روايه رجل ج١

…………………………………………………………….

ياسمين كانت فى اوضتها بتلبس عشان تقابل العريس
شويه والباب خبط : ادخل
عادل : ياسمين انتى خلصتى
ياسمين : اه يابابا
عادل : طيب تعالى افتحى للناس عشان انا وماما لسه مخلصناش
ياسمين : ايه لا طبعا مش هفتح لحد … ازاى يعنى هتكسف
عادل : مش وقت كسوف الناس بترن على الباب وانا لسه مخلصتش لبس .. ياله بقى ميصحش الناس ع الباب
ياسمين طلعت وهى مضرره ومكسوفه كده
وقفت وراء الباب وهى بتاخد نفسها وخضوضه اخدت نفس كبير وفتحت الباب وفضلت وقفه وهى متنحه
حاتم كان واقف قدامها وماسك بوكيه ورد كبير ولابس بدله وشكله زى القمر
ياسمين بخضه وارتباك : انت … جيت هنا ازاى …
حاتم : طيب مش تقوليلى ادخل … انتم بتقبلو ضيوفكم ع الباب كده
ياسمين : حاتم مش وقت هزار … امشى دلوقتى بابا لو شافك هتعملى مشكله
حاتم خطى خطوه ودخل جواه الشقه : قولى لعمو انى جيت فالميعاد
ياسمين وهى مش مستوعبه : ميعاد … هو انت ؟؟
حاتم : انا العريس … ينفع ادخل بقى … ولا لسه هتحققى معايا
ياسمين : انا مش فاهمه حاجه
عادل من وراها وبابتسامه : طيب دخليه الاول وبعدين افهمى .. يصح برده اللى انتى بتعمليه ده
حاتم : اهلا بحضرتك
عادل وهو بيسلم عليه : اهلا بيك … اتفضل ادخل
حاتم بكسوف : الورده ده لانسه ياسمين … ينفع ادهولها
عادل بابتسامه : ينفع
حاتم بص لياسمين : اتفضلى
ياسمين : شكرا
وخدت الاورد فى حضنها وهى برده لسه مش مستوعبه اللى بيحصل
دخلو كلهم الصالون وقاعدووجات مامت ياسمين وفضلو ساكتين شويه
ياسمين : هو ينفع افهم بقى فى ايه
عادل : بصى يا ستى حاتم جالى الشغل وحكالى احساسه بيكى وكلامه معاكى وطلب انه يحدد ميعاد عشان عاوز يتكلم معايا بس قدامك وبس كده … ده اللى انا اعرفه
عادل : اتفضل يا حاتم اتكلم انا سامعك
حاتم بارتباك : مش عارف ابداء ازاى … بص ياعمى وبصراحه انا معجب بياسمين زى محضرتك عارف وزى مهى كمان عارفه وكنت ناوى ان شاء الله لما اتخرج اجى اتقدملها واخطبها بس من فتره حسيت بقلق وخوفت سكوتى يضيعها منى او اى حد تانى يسبقنى بس برده بينى وبين نفسى انا واخد قرارمن يوم محسيت بحبى لياسمين انى هعامل ربنا فيها ومش هعمل حاجه غلط او من وراء اهلنا عشان كده من اجازة نص السنه وانا لقيت فرصه كويسه انى ادرب فى مكتب محاسبه وبعد كام شهر قدرت اثبت نفسى وعينونى بنص مرتب عشان انا مش بروح غير بليل بس عشان الكليه ..وبابا لما لقانى اعتمدت على نفسى قالى ان مصروفى ماشى والمرتب بتاعى احوشه ..وقدرت احوش مبلغ كويس اقدر اجحيب بيه دبله وخاتم عشان كده كلمت حضرتك … يعنى وعندى عشم ان حضرتك توافق انى اخطب ياسمين لحد متخرج واكون نفسى وربنا يجمعنا فى الحلال
عادل فضل ساكت وده قلق حاتم اوى
حاتم بقلق : عمى انا عارف ان ياسمين عايشه فى مستوى عالى ومش هضحك على حضرتك وهقولك انى هقدر اعيشها فى نفس المستوى … بس انا عندى شقتى وان شاء الله خلال سنه بعد التخروج هكون جهزت الحاجات الاساسيه …وكمان صاحب المكتب وعدنى انه هيعينى بشكل ثابت بعد متخرج … حضرتك قولت ايه
ياسمين كانت فخوره بحاتم وكلامه اوى وبصت لباباها وهى خايفه ومستنيه رده
عادل بجديه : طيب لو موافقت هتعمل ايه
حاتم فضل ساكت شويه وبعدين بصله بحزن : عمى انا عندى ثقه كبيره فى ربنا حتى لو حضرتك موافقتش دلوقتى هشتغل برده وهحاول اكون نفسى ولما احس انى استاهل ياسمين هاجى تانى وهتقدملها مش هياس ولا هفقد الامل … ولو ربنا كتبنا لبعض ان شاء الله ربنا هيحفظهالى لحد ميجى اليوم اللى هيجمعنا ببعض … واوعد حضرتك لحد محضرتك توافق ياسمين مش هتكون ليه غير مجرد زميله وبس
عادل قام وقف وبص لحاتم بابتسامه : وانا يشرفنى انك تكون جوز بنتى ….انا بجد فخور ومبسوط بيك اوى