دينا ج٣
ـ ليلي بطلي طريقتك المستفزة دي معايا.
= أنا طريقتي مش مستفزة خالص على فكرة، وبعدين مستني ردة فعلي تكون عاملة إزاي بعد اللي مامتك قالته؟
ـ يعني بدل ما نحاول نهدي الجو بينهم، لا ولعتي الموضوع أكتر.
= أنت عايزني أفضل ساكتة بعد كل اللي اتقال ليا؟ ليه إن شاء الله كلامها صح مثلاً؟
ـ لا، بس على الأقل تسكتي طول ما أنا بتكلم وبحل الموضوع، مش لازم تبدأي محاضراتك زي كل مرة.
= وهو أنت حليت حاجة أصلًا؟ وبعدين أنا إيه اللي يجبرني أستحمل كل ده أصلًا؟ مامتك من الأول ملهاش الحق تتدخل في حياتنا بالطريقة دي.
ـ مهما كانت دي أمي يا ليلي، ومن حقها تشوفلي حتة عيل، ولا أنا غلطان؟
= وإحنا اتكلمنا في الموضوع ده واتفقنا إننا هنأجل الخلفة، وأنت كنت مقتنع بالفكرة، وبعدين بلاش تحسسني إن بقالنا سنين متجوزين.
ـ وأنا غيرت رأيي خلاص.
= يعني إيه؟
ـ يعني أنا عايز أبقى أب يا ليلي، بلاش نأجل.
= بس ده مش كلامك في الأول يا سيف معايا.
ـ يوووه، هو تحقيق ولا إيه؟ خلاص كلام واتغير، إيه مشكلتك؟ هو أنا بطلب منك المستحيل؟ ما كل واحدة بتتجوز وتخلف.
= الغريب إنك تغير رأيك فجأة كدا عشان ترضي مامتك يا سيف.
ـ ليلي ده قراري.
= يعني إيه قرارك لو ناسي أحب أفكرك، الموضوع ده مشترك بينا إحنا الاتنين، يعني ما ينفعش تيجي فجأة تغير كل كلامك معايا بعد ما رتبت وقتي وحياتي على حاجة معينة.
ـ حياتك؟ وانتي حياتك فيها إيه أهم من جوزك وبيتك وعيالك اللي المفروض تجيبيهم يا هانم؟
= شغلي، إحنا اتفقنا هنأجل الخلفة عشان كدا، وأنا مش مستعدة أشيل كل ده دلوقتي، هيبقى صعب عليا مسؤولية البيت والطفل والشغل.
ـ يبقى خلاص مفيش شغل، تقعدي في بيتك وتهتمي بيه وبالطفل لما ييجي.
= أنت بتقول إيه؟ لا طبعًا مستحيل، أنت عارف أنا بحب شغلي إزاي، وقبل ما نتجوز وحتى بعد الجواز وإحنا مرتبين شكل حياتنا هيبقى عامل إزاي، يبقى مش كلام مامتك ينفع يدمر كل ده.
ـ كلام ماما طلع صح يا ليلي، وإحنا كنا غلط، إحنا بنكبر مش بنصغر، لو مخلفناش دلوقتي حتة عيل يبقى إمتى؟
= بس أنا مش هسيب شغلي يا سيف، وده آخر كلام عندي.
