احببتك ولكن ج2

الرواية حصرية لصفحة سحر الفيروز وموقع المحتوى # رواية أحببتك ولكن بقلم سهام صادق ## البــــــــــــــــارتــــــــــــ التاسع مضت أيام الرحلة سريعًا، وأنهى حسام أيضًا عمله وقد أوشك موعد انتهاء إقامتهم في العين السخنة. وفي الليلة التي كانت تسبق انتهاء مدة الرحلة... كان حسام يجلس شاردًا على الشاطئ، يسرح في تلك الصدف الغريبة التي تجمعه بـ هنا. كان يظن دائمًا أنه لن يحب مرة ثانية، وأنه حين سيتزوج، سيتزوج فقط لينفذ رغبة والده، حتى يريحه من إصراره الدائم على الزواج، وقوله له: " نفسي أفرح بيك وأشيل عيالك قبل ما أموت." تنهد حسام، وظل يفكر فيها، ثم ابتسم لنفسه وهو يقول في داخله بتمني: *نفسي أقابلك قبل ما أسافر.* وفجأة، وجدها تسير على الشاطئ، تلعب بقدميها في المياه وتضحك وتبتسم مثل الطفلة الصغيرة. ظهرت على وجهه ابتسامة لم يعرف سببها. هل لأن أمنيته تحققت؟ أم بسبب ما تفعله وهي تسير أمامه بتلك العفوية؟ ولكن في كلتا الحالتين، كانت الحقيقة واحدة... هو صار يحبها، بل يعشقها. ولا يعرف متى وكيف حدث ذلك، رغم أن لقاءاتهما كانت معدودة، وكل لقاء لا يتجاوز دقائق بسيطة. لكنها استطاعت أن تخطف عقله و قلبه منذ أن رآها. ظل حسام ينظر إليها من بعيد، فهو يعشق أن يرى تصرفاتها تلك، ويستمتع بتلقائيتها دون أن تشعر حتى بوجوده. ثم رآها تنظر إليه، وابتسمت له. في تلك اللحظة، قرر حسام أن يذهب إليها، لكنه توقف عندما رأى إحدى الفتيات تقترب منها، ثم ذهبت هنا معها. في تلك اللحظة، شعر حسام بخيبة أمل ثم زفر أنفاسه بضيق. عاد إلى غرفته استعدادًا لمغادرة الفندق صباحًا. وانتهت هذه الرحلة، وهي تحمل مشاعر غريبة لأبطالنا. هنا... كانت ترى حسام بالنسبة لها شخصًا عاديًا، لكنها أصبحت تُعجب به. فعندما تراه، تشعر بإحساس غريب لا تستطيع تفسيره، ولا ترغب في ذلك، فهي تخشى تفسيره. أما حسام... فهو في كل مرة يشعر بأنه وجد نصفه الآخر، نصفه الذي ملك قلبه وعقله. وفي أحد الأيام، جاء لحسام اتصال من إدارة كلية إدارة الأعمال، تطلب منه أن يمنح بعض الطلبة المتميزين فرصة لأخذ خبرة وفكرة عن سوق العمل. حسام، بعد أن أخبرهم أنه سيفكر في الأمر قليلًا، قال سريعًا: ـ أنا موافق على الأمر... ولكن بشرط. # البـــــــــــــــــارتــــــــــ العـــــاشـــــر قال لهم حسام إنه موافق على اقتراحهم، ولكن بشرط... وهو أنه سيذهب بنفسه لكي يختار الطلبة الذين سيمنحهم هذه الفرصة. فهو يريد أن يرى تفكير وشخصية من سيمنحهم هذه الفرصة، لأنه إذا أثبتوا نجاحهم، فسيقوم بتعيينهم بعد إنهاء دراستهم. رحبت إدارة الكلية بهذا الأمر كثيرًا، وشكرته على هذه الخدمة، ثم اتفقت معه على الموعد الذي سيأتي فيه لإجراء الاختيار. لم يكن شرط حسام هذا هو السبب الأساسي... فالسبب الأساسي أنه بتلك الطريقة سيقترب من محبوبته أكثر. ولا نغفل أيضًا أنه وافق لتشجيع هؤلاء الشباب ومنحهم فرصة حقيقية للتعرف على سوق العمل والاستفادة من خبراته. أعلنت الجامعة عن بدء الدورة التدريبية التي ستمنحها لطلابها، وأن الاختيار سيتوقف على حسب نظرة صاحب العمل وتقييمه لهم، دون أن يعرف الطلاب كيف سيتم الاختيار. قرأ الطلبة هذا الخبر وسُرّوا به كثيرًا، فهم الآن سيشعرون حقًا بقيمة ما يدرسونه، وسيحاول كل منهم أن يثبت نفسه أمام صاحب العمل. وبالتأكيد كانت هنا ورنا سعداء بذلك. فعلى الرغم من أن والد هنا لديه شركة خاصة بالتصميم الهندسي، فإنها تريد الاعتماد على نفسها مثل والدها، دون مساعدة أحد. فهي تريد أن تثبت ذاتها، وأن تصل إلى ما تريده بمجهودها. وجاء اليوم المحدد للاختيار. وبدأ العميد يعرف حسام مرة أخرى، وشكره على هذه المساعدة التي رحب بها في الحال عندما أقترحت عليه. كانت هنا تقف بين زملائها، وما إن وقع نظرها على حسام حتى شعرت بشيء غريب بداخلها يجتاحها و يوترها. نظرت إليه نظرة لا تعرف معناها، ولكن كل ما كان يدور بداخلها أنها كانت فخورة به كثيرًا. حتى إنها شعرت بالغيرة من زميلاتها الواقفات بجانبها في الصف، وكل واحدة منهن تقول: ـ يا بخت اللي هو متجوزها! صُدمت هنا من تلك الكلمة. *أيعقل أنه متزوج؟* ولكن عندما كانت تتحدث معه من قبل، لم يكن يرتدي دبلة، ولم يكن معه أحد. ثم قالت لنفسها سريعًا: *فوقي يا هنا، ومتعيشيش في أوهام إنتِ اللي هتتعبي منها في النهاية.* أبعدت تلك الأفكار عن رأسها، وانتبهت لما يقوله حسام، وظلت تركز لتعرف كيف سيتم الاختيار. **رنا:** ما شاء الله، عيني عليكي باردة ياختي! مركزة المرة دي... أيوه، ما هي فيها شغل طبعًا. ضحكت هنا على كلام صديقتها، وقالت: **هنا:** أركز مش عاجب، ما أركزش برضه مش عاجب... طب آه بقى، مش هركز! وأخرجت هاتفها وقالت: **هنا:** وأدي الموبايل هلعب فيه. وقبل أن تأخذ هاتفها، وكزتها رنا بذراعها. **هنا:** في إيه؟ بتضربي كده ليه؟ كانت رنا تنظر إليها محاولة أن تجعلها تنتبه لما يحدث أمامها، ولكن لا حياة لمن تنادي. **هنا:** مش هركز يا رنا، ركزي إنتِ وخليكي في حالك. ثم رفعت وجهها، لأنها شعرت أن هناك أمرًا ما. فصُدمت حين رأته أمامها... حاولت رنا تنبيهها أكثر من مرة، لكن هنا كانت غارقة في مجادلتها ولم تنتبه لوجوده. **رنا:** مش عمالة أخبطك وإنتِ زي الغبية! نظرت هنا إليها سريعًا، ثم قالت بصوت منخفض يكاد لا يُسمع: **هنا:** اسكتي خالص دلوقتي. نظر لها حسام بنظرة لم تستطع تفسيرها. قال حسام بجدية: **حسام:** ابتدي أسأل ولا لسه حضرتك مش مستعدة؟ تحدثت هنا مع نفسها في ارتباك: *هو ماله اتغير كده ليه وبقى شخص صارم؟* ثم عادت لتُحادث نفسها بسخرية: *أومال يعني خلاص، عشان قابلك كام مرة هيقعد يضحك معاكي ويقولك إزيك وسلامات بقى؟ ما تفوقي يا هنا.* نظر إليها حسام منتظرًا إجابة. **حسام:** يا آنسة... خليكي معايا لو سمحتي. هأ... مستعدة أسأل؟ هزت هنا رأسها له بالموافقة، وقالت: **هنا:** اتفضل حضرتك. وبالطبع، كانت هنا أولى الطالبات التي وقع عليها الاختيار، كما وقع الاختيار على رنا أيضًا. # البــــــــارتــــــــ الحــــــــادي عشــــــــر في صباح يوم جديد على أبطالنا....... **والد حسام (عبدالله):** حسام، استنى، عايزك في مكتبي قبل ما تروح الشركة. نظر عبدالله له وقال: **عبدالله:** إمتى هفرح بيك يا حسام؟ نفسي أشيل عيالك، أنا مصدقت ترجع من بره، ولا إنت عايز تسبني وتسافر تاني؟ نظر حسام إلى والده، وقد رأف بحاله، فهو منذ أن تلقى أول خذلان في الحب في حياته، قرر أن يترك البلد ويرحل، ويدفن نفسه وعقله في العمل فقط، وقد نجح في ذلك بالفعل.... قبل ظهور تلك الفتاة التي جعلته يشعر بمشاعر لم يذق طعمها منذ فترة. **حسام:** إن شاء الله يا بابا، لما ألاقي الإنسانة اللي عايزها أكيد هتجوزها، وإن شاء الله هيكون قريب. **عبدالله** وقد تهللت أساريره: ـ طيب مين؟ أنا أعرفها؟ ضحك حسام وقال: ـ أنا بقول لما ألاقي! والده، بعد أن أحس بخيبة أمل، قال له: ـ يبقى خلاص اسمع كلامي وشوف بنت عمك محمود، صدقني هتعجبك. ضحك حسام على طريقة والده وقال: ـ يا بابا، يعني أتجوز واحدة معرفهاش؟ وحتى لو كنت شوفتها صدفة وهي صغيرة مرة أو مرتين مع عمي محمود، ده هيخليني أفكر أتجوزها؟ يعني هتجوز طفلة؟ **والده:** طفلة إيه يا ابني؟ دي كبرت وبقت ما شاء الله عروسة...... قطب حسام حاحبيه للحظة وتساءل، هل من الممكن أن تكون هي ؟ لكنه نفض رأسه سريعاً من هذا الأمل الذي ربما يورطه مع والده و صديقه. رحل حسام إلى عمله، فمنذ أن جاء ووالده ترك له كل شيء، ويكتفي فقط بالمتابعة من حين لآخر وحضور الاجتماعات. نذهب إلى بطلتنا........ كانت هنا تحكي عن الموقف الذي حدث لها في الجامعة أمام والدها والدادة. **والدها:** مش عارف إمتى هتعقلي يا بنتي، بس بجد أنا لو مكان الشخص ده كنت قلت: إيه الهبلة دي؟ مش عارف هو اختارك على إيه! ضحكت هنا وهي تتصنع الحزن وقالت: ـ كده يا بابا؟ أخص عليك، حزينة! **والدها:** ما تيجي تتدربي عندي مع المهندسين، بدل ما تبوظي للراجل شغله، ويتصدم من العقول بتاعتكم.... إنتِ قولتيلي كان عايش فين بره؟ وقبل أن ترد هنا عليه، جاء اتصال لوالدها، فتركها ودخل إلى المكتب.... في الجامعة........ ـ إنتوا هتروحوا تبتدوا التدريب من بكرة، وطبعًا كل واحد فيكم وشطارته هو اللي يقدر يثبت كفاءته، عشان يحصل على وظيفة.... والفرصة في إيديكم، متضيعوهاش. **رنا:** أنا مبسوطة أوي يا هنا، مستر حسام ده شخصية بجد جميلة أوي. نظرت لها هنا وقد أحست بالغيرة قليلاً وسرعان ما كانت تلوم نفسها على مشاعرها الحمقاء. .... اليوم هو أول يوم لبدء هنا ورنا فترة التدريب، مع زملائهم. وقفت هنا تنتظر رنا كثيرًا، وقد تأخرت عليها، فاضطرت أن تذهب مع زملائها، فهي لا تعرف المكان، وهذا الأفضل لها، أن تذهب حتى تستطيع أن تصف المكان لرنا وتبرر تأخيرها. جاءت سكرتيرة حسام إليهم وقالت: ـ اتفضلوا يا شباب، مستر حسام في انتظاركم. وقبل أن تدخل هنا، جاءها اتصال من رنا. ردت هنا بسرعة لتصف لها المكان، وتستطيع أن تلحق بهم. **هنا:** كل ده يا رنا؟ إنتِ فين؟ أنا بتصل بيكي من بدري! ثم أتاها صوت آخر تعرف هذا الصوت جيدًا.... إنه صوت والدة رنا. **والدة رنا** بدموع: ـ هنا حبيبتي، رنا عملت حادثة وهي في المستشفى دلوقتي...... صُعقت هنا من هذا الخبر وبعد أن استوعبت الأمر تحركت حتى تذهب إلى المشفى، ولكن استوقفها صوت حسام: ـ إيه يا آنسة؟ مش المفروض إن السكرتيرة قالت إنكم تيجوا مكتبي؟ ولا مافيش عندك احترام؟ كادت أن تسقط دمعة من عينيها، ولكنها حجبت دموعها وتماسكت، فهي الآن في وضع لا تتحمل فيه أي كلمة من أحد. ثم قال بنبرة حادة: ـ إحنا مش بنلعب هنا، اتفضلي. صُدمت من تلك المعاملة ونظرت إليه بوجه حزين، فأحس حسام أنه صارم معها.... ثم قال لنفسه: *إنت شكلك هتضيعها من إيدك يا حسام.... إنت ما صدقت تقدر تقربها منك، هتضيع الفرصة؟ ده إنت كنت بتستنى الصدفة تجمعك بيها.... ولما بقت قدامك هتكرهها فيك!* خفض حسام صوته وقال: ـ اتفضلي يا آنسة. دخلت هنا، ولكن كانت تود أن تغادر سريعًا لصديقتها، ولكن كيف؟ فهي مضطرة أن تذهب معه، فهي الآن أمام مالك الشركة أيضًا. **هنا لنفسها:** ـ لما تنتهي المقابلة هستأذن منه وهمشي.... بس يا رب يوافق، شكله جاد أوي في شغله، أنا ابتديت أخاف منه. دخلت هنا وراءه. نظر لها بنظرة غريبة، ودت أن تعرف سبب هذه النظرة؟ أمسك حسام كشف الطلبة وبدأ يتفحصه، ثم نظر لهم.......... بقلم : سهام صادق. # البــــــــارتــــــــ الثــــــــانــــــــي عشــــــــر بعد أن مرر عينيه على كشف الأسماء، نظر لهم وقال: **حسام:** دلوقتي يا شباب، آنسة رزان هتوزعكم حسب أقسامكم. وطبعًا هيكون ليكم مشرفين، هما اللي هيتابعوا معاكم وهيفهموكم طبيعة الشغل والنظام، وأتمنى إنكم تكونوا عند حسن ظني. ثم أعطى كشف الأسماء لـ رزان وقال: ـ بس طبعًا قبل ما تخرجوا وتبتدوا تدريبكم، أحب أتعرف على أساميكم. بدأ الطلبة في تعريف أنفسهم، إلى أن جاء الدور على هنا.... لم تكن هنا منتبهة لهم، فكانت شاردة في صديقتها.... أيعقل أن يحدث لها شيء سىء؟ **هنا لنفسها:** ـ لااا.... ربنا يستر. **حسام:** من أولها سرحان يا آنسة؟ أظن إنك دلوقتي في شغل، والمفروض تكوني قد المسؤولية اللي اتكلفتي بيها، وحاولي تنتبهي لو سمحتي. **هنا:** أنا آسفة يا فندم. نظر لها حسام بتمعن وكان يود أن يعرف ما بها اليوم، ولماذا كل هذا الشرود.... ثم قال لها: ـ أظن إني اتعرفت على كل زمايلك، ومش فاضل غير إنتِ. **هنا:** اسمي هنا. **حسام** بلا مبالاة مقصودة حتى لا يفضح نفسه: ـ تمام. ثم قال لهم: ـ اتفضلوا يا شباب. همَّ الطلبة بالخروج، وظلت هنا واقفة لكي تطلب منه أن تستأذن، ولكنها انتظرت أن تغادر السكرتيرة لتطلب منه، حتى لا تشعر بالإحراج. **رزان (السكرتيرة):** ـ اتفضلي يا آنسة مع زمايلك. رفع حسام نظره من الأوراق ووجد هنا واقفة. **حسام:** اتفضلي إنتِ يا رزان دلوقتي. تضايقت رزان وخرجت بغضب، فكيف يخرجها هو من أجل تلك الفتاة التي لم يتعدَّ وجودها في الشركة سوى ساعة؟ **حسام:** أفندم يا آنسة هنا؟ **هنا:** ممكن أستأذن حضرتك النهارده إني أروح؟ نظر لها حسام بدهشة وقال: ـ ده أول يوم على فكرة ليكي، والمفروض إن فيه التزام، ومش معنى إننا كان في سابق معرفة إني يعني هتهاون معاكي.... آسف يا آنسة، اتفضلي مع زمايلك. نظرت له هنا بحزن، ثم قالت بضيق: ـ وأنا ما قولتش لحضرتك إنك توافق عشان تعرفني، وأظن إنك إنت اللي اخترتني في منحة التدريب، وإني ما طلبتش منك كده.... ولو على الكام مرة اللي اتقابلنا فيهم، فأظن إنهم انتهوا، وحضرتك دلوقتي مديري في الشغل.... ومتقلقش، مش هتعدى حدودي معاك. وشكرًا لحضرتك، مش عايزة الإذن مادام إنت شايف كده....... وهمت هنا بالخروج، ولكن توقفت مكانها من نبرة حسام الحادة وهو يقول: ـ استني عندك! أظن إني مخلصتش كلامي. ثم بدأ يتحدث بهدوء معها: ـ ممكن أعرف عايزة تمشي بدري ليه؟ **هنا:** مافيش داعي خلاص، أنا هروح ألحق زمايلي عشان أشوف مكان تدريبي. **حسام** بحدة: ـ أنا سألت سؤال والمفروض تردي. **هنا لنفسها:** ـ هو بيعاملني كده ليه؟ ياااااه، وأنا اللي كنت فاكرة إنه ممكن يعاملني بلطف.... بس أظن إني كنت غلطانة. **حسام:** هو في إيه؟ كل ما أكلمك تسرحي. بدأت الدموع تسقط من عينيها، فهي الآن لا تستطيع أن تتحمل الضغط عليها. **حسام** بقلق، ولكنه حاول أن يخفيه: ـ بتعيطي ليه دلوقتي؟ وهمَّ بالاقتراب منها......... ولكن قطع ذلك دخول..................... --- # البــــــــارتــــــــ الثــــــــالــــــــث عشــــــــر وهمَّ بالاقتراب منها، ولكن توقف عند دخول رزان. **رزان** بضيق وهي تنظر لهنا: ـ مستر حسام، الاجتماع هيبدأ بعد 10 دقايق. **حسام:** تمام يا رزان، اتفضلي إنتِ. خرجت رزان وهي تنظر لهنا بضيق. **هنا لنفسها:** ـ مالها دي مش طيقاني كده ليه؟ أظن إن التدريب ده هبدأ أكرهه.... يا رب يعدي على خير. **حسام:** على العموم، اتفضلي إنتِ دلوقتي روحي.... بس بكرة إن شاء الله أول ما تيجي تعدي عليا على طول. **هنا** باستغراب: ـ أعدي على حضرتك ليه؟ هو في حاجة؟ نظر لها حسام دون أن يتحدث، وهمَّ بالخروج. تابعته هنا، وخرجت هي الاخرى، ثم نظرت لها رزان بنظرة لا تعرف معناها.... وبعدها غادرت الشركة لتذهب للمشفى. ...... **هنا:** مالها رنا يا طنط؟ إيه اللي حصل لها؟ **والدة رنا** ببكاء: ـ مش عارفة يا بنتي، خرجت الصبح عشان تقابلك عشان التدريب، وبعد كده جالي تليفون إنها خبطتها عربية وفي المستشفى. **هنا:** طيب هي كويسة دلوقتي؟ متعرفيش عنها حاجة؟ والدة رنا كادت أن تتحدث، ولكنها رأت الطبيب يخرج من غرفة العمليات. ثم قال لهم: ـ هننقلها أوضة عادية دلوقتي، والحمد لله الحادثة عدت على خير.... بس رجليها وإيديها اتكسروا، وهتقعد في الجبس شهرين. **والدة رنا:** الحمد لله.... الحمد لله. ظلت هنا طوال اليوم في المشفى مع والدة رنا لكي تطمئن عليها، ثم أصرت والدة رنا عليها أن ترحل حتى لا يقلق عليها والدها. **هنا:** لا يا طنط، أنا هفضل معاها لحد ما تفوق، وهكلم بابا وأقوله. **والدة رنا:** لا يا حبيبتي، روحي وابقي تعالي الصبح. أحمد أخوها جاي وهيبات معايا، يلا يا حبيبتي. انصرفت هنا بعد إصرار من والدة رنا. **الدادة:** كل ده يا هنا؟ اتأخرتي كده ليه؟ "هنا" بعد أن قصت على الدادة كل ما حدث، قالت لها: ـ يا حبيبتي، ده إنتِ تعبتي أوي النهارده.... طيب رنا عاملة إيه دلوقتي؟ **هنا:** الحمد لله، جات سليمة. أنا هطلع أنام بقى عشان أعرف أصحى بدري وأروح لها. **الدادة:** طيب مش هتاكلي؟ هتنامي جعانة؟ **هنا:** ماليش نفس. ثم ذهبت هنا إلى غرفتها. جاء محمود من الشركة، وعلم بما حدث لرنا، وحزن كثيرًا. استيقظت هنا بتعب شديد، فما حدث لها أمس أرهقها كثيرًا. قامت لتصلي، ثم تذهب إلى رنا وتطمئن عليها أولاً.... وبعدها تذهب إلى الشركة. .... في الشركة........ كانت هنا تركض بذعر لكي لا تتأخر، ولكنها وصلت متأخرة ساعة عن الميعاد. ذهبت إلى مكان تدريبها وتناست أمر حسام تمامًا. **سها (زميلة هنا في الجامعة):** ـ اتأخرتي كده ليه يا بنتي؟ ده المشرف سجلك غياب.... وإنتِ عارفة ده مهم إزاي في التدريب. وبعد أن قصت هنا لها ما حدث مع رنا.... **سها:** يا حبيبتي يا رنا، طيب هي أخبارها إيه النهارده؟ وهتعمل إيه في التدريب؟ شكله هيروح عليها. **هنا** بحزن: ـ مش عارفة.... بس المفروض إدارة الجامعة تعمل لها إجازة شهرين. وكادت أن تستكمل كلامها لكن صوت المشرف قطع حديثهن. ـ إنتِ يا آنسة، ممكن أفهم إيه سبب التأخير ده كله؟ **هنا** بأسف: ـ آسفة يا فندم، مش هتتكرر تاني. المشرف : مافيش آسف، لازم مستر حسام يعرف لأن إنتِ مجيتيش امبارح، والنهارده متأخرة.... ده إهمال، والمفروض إن اسمك يتشال من التدريب، لأنك ما تستحقيهوش. نظرت له هنا بحزن، فهذه أول مرة أحد يعاملها بهذه الطريقة المهينة، وهي حتى لا تستطيع الرد، فالأمس حسام، واليوم هذا الشخص أيضًا.... **هنا لنفسها:** ـ هو إيه اللي بيحصلي ده؟ استغفر الله العظيم. المشرف : ـ اتفضلي يا آنسة قدامي لمستر حسام. ونستكمل الحلقة الجاية إن شاء الله بقلم سهام صادق #رواية أحببتك ولكن الرواية حصرية لصفحة سحر الفيروز وموقع المحتوى الرواية حصرية لصفحة سحر الفيروز و موقع المحتوى. بقلم سهام صادق رواية أحببتك ولكن البــــارتــــ الرابــــع عشـــــر ذهبت هنا معه دون أن تتكلم، تسير بجواره وتتزاحم الأسئلة داخل رأسها، ولا تعرف ماذا ينتظرها بالداخل. محمد: آنسة رزان، هو مستر حسام هنا؟ رزان، وهي تنظر إلى هنا بغلٍّ واضح: آه، جوه. ليه يا أستاذ محمد؟ ثم ألقت نظرة سريعة على هنا من أعلى إلى أسفل، وقالت بسخرية: رزان: هي الآنسة دي عملت حاجة؟ أصل باين عليها إنها مش وش تدريب والتزام، أظاهر إن مستر حسام هيلغي لها التدريب قريب. نظرت هنا إليها بدهشة من أنفعالها ، ورغم شعورها بالإهانة من كلماتها، لكنها فضّلت عدم الرد. محمد، وهو ينظر إلى هنا ثم إلى رزان: ممكن ندخل له؟ رزان: ثواني أبلغه. وبعد دقيقة خرجت رزان، ثم قالت ببرود: رزان: اتفضلوا. ثم نظرت إلى هنا بشماتة قبل أن تبتعد عن الباب. هنا في نفسها: إيه اللي بيحصل معايا ده؟ ومالها دي مش طايقاني، ولا محمد ده، وكمان منشوف مستر حسام ده هيقول إيه... هو ممكن حسام فعلًا يلغي ليا التدريب؟ ماهو أصل قال إن عنده الشغل شغل... ربنا يستر بقى. ..... حسام: ها يا أستاذ محمد، في حاجة؟ محمد: أيوه يا مستر حسام... وبدأ محمد يقص عليه ما حدث، من غياب هنا بالأمس وتأخيرها اليوم، موضحًا له ما حدث منذ وصولها. استمع حسام إليه بهدوء، ثم قال: حسام: طيب اتفضل أنت دلوقتي يا أستاذ محمد. خرج محمد، وأغلق الباب خلفه، ليعم الصمت الغرفة للحظات. رفع حسام عينيه نحو هنا، التي وقفت أمام مكتبه متوترة، ثم قال: حسام: اتفضلي اقعدي. جلست هنا أمامه، بينما ظل هو ينظر إليها بنظرة متفرسة ، ثم قال بعد أن أنطلقت من شفتيه زفرة طويلة: حسام: قبل ما هسألك... ليه مجتيش ليا أول ما وصلتي الشركة زي ما قولتلك إمبارح؟ إيه بقى السبب اللي خلاكي تمشي إمبارح، وإيه كمان سبب تأخيرك؟ وأظن من حقي أعرف... عشان أعرف ألتمس ليكي العذر. اتفضلي قولي. نظرت هنا إليه بتوتر، ثم قصت له ما حدث مع صديقتها، وأخبرته بسبب تأخيرها. أخذ حسام يستمع إليها دون مقاطعة، حتى انتهت من حديثها. وقفت هنا وهمّت بالانصراف، ثم قالت له بنبرة تحمل شيئًا من الانكسار: هنا: حضرتك عايز تلغي تدريبي، اتفضل ألغيه... أنا طبعًا مش هطلب منك إنك تلتمسلي العذر، ولا هقولك بعشم إنك متتخذش أي قرار ضدي، يعني مش هستخدم المعرفة اللي بينا في حاجة زي دي. وكادت أن تخرج، ولكن استوقفها صوت حسام. حسام: أنا مقولتلكيش اخرجي. توقفت هنا مكانها، والتفتت إليه. تغيرت نبرة حسام، وقال لها بحنان: حسام: صاحبتك عاملة إيه دلوقتي؟ استغربت هنا من سؤاله، ونظرت إليه للحظات، ثم قالت في نفسها: " شخصية غريبة... محدش يعرف هو بيفكر إزاي." انتبهت هنا لصوته وهو يقول: حسام: تاني سرحتي؟ هنا، بخجل: آسفة يا فندم... تمام الحمد لله. ممكن أخرج أنا بقى؟ نظر لها حسام وقال: حسام: اتفضلي. وقبل أن تخرج هنا من المكتب، التفتت له مرة أخرى، وكأنها ترددت للحظات قبل أن تسأله: هنا: هو حضرتك ممكن تلغي ليها التدريب بسبب اللي حصل؟ حسام: لأ، تدريبها هيقف لحد ما تقوم بالسلامة. ظهرت ابتسامة صغيرة على وجه هنا، فقد أسعدها ما فعله من أجل صديقتها، وقالت بامتنان: هنا: شكرًا أوووي بجد. بادلها حسام نفس الابتسامة، وقال: حسام: طيب يلا بقى على تدريبك، وياريت تبطلي سرحان. خرجت هنا من مكتبه، بينما ظل حسام واقفاً ومبتسماً ثم نفض رأسه سريعاً من أفكاره. طرقت رزان الباب ودخلت بعد خروج هنا.. رزان: مستر حسام، أستاذ هشام مستني بره. حسام: خليه يدخل... هشام: مين المزة الجامدة دي؟ إيه ده يا حسام، أنت بقيت تشغل ناس عندك حلوة كده؟ لا بجد، بقيت تختار... بس شكلها صغير. تغيرت ملامح حسام فورًا، وضغط على أسنانه بغيظ شديد بعد أن أدرك أنه يقصد "هنا" التي بالتأكيد رآها عند خروجها من غرفة مكتبه. حسام: نتلم شوية يا هشام. ها، كنت عايزني في إيه؟ ابتسم هشام بخبث، فقد لاحظ تغير وجه صديقه جيدًا، ثم قال: هشام: أظاهر إن في حاجة بتحصل من ورايا وأنا مش عارفها. واقترب منه، ثم أضاف بمكر: ـ بس هسيبك دلوقتي لغاية لما تيجي وتقولي... بس فعلًا البت جامدة. ألقى هشام كلامه الأخير بقصد حتى يتأكد من شكوكه، وبالفعل كانت تعبيرات وجه حسام كافية لتخبره بما أراد معرفته. .... مضت الأيام، ومرّ أسبوع على تدريب هنا. كانت تذهب إلى رنا كل يوم، وعندما أخبرتها بما قرره حسام من أجلها، سعدت رنا كثيرًا بذلك، وقررت أن تشكره حينما تتيح لها الفرصة. .... في منزل هنا... محمود: هنا يا حبيبتي، أنا مضطر أسافر شغل بره البلد لمدة شهرين. نظرت إليه هنا بصدمة وتساءلت. هنا: شهرين يا بابا؟ ليه؟ أنت عارف إني مقدرش أستغنى عنك المدة دي كلها. محمود: ولا أنا يا حبيبتي، بس مضطر بجد، ومش هينفع أبعت حد مكاني. هنا: طيب هتسافر فين يا بابا؟ محمود: ألمانيا. ... استيقظ محمود مبكرًا، فكانت طيارته عند الفجر. وقبل أن يغادر، وقف مع الدادة فاطمة، وكانت ملامحه تحمل قلقًا لم يستطع إخفاءه. الدادة: تروح وترجع بالسلامة يا محمود بيه. محمود: خلي بالك منها يا فاطمة... ولو حصلتلي حاجة، أوعي تسيبيها. الدادة، ببكاء: متقولش كده يا بيه، إن شاء الله هترجع بالسلامة... وتشوفها عروسة وتفرح بيها. محمود: يااااااااارب... أوعي تعرف يا فاطمة، مهما حصل، إني رايح أعمل عملية. أوعي. الدادة: حاضر. استيقظت هنا عند سماع صوت سيارة والدها وهي تتحرك من الفيلا. خرجت من غرفتها مسرعة، تبحث عنه بعينيها، ثم سألت الدادة: هنا: هو بابا سافر يا دادة؟ الدادة: آه يا حبيبتي. هنا، بحزن: من غير ما يخليني أوصله وأسلم عليه؟ الدادة: مرضيش يصحيكي يا حبيبتي. شعرت هنا فجأة بأنقباضة في قلبها لا تعلم سببها وقالت بنبرة صوت مرتجفة: ـ ربنا يرجعه بالسلامة. رمقتها الدادة فاطمة بنظرة إشفاق، وهي تحاول أن تخفي عنها الحقيقة. فماذا سيحدث لها إذا أصاب والدها مكروه، ولم تنجح العملية؟ الدادة: ياااااارب يا حبيبتي. .... ذهبت هنا إلى مقر تدريبها. محمد "المشرف": دلوقتي يا شباب، مستر حسام طلب مني إنكم تعملوا إدارة للمشروع ده. وبدء محمد يشرح لهم عن المشروع وكيف سيتم عمل جدولة له، ثم قال: ـ وروني إبداعكم بقى يا شباب. اجتهدت هنا كثيرًا في عمل جدولة وإدارة للمشروع، فهي تريد أن تثبت أجتهادها وجديتها بالعمل ، حتى لا تظل فكرتهما عنها بأنها فتاة مستهترة. ومع مرور الأيام، كانت تعمل بجد وإصرار، وكلما شعرت بالتعب تذكرت كلمات رزان المسمومة ونظراتها إليها، فقررت أن تثبت للجميع أنها تستحق هذه فرصة التدريب. وجاء يوم تسليم جدولة المشروع، حتى يُعرض على حسام. وبعد مرور يومين، دخل عليهم السيد محمد ، ليبلغهم بمن كان أفضل صاحب جدولة للمشروع. بقلم سهام صادق رواية أحببتك ولكن --- ## البــــارتــــ الخـــامـــس عشر محمد بفخر: هنا هي أحسن جدولة عمل. لم تصدق "هنا" ما تسمعه في البداية، وظلت للحظات تنظر إليه بدهشة ثم ارتسمت على شفتيها ابتسامة واسعة ... فهي استطاعت أن تثبت نفسها. مرت أيام عديدة بعد هذا اليوم، وكان حسام دائمًا يحاول التقرب منها دون أن يلفت أنتباه أحد ، حتى لا يسبب لها مشاكل، فهو يريد أن يحافظ عليها. ..... ولنذهب لمكان آخر... هشام، وهو صديق حسام المقرب: ياااه يا شاهنده، رجعتي إمتى من أمريكا؟ شاهنده، حبيبة حسام السابقة وأول من جرحته عندما تركته وتزوجت من غيره: بعد ما اتطلقت... قولي حسام أخباره إيه؟ سمعت من رزان إنه رجع من سويسرا. هشام بضيق: سيبي حسام في حاله، كفاية الوجع اللي سببتيهوله. شاهنده بتصنع الحزن: بس أنا لسه بحبه. هشام: متكدبيش عليا ولا على نفسك يا شاهنده. إنتِ مبتحبيش غير نفسك ومصلحتك، وعشان أريحك... حسام بدأ حياة جديدة. سيبيه يرجع يحب تاني. شاهنده بدهشة: بيحب؟ طب بيحب مين؟ هشام: معرفش، وزي ما قلتلك، سيبيه في حاله. شاهنده، وهي تتظاهر بأنها تتمنى له السعادة: ربنا يسعده. .... هنا: هانت يا رنا، خلاص كلها 15 يوم، وتشِيلي الجبس وتبتدي التدريب. رنا، بتمني: يا رب... ثم قالت لها: وعمو محمود هييجي إمتى؟ هنا: كلمته إمبارح وقالي شهر وراجع. رنا: يرجع بالسلامة يا رب. هنا: ياااااارب... أنا همشي بقى يا حبيبتي. رنا: سلام. .................. حسام: بجد هايلة يا هنا، وتفكيرك كويس جدًا. هنا: شكرًا يا مستر حسام. حسام: أنا مش بجملك، دي الحقيقة. وقبل أن تغادر، ناداها: حسام: هنا... التفتت له هنا وقالت: هنا: أفندم؟ ابتسم حسام، وكأنه كان على وشك قول شيء، لكنه تراجع في اللحظة الأخيرة. حسام: لأ... اتفضلي خلاص. خرجت هنا من غرفة مكتبه لتنفذ ما طلبه منها...وبعد أن أُغلقت الباب خلفها، تنهد حسام بضيق وقال في نفسه: حسام: غبي يا حسام فعلًا... كنت قولها بحبك. هتستنى لغاية إمتى؟ أنت بتحبها من أول مرة شوفتها فيها، ولحد دلوقتي مش عارف تصارحها. صمت لحظة، ثم أضاف: ـ غبي... خايف متكونش بتحبني، بس نظرات عينيها بتقول غير كده. ثم طرقت رزان الباب. رزان: في مقابلة خاصة لحضرتك. حسام، بتعجب: مين؟ رزان، بابتسامة: مدام شاهنده. عندما سمع حسام اسمها، تجمدت ملامح وجهه وكأن الماضي الذي ظن أنه انتهى عاد فجأة أمام عينيه. حسام: خليها تتفضل يا رزان. ثم غمغم بضيق: ـ إيه اللي خلاكي تظهري تاني يا شاهنده وجايبك شركتي؟ دخلت شاهنده، وكانت ترتدي ملابس تظهر أكثر مما تخفي. شاهنده: حسام حبيبي، بجد وحشتني. واقتربت منه حتى تعانقه وتحتضنه لكن تراجع إلى الوراء سريعاً وقال ببرود: ـ مدام شاهنده، لو سمحتي قولي اللي عايزاه واتفضلي. شاهنده، بتصنع الحزن: هي دي المعاملة يا حسام؟ أنت بقيت قاسي أوي... بجد اتغيرت. ضحك حسام بسخرية من طريقة كلامها، وقال: ـ بنتعلم منك الصراحة... ومفيش حاجة بتفضل على حالها. كادت شاهنده أن ترد عليه وتتلون بنعومتها المخادعة، قطعها حسام وقال: حسام: اتفضلي لو سمحتي، مش فاضي. في تلك اللحظة كانت هنا واقفة بالخارج تنتظر، لكي تدخل له وتقدم بعض الأوراق التي طلبها منها. رأت شاهنده وهي تخرج، فاشمأزت كثيرًا من ملابسها، كما أنها أحست بالغيرة. وظلت تفكر في سبب وجودها معه.... دخلت هنا غرفة مكتبه، وكان حسام في قمة غضبه، فقال: ـ سيبي الورق لو سمحتي يا هنا، واتفضلي. تركت هنا له الأوراق وغادرت مندهشة من تصرفه ... ..... بعد مرور يومين... في أحد النوادي الراقية. شاهنده: عايزة أعرف مين اللي حسام بيحبها يا رزان. لازم تعرفيهالي، إنتِ سكرتيرته وأقرب حد له. رزان، بتفكير: وإنتِ إيه اللي خلاكي تشكي بكده؟ شاهنده: هشام وقع بلسانه وقالي... صمتت رزان قليلًا، وهي شاردة تفكر، ثم قالت: رزان: يبقى إنتِ بقى! وأنا أقول إيه الاهتمام ده؟ وفاكريني هبلة؟ ثم نظرت إليها وقالت: رزان: هقولك مين... واتصرفي بقى. ... مرت الأيام على أبطالنا... حسام يود أن يصارح هنا بحبه، وهنا تخفي مشاعرها تجاهه، ولكن عندما تقف أمامه تفضحها عيناها، فلا تستطيع أن تكابر أمامه. أما رزان بدأت تتقرب كثيرًا من هنا، حتى إن هنا صدقت أنها تحبها، وأن معاملتها السابقة كانت سوء فهم لا أكثر. وفي يوم، جاءت رزان إلى هنا وعزمتها على حفلة ستقيمها إحدى صديقاتها، وأنها لا تحب أن تذهب بمفردها. رفضت هنا بالبداية ، فهي لا تألف هذه الأجواء، ولكن منذ أن سافر والدها، وهي تشعر بالاختناق، وتقضي أغلب وقتها في المنزل. لذلك وافقت، رغم أنها لم تكن مرتاحة للفكرة. حتى إنها في آخر لحظة كادت أن ترفض، ولكن رزان قالت لها بخبث: رزان: مستر حسام جاي على فكرة الحفلة... حتى لما قلتله إنك جاية فرح جدًا. تعالي بقى يا هنا. عندما سمعت هنا أنه سيأتي، وكان سعيدًا لمعرفته أنها ستحضر الحفل، شعرت بالسعادة وقالت بتوتر: هنا: إنتِ عارفة يا رزان إني جاية عشانك، وكمان أنا مالي بمستر حسام، أو إنه يكون فرحان بوجودي أو لأ. رزان، بخبث: عارفة طبعًا يا حبيبتي... هو أنا برضه هفهمك غلط يا هنونتي؟ بقلم سهام صادق. رواية أحببتك ولكن. # البـــــارتــــ الســــادس عشــــر وجاء يوم الحفلة... الدادة: هتروحي يا حبيبتي؟ هنا: آه يا دادة، أنا مخنوقة وحابة أروح، وبابا بتصل بيه مش بيرد... لو اتصل ابقي قوليله. الدادة: ماشي يا حبيبتي، ربنا يحفظك. ذهبت هنا إلى الحفلة، وهي لا تعلم ما الذي ينتظرها هناك. كانت هنا في أجمل صورة ببساطتها و رقتها وفور دخولها الحفل، صُدمت من المناظر التي رأتها أمامها، فقد كان الجميع في قمة التحرر، وأرتداء الملابس المقززة. وبالرغم من أن هنا من طبقة عالية المستوى، إلا أنها تعرف حدودها جيدًا، ولا تربط بين الرقي وبين ذلك النوع من التحرر الذي كانت تراه أمامها. نظرت حولها بضيق، ثم التفتت إلى رزان التي اقتربت منها عند رؤيتها وقالت: هنا: لا يا رزان، أنا هروح. دي حفلة دي يا بنتي؟ وإيه صاحبتك اللي عملاه؟ أنا همشي. رزان بتوسل: عشان خاطري يا هنا، ومتخافيش، إحنا مالنا بيهم. هنقعد في مكان هادي جدًا. ثم ضحكت وقالت: رزان: وآه نتفرج. هنا باشمئزاز: نتفرج على إيه؟ على دول؟ رزان: ساعة بس يا هنا، وهنروح، بس عشان صاحبتي متزعلش. نظرت هنا حولها مرة أخرى، ثم تنهدت بضيق وقالت: ـ طيب شوفي لنا مكان بعيد عن الدوشة دي. جلست الفتاتان في مكان بعيد قليلاً عن الصخب، وكانت هنا شاردة وتلوم نفسها على قدومها. كانت تنظر أمامها حتى أفاقت من أفكارها على صوت رزان وهي تقول: رزان: مستر حسام... آه. التفتت هنا بسرعة إلى المكان الذي تنظر إليه رزان، وما إن وقعت عيناها على حسام، حتى تحجرت مقلتاها لوهلة. رأت الفتاة التي سبق أن رأتها في الشركة، وهي تقترب من حسام وتقبله على خده. شعرت هنا بوخزة غيرة في قلبها، وحاولت أن تخفى ضيقها، وهي تقول في نفسها بغيظ: "يا سيدي يا سيدي!" رزان، بخبث: عارفة اللي سلمت دي تبقى مين؟ نظرت إليها هنا وتظاهرت بعدم أهتمامها ، فقالت رزان: ـ دي شاهنده... حبيبة مستر حسام. حب أربع سنين في الجامعة. بجد اللي كان يشوفهم يقول إن قصة حبهم هتنتهي بالجواز لكن النصيب بس أظاهر دلوقتي هيرجعوا لبعض ، وفعلاً تنتهي قصتهم بالجواز السعيد. ثم أضافت وهي تتصنع الإعجاب: ـ آه يا بختها بـ مستر حسام... بجد لايقين على بعض. كانت كل كلمة تنزل على قلب هنا كأنها طعنه، وبدأت ملامحها تتغير تدريجيًا، بينما ظلت رزان تراقبها بطرف عينيها. تطلعت رزان بخبث إلى هنا التي كانت شاردة في عالم آخر بعد سماعها تلك القصة. هنا بصوت مهزوز: ربنا يسعدهم... مش يلا بقى نمشي؟ رزان في نفسها: نمشي مين يا حلوة؟ أومال الخطة هتتنفذ إزاي؟ ثم قالت لها: رزان: شوية بس يا هنا، معلشي عشان خاطري. ثم أردفت: رزان: ثواني وراجعة. بعد أن ذهبت رزان، أخذت هنا تحبس دموعها بكل ما لديها من قوة، حتى لا يراها أحد. وشعرت أنها لا شيء في حياة حسام وأن أحساسها كان مجرد وهم...؛ فهو يحب أخرى. بدأت تحاول إقناع نفسها بذلك، رغم أن قلبها كان يرفض تصديق ما تسمعه. هنا في نفسها: ياااه يا هنا... طلعتي غبية. كنتِ فاكرة إيه؟! ثم مسحت دمعة فلتت من مقلتيها، وقالت لنفسها: هنا: اتعلقتي بيه ليه؟ من البداية كنتِ عارفة إن الحب وجع. وقررت الذهاب، ولكن استوقفها صوت أحدهم. أحد العاملين: يا آنسة... ممكن لحظة؟ مش إنتِ اللي كنتي جاية مع آنسة رزان؟ هنا، بقلق: خير؟ العامل: هي تعبت شوية... وجوه في الفيلا، وعايزاكي عشان تاخديها وتروحوا. ترددت هنا للحظات، ثم قالت: هنا: طيب. في تلك الأثناء، كان حسام يرتشف آخر رشفة من كوب العصير الذي قدمته له شاهنده. ثم قال بحدة: حسام: دي آخر مرة هقبل فيها عزومتك يا شاهنده، فبلاش تلحي عليا تاني. شاهنده بنعومة: كده يا حسام؟ بقيت تكره أي مكان يجمعنا؟نسيت حبنا؟ حسام بنبرة صوت متهكمة: حبنا يا شاهنده انتهى من زمان... من ساعت ما سافرتِ واتجوزتي. وأظن إنه مفيش داعي نفتكر حاجات قديمة. شاهنده، وهي تمثل البكاء: ـ إنت اللي نهيت كل حاجة، حتى مرضتش تقابلني لما جيتلك سويسرا. حسام: خلاص يا شاهنده... صدقيني كل اللي بينا انتهى، ومعنديش ذرة حب ليكي. كل حاجة انتهت... وانسي. شاهنده، وهي تمثل التعب فجأة: شاهنده: آه... ساعدني يا حسام، بليز... مش قادرة. انتفض حسام من مكانه، ونظر إليها بقلق: حسام: مالك يا شاهنده؟ كانت هنا تهم بالدخول إلى المكان الذي أشار لها العامل بأن رزان فيه. وبالفعل دخلت، ولكنها سمعت صوت حسام وهو يقول: حسام: اسندي عليا. وكان الاثنان يهمان بالصعود إلى الأعلى. توقفت هنا مكانها، وشعرت بالصدمة وهي تراهما أمامها. هنا في نفسها: هما رايحين فين؟ ثم تملكها الفضول: ـ أنا لازم أطلع أشوفهم؟ وسرعان ما ردت على نفسها: ـ إيه الفضول ده يا بنتي؟ هو بيحبها وهي بتحبه، خلاص اطلعي من حياتهم. إنتِ اللي اتوهمتي حاجات غلط. ثم قالت بحيرة: ـ بس إزاي كان وهم؟ ظلت لبعض الوقت مترددة، ثم قررت الصعود ورائهم. كان حسام يشعر بشيء غريب يسري في دمائه، ولم يكن يعرف لماذا يشعر بهذا الثقل والدوار. اقتربت منه شاهنده وقالت: شاهنده: أخدت الدوا وأنا بقيت كده أحسن... ميرسي يا حسام. ثم اقتربت منه بدلال، وبدأت في تقبيله. كان حسام مستسلم معها تمامًا ، وفي تلك اللحظة كانت هنا تنظر إليهما من فتحة الباب. تساقطت دموعها وكتمت صوت بكائها ، ولم تتحمل رؤية ما تراه. خرجت من الفيلا وهي تجري، ودموعها تنساب مثل الشلال على خديها ، وصورتهما لا تفارق عقلها. رأتها رزان وهي تخرج بسرعة، وعلمت أن خطتها مع شاهندة نجحت، فابتسمت بشماتة عليها. وفي الداخل، أفاق حسام مما يفعله، وكأنه استعاد وعيه قليلاً. نظر إلى شاهنده بغضب، ثم صفعها، وخرج مسرعًا. .... دخلت هنا منزلها منهارة. الدادة: إنتِ جيتي يا حبيبتي؟ حاولت هنا أن تتمالك نفسها، ومسحت دموعها سريعًا قبل أن تراها الدادة. هنا: آه يا دادة. ثم قالت بحسرة، وهي تخفي ما بداخلها: هنا: والحفلة كانت جميلة أوي... أجمل حفلة حضرتها. الدادة: طيب يا حبيبتي، تصبحي على خير. هنا: وإنتِ من أهله. صعدت هنا إلى غرفتها، وما إن أغلقت الباب خلفها حتى عادت إلى بكائها. جلست على فراشها، وظلت تبكي وهي تتذكر قربهما. أيعقل أن كل ما شعرت به تجاهه كان وهمًا؟ نعم... أحببتك. كنت أول حب في حياتي. تعلقت بك كثيرًا، ورسمتك في خيالي بصورة جميلة... بس يا خسارة، طلعت الصورة فوتوشوب. ثم قالت بصوت باكٍ: هنا: بكرهك يا حسام... بكرهك. ... في صباح يوم جديد، كان مليئًا بالمشاعر المختلفة على أبطالنا. فحسام كان لا يطيق نفسه بسبب ما فعله بالأمس. كيف يفعل ذلك؟ كيف استسلم لها؟ ظل يفكر فيما حدث، ثم تنهد وقال: حسام: أنا إزاي أعمل كده؟ إزاي؟ ثم تذكر هنا، وظهرت على وجهه ابتسامة حزينة، قبل أن يتجه إلى عمله. أما هنا، فكانت تحاول أن تهرب بالنوم حتى لا تتذكر ما حدث بالأمس. ولكن هيهات... فالمشهد قد طُبع في ذاكرتها، مثلما طُبعت أوقات لقائها به وسعادتها برؤيته. تنهدت بحزن، وقررت عدم الذهاب اليوم إلى الشركة. فهي لا تتحمل رؤيته. ... ذهب حسام إلى الشركه، وقرر أنه سيصارح هنا بحبه. طلب من رزان أن تستدعي هنا، ولكنها جاءت وأخبرته أنها لم تأتِ اليوم. حسام، بغضب ممزوج بالقلق: حسام: غابت من غير ما تتصل وتقول؟ إيه الاستهتار ده؟ هي مش عارفة إنها في تدريب؟ والمفروض مفيش غياب. رزان، بابتسامة خبيثة وهي تتذكر ما حدث بالأمس: رزان: يا فندم، وفيها إيه يعني؟ ممكن تكون تعبانة أو أي حاجة. حسام بغضب: اتفضلي طيب إنتِ يا رزان. خرجت رزان، وتنهد حسام بقلق، ثم قال في نفسه: حسام: يا ترى مجتيش ليه؟ ..... رنا: إيه يا هنا؟ مجتيش ليا ليه النهارده بعد ما خلصتي تدريب؟ ولا حتى جيتي حكيتيلي عن الحفلة... ها بقى يا عم، كان إيه أخبارها؟ هنا، بحزن: كانت جميلة أوي يا رنا... فوق ما تتصوري. ثم ابتسمت ابتسامة حزينة. رنا، ولم تشعر بشيء: ـ ماشي يا حبيبتي. صحيح أنا خلاص كلها أسبوع وهبدأ التدريب معاكي، ونبقى مع بعض بقى. هنا بفرحة حقيقية: هنا: بجد يا رنا؟ رنا: يا سلام على الحب! مكنتش أعرف إن وجودي كده بيفرحك. ثم قالت بدعابة: ـ هو الواحد لازم يتخبط ويتبهدل عشان يعرفه قيمته؟ هنا: آه يا ستي، عرفنا قيمتك. ثم قالت لها: هنا: أنا هقفل عشان في مكالمة جايالي على الـwaiting. رنا: الله يسهل لك يا عم. هنا: اتلمي بقى. ردت هنا على الرقم وقالت: هنا: السلام عليكم. حسام: وعليكم السلام... ممكن أعرف مجتيش ليه النهارده؟ هنا بعصبية: مين معايا؟ حسام: أنا حسام يا هنا. هنا، بجدية: كنت تعبانة شوية يا فندم، وبكره هاجي إن شاء الله. ثم أضافت بسرعة: أنا مضطرة أقفل، عشان مينفعش أكلم حضرتك أكتر من كده. وأنهت المكالمة دون أن تسمع رده. ثم ألقت هاتفها على الفراش، وقالت بغضب وألم: ـ اطلع بره بقى من حياتي يا حسام... إنت إيه؟ بجح؟ تسهر مع واحدة إمبارح، والنهارده بتتصل بغيرها! ثم مسحت دموعها بعصبية: إنت خاين وحقير! تنهدت، وقامت لتصلي، لتدعو ربها أن يقف معها ويساعدها على تخطي هذه المحنة. وظلت تقول في دعائها: هنا: أنا عارفة إني خُنت العهد... إني أحافظ على قلبي للإنسان اللي هيكون من نصيبي. سامحني يا رب. أما حسام، فتنهد بحزن، ثم قال: حسام: إيه اللي عملته ده ... وظل يفكر في الأمر، ثم عزم على مصارحتها بحبه في أقرب لقاء بينهما، فهو لا يستطيع أن يتحمل بعدها أكثر. ....... ذهبت إلى إدارة الجامعة لتطلب منهم أن تلغي تدريبها، لكي تنتبه على دراستها. ولكنهم أخبروها أن التدريب جزء أساسي من دراستها، ولا بد أن تحصل عليه. ذهبت هنا على مضض، ودخلت الشركة التي باتت تكرهها كثيرًا. بقلم سهام صادق. #رواية أحببتك ولكن لاستكمال الحلقات تابع صفحة سحر الفيروز لأنها حصرية على الصفحة