عرفته واحببته وزوجته في يوم واحد

روني أول ما البنت أتزمت في حضن وليد سابت أيده… ووقفت تتابع المشهد… وخاصة إن البنت لافة ايديها حوالين رقبة وليد وهي بتتكلم…
ووليد كان واقف مصدوم بدون أى رد فعل… وأول ما إستوعب الوضع شدها وبعدها عنه وزعقلها : لو سمحتى يا انسة سهى ما يصحش كده ابدًا… عيب قوي بنت زيك تعمل كده… إنتى بنت ناس محترمين…
فقالت بدلع: إيه يا لودى ما تحبكهاش… إحنا مش في حكم المخطوبين…
فبصت روني علي وليد بصدمة وذهول ومنتظرة تشوف هيرد يقول إيه…
اما وليد رجع خطوتين لورا وقال : إيه الانتى قلتيه ده؟ مين قال الكلام الفارغ ده
فردت سهي باستنكار وقالت : إيه يا لودى؟ هو إحنا مش بنحب بعض وكل النادي عارف…
فقال وليد بغضب : إيه بنحب بعض دى؟ والكل عارف…
إيه البلاوى دى؟… وإيه لودى دى كمان؟… إنتى فكرانى وحدة صاحبتك وهتهزري معايا… ده إيه القرف ده؟…
اولًا : اسمى كابتن وليد والكلام ده ليكى ولكل البنات اللي في النادي…
(وهو قال كده عشان كانت جاية ومعاها صحباتها )
ثانيا : أنا لا عمري وعدتك بحاجة ولا أصلا فكرت في الجواز منك أو من آي بنت من النادي…. ولا في يوم وقفت واحدة وقلتلها حتي صباح الخير..
إلا لو هي اللي وقفتني لأي سبب… والموضوع ده مش بياخد دقيقتين…
وده برضوا بيكون ذوقيا منى مش أكتر عشان ما احرجهاش…
مع انى مش بحترم اى بنت تيجى تقف تكلمني أو تهزر معايا…
فياريت كل واحدة تتلم وتحترم البيت اللي هي خارجة منه…
ومسك أيد روني وقال : عن إذنكم…
وأول ما اتحركوا كام خطوة صرخت سهي بقهر : هي دي الفلاحة اللي رحت جبتها من البلد عشان تجوزها… يعني دي اللي هتشرف وليد الجاسر وتقف ورآه في الحفلات والمجتمع الراقى يا كابتن
فبصلها وليد بإستخفاف وقال : ايوه بالظبط دى اللي هتشرفني… بدليل إني جبتها قدام الكل وقلت دى مراتي… عارفة ليه؟
فبصتله سهي بغضب وزمت شفايفها ومردتش… فكمل وليد وقال : لأن دي اللي هتصونى وتحافظ عليا… دى اللي هنام وواثق انها بتتقى الله فيا… هي اللي مش هتكسف قدام أولادي لما أشاور عليها وأقول دي والدتكم… دى اللي ملت عنيا وقلبى ودنيتى… وده الفرق بينكم وبينها…. عشان كده اخترتها هي…
فردت سهي وقالت : كلامك ده هتندم عليه يا كابتن… وبكرة تشوف مش ههنيك بيها وهرجعها للفلاحين اللي جات منهم…
فرد وليد بغضب وقال : لو فيكى خير ورينى هتعملى إيه… وساعتها
هتعرفي وليد الجاسر ممكن يعمل إيه…