فراشه اعلى الفرقاطة ج4

ثم جابت بعينيها المكان بحثاً عنها ، و…
-شيماء متابعة بنبرة متسائلة : اومــال هي فين ؟؟ ليه مش باينة ؟؟
-يزيد بنبرة شبه جادة وهو يشير بعينيه : هي جوا أعدة مع فرح
-شيماء بنبرة مذهولة ، ونظرات مصدومة : هي فرح فاقت ؟
-يزيد وهو يوميء برأسه إيماءة خفيفة : أهــا
-آدم متسائلاً بترقب : طيب هي عاملة ايه الوقتي ؟؟ يعني الوضع عامل ايه بالنسبالها ؟

لــوى يزيد فمه في امتعاض ، ثم تنهد في انزعـــاج ، و…
-يزيد بخشونة : والله مش عارف ، هي قلبت الدنيا أول ما عرفت بإن أمها ماتت ، وبعد كده سلمى فضلت أعدة معاها
-آدم باستغراب : سلمى !!!
-شيماء بنبرة مدهوشة : البت المفعوصة دي !!!
-يزيد بنبرة شبه هادئة : اه .. بقالهم ساعات أعدين جوا ، وانا محبتش أدخل عليهم
-شيماء بنبرة جــادة ، ونظرات حائرة : طب أنا هادخل أشوف مالهم

ثم تركتهما شيماء ، وتوجهت ناحية باب الغرفة ، وطرقت عليه طرقات خفيفة ، ثم أمسكت بالمقبض وفتحته ، ودلفت إلى الداخل ، وأغلقت الباب من خلفها ..
تابعها يزيد بنظرات متربصة ، في حين مــال عليه آدم برأسه و…
-آدم متسائلاً بجدية : طب هاتعمل بعد كده ايه معاها ؟
-يزيد بنبرة رخيمة : مش عـــارف ، بس أكيد مش هاسيبها
-آدم بنبرة متوجسة : بس يمكن هي متقبلش ده !
-يزيد بنبرة حازمة : ده متوقع ، بس أنا هاتعامل معاها باسلوب تاني خالص
-آدم بنبرة قلقة : اوعى تكون ناوي على نظامك الناشف ده معاها !!
-يزيد مبتسماً في لؤم ، ونظرات واثقة : لأ .. أنا ناوي على خطة جديدة خالص ، هاستخدم فيها كل التكتيكات المشروعة والـ ..آآ.. احم والذي منه !
-آدم وهو يبتلع ريقه في ارتباك : ربنا يستر ويعديها على خير .. أنا مش متفائل
-يزيد بنبرة جــادة : اتجدعن انت بس وخد مراتك وسيبلي سلمى يمكن أعمل بيها شغل

قطب آدم جبينه في استغراب ، ثم رفع أحد حاجبيه و…
-آدم بنبرة شبه قلقة : هاتعمل بيها شغل ولا .. آآ.. ولا ناوي تضيع بنتي في الرجلين
-يزيد مبتسماً بثقة : اطمن .. ده أنا المقدم يزيد جودة ، المهم تعالى أعملك شاي
-آدم بإيجاز : ماشي

ثم اتجه كلاهما إلى المطبخ ، وبدأ يزيد في اشعال الموقد ووضع البراد عليه بعد أن وضع به المــياه ، ثم استند إلى جواره منتظراً غليانها ، في حين وضع آدم ثلاثة أكواب زجاجية على الصينية المعدنية ، ووضع إلى جوارهم علبة السكر ..
رفع آدم يده على رأسه ليحكها قليلاً ، ثم ..
-آدم بنبرة جادة ومتلهفة : بالحق نسيت أقولك
-يزيد بنظرات ثابتة ، ونبرة هادئة : خير
-آدم بنبرة مهتمة : مركز اللي ما تتسمى ولع بيها أمبارح
-يزيد متسائلاً بنبرة مندهشة : مركز مين ؟
-آدم بجدية : هايدي