متي تخضعين لقلبي ج2

برغم نظراته الثابته فوقها ونبرته العاديه الا انها شعرت بالمراره تغلف كلماته لذلك ودون شعور منها مدت إصبعها تتلمس وجنته وخطوط جبهته العابسه بحب وهى تسأله بحنان :
-ومفكرتش تكمل دراسه بعدها بما انك كنت مجتهد كده ؟!..

اجابها هامساً وهو يقترب برأسه منها :
-لا ماصدقت خلصت الجامعه ورجعت على طول .. مقدرتش افضل بعيد عن حياتى اكتر من كده ..

ابتسمت بخجل من جملته المعبرة وهى تحاوط وجهه بكفيها وتفمغم بمرح محاوله تغيير مجرى الحديث :
-اه وحضرتك بقى بقيت بتتكلم فرنساوى زى البلب وانا اللى اضحك عليا فى الاخر ..

سألها مستفسراً وهو يضيق عينيه فوقها :
-مش فاهم ؟!..
اجابته بأستطراد قائله :
-مش انت كنت بتكره اللغه ورافض تتعلمها .. انا كمان لما دخلت المدرسه كانت ماده أساسيه عندنا وكنت بحضر الحصص بالعافيه ومكنتش بقبل اعمل الديفوار بتاعه ولما كانت المدرسه بتعاقبنى كنت بقولها انه فريد قالى انها لغه وحشه وانا كمان مش هتعملها ..

صمتت قليلاً ثم أردفت من بين ابتسامتها قائله :
-انا كنت على طول بقول فريد .. لما كان حد بيضايقنى كنت بقول فريد ولما كان حد بيسالنى كنت بقولهم فريد .. ولما كان بيقرب منى كنت بقول فريد .. فضلت اقول فريد فريد لحد ما فى يوم المدرسه بتاعتى قالتلى انا لازم اشوف فريد اللى مش بتتكلمى غير عنه ده ..

ازدرد هو لعابه بقوه ثم غمغم آمراً بعيون تلمع بشغف :
-قربى ..

ضيقت عينيها تنظر نحوه غير مستوعبه فأردف يقول مفسراً :
-عارفه فى كل مره بسمع اسمى من بين شفايفك ببقى عايز اعمل ايه ؟!..

هزت رأسها نافيه فى علامه على عدم علمها فأردف هو هامساً امام شفتيها :
-ببقى عايزه اعمل كده ..
انهى جملته وقام بلثم شفتيها بنعومه قبل ان تزداد عمق قبلته
امام تجاوبها معه ، ابتعد عنها بعد قليل مستنداً بجبهته فوق جبهتها ومتمتاً بشغف :
– هيجى يوم وهاخد دينى منك كامل عن كل مره نطقتى اسمى فيها وكنت بعيد عنك ..

ابتسمت بخجل وهى تبتعد عنه قائله بدهشه وهى تنظر حولها :
-فريد النور رجع ..

اجابها وهو يرفع شفتيه مقبلاً جبينها مطولاً :
-النور رجع من بدرى بس انا اللى مكنتش عايزك تتحركى من جوه حضنى ..

ابتسمت قائله بمرح :
-طب دلوقتى ممكن اتحرك عشان أسلمك الملف اللى كنت مستعجل عليه ؟!..
اجابها بأندهاش :
-انتى فعلا خلصتيه !!..
اجابته بفخر :
-ايوه طبعاً أمال انت فاكرنى هاويه ولا ايه الملف بتاعك خلص من قبل ما النور يقطع بس انا اتوترت ونسيت اجيبه وانا جايه ..