المطارد ج٢

في وقت لاحق من اليوم
حينما عادت يمنى الى منزلهم بعد انتهاء عملها ، وجدت امامها والدتها تقف لها بوسط الصالة وكأنها كانت في انتظارها، واقفة بتحفز وعيناها تقدح شررًا ، القت يمنى اليها السلام بتردد وريبة من هيئتها الغريبة.
– مساء الخير .
اومأت نجية برأسها بحركة ساخرة ترد:
– اهلًا أهلًا بالست الدكتورة اللي شايفة نفسها ومحدش مالي عينها ، شرفتي ونورتي.
اضطربت يمنى من طريقة والدتها في الرد والتهكم عليها بدون سبب، ولكن مع رؤية الهاتف الذي ببدها بدأت تفهم وحدها، وسالتها :
– هو في ايه؟ مالك ياما كدة واخداني عالحامي؟ ايه اللي حصل يعني:
– وخداكي عالحامي !
هدرت بها نجية باستنكار، وأكملت :
– ليه يادكتورة؟ هو انت في حد قادر يكلمك؟ دا انتِ بترفضي وترمي على كيفك، ولا اكن ليكي اب،ولا أم مسؤلين عنك ، وحقهم عليكي انك تاخدي رأيهم على الأقل.
– قصدك ايه ياست الحبايب؟
قالتها يمنى ببعض الدعابة علها تؤثر في والدتها التي صرخت وكأن الدعابة استفزتها:
– كان عملك ايه يابت ابن خالك عشان تكسفيه قدام صاحبتك وتخلي رقبته قد السمسمة ؟ كان عملك ايه وهو رايحلك بأدب يسألك بأدب لعل وعسى تخلي عندك دم وتحسي بيه؟.
صاحت يمنى هي الأخرى وقد نفذ صبرها:
– قولي كدة بقى، سبب الزعلة والخناقة الكبيرة دي هو المحروس اللي راح اشتكى لامه وكالعادة هي اشتكلتك انتِ، يعني بيعيد نفس السبب اللي خلاني كرهته وفسخت خطوبتي بيه، لما كنت ازعل ولا اتخانق معاه؛ بذمتك دي اخلاق رجالة؟
قالت الاَخيرة بازدراء اثار حنق والدتها، فصاحت بصوت عالي
– جرا ايه يابت؟؟. انت شايفه نفسك على الواد الغلبان ده ليه ها؟ هتلاقى فين في بلدك الفقريه دى واحد موظف وفي ايده شهاده؟ هتلاقى فين واحد يسكنك في البندر؟ عايزه ايه تانى اكتر من كدة يابت سالم قولي ؟
هتفت بحدة وهي تنسحب من أمام والدتها نحو مكانها الاَمن في غرفتها :
– مش عايزة حاجة ياما استريحتي، لا عايزاه ولا عايزة غيرة، هو بالعافية ، مش طايقاه ولا طايقة نفسى ياناس، استغفر الله العظيم يارب، ده كفاية تناحته وغباء و دمه اللي يلطش .
– غبي وتنح ودمه يلطش، فاضل ايه تاني يابت عشان تطلعي القطط الفاطسة فيه، ما انتِ مالكليش في الزين ، ينفع معاكي بس الواعر اللي بيدي بالمركوب.
وصل صوت يمنى من داخل الغرفة:
– ماشي ياما انا ينفعني اللي بيدي بالمركوب، لكن برضوا مش قابلة واد امه ده.
صرخت نجية بعدم سيطرة وهي تتحرك لتلحقها نحو غرفتها .
– برضوا البت بتقولي واد امه، طب والنعمة يايمنى ما انا سيباكي النهاردة واما اشوف اَخرك ايه النهاردة
……………………..