتازه .
ابتسم إياد و قال : لا بقى الحكايه محتاجه قعده ، بقى جدي اللي ليل نهار بيحكلنا عن قصة الحب العظيمه اللي بينه و بين جدتي ، غيَر أفكاره و عايزنا نتجوز صالونات.
قال رفعت طه معاتباً : الحق عليا ، و أنا اللي قلت إنت أولى من الواد كريم .
ضحك إياد و قال : كريم ، مش لما يعرف هو عايز يستقر فين الأول و لا هيتجوز و يشحططها معاه .
سأل رفعت طه بخبث : يشحطط مين ؟
تنهد إياد ، فلقد فهم مقصد جده من هذا السؤال ، و لكن أشياء كثيره تغيرت ، فما عاد اللغز المخفي المُعلن له وجود ، ووالدته فطِنت لذلك من فتره كبيره و ربما هذا عائد لطبيعتها العمليه ، فالجميع سواء إياد أو والدته أو جده ادركوا وجود مشاعر ما بين نسرين و كريم ، و بالنسبه لإياد كانت مشاعر نسرين واضحه للغايه ، أما كريم فقد ظن و لفتره كبيره أنه يُراعي صداقتهما و يحتفظ بإعلان مشاعره في اللحظه المناسبه، على الأقل عندما يقرر أين سيكون مستقبله ، و لكن ها هي نسرين خُطبت لرجل آخر ، و كريم …يبدو أن لديه الآن اهتمامات أخرى، ربما يوماً لم ينظر لنسرين سوى كأخت ، و ربما والدته كانت محقه منذ البدايه.
أجاب إياد : يعني أقصد اللي هيتجوزها .
قال رفعت طه : لا متشغلش بالك العروسه دي نقاوتي و أنا ليا نظره في الناس ، و دي اللي تشيلك على المره قبل الحلوه ، مش هيهمها شوية شحططه.
قال إياد متعجباً : ايه ده كله ، ده شكل حضرتك تعرفها كويس.
قال رفعت طه : أنا شفتها يمكن مرتين ، بس قدرت أعرف معدنها كويس .
قال إياد : الحقيقه يا جدي شوقتيني أعرف هي مين ؟
