نفوس قاسية ج2

حدق به آدم وسأله بلهفة مهملًا إجابة سؤاله:
– فين سهر يا محمود؟

عقد محمود حاجبيه وحدق به بغضب وعقد يداه أمام صدره وقال بحده:
– بتسأل عن سهر مراتي ليه يا أستاذ آدم؟

نفوس قاسية
#منى_أحمد_حافظ

الثانية عشر.وهل للدموع نهاية.
—————————————

وقفت سهر أمام نافذتها بعدما جفاها النوم طيلة الليل وها هي تستمع لآذان الظهر فقررت إنهاء عزلتها لهذا اليوم فخرجت وأشاحت بعينيها عن غرفة محمود ودخلت إلى المطبخ، ففوجئت بصفية تبكى فأسرعت إليها تضمها لتنتفض صفية وهى تحدق بقلق لسهر ثم لانت قسمات وجهها وتنهدت بارتياح فهمست سهر لها:
– مالك يا صفصف العيون الحلوة دي كانت بتعيط ليه.

أشارت صفية بعينيها إلى غرفة محمود فرسمت سهر ابتسامة تحاول إرضاء صفية وقالت بصوت منخفض:
– إيه يا خالتي عرسان جداد و.

قاطعتها صفية بضيق وقالت:
– عرسان مقولتش حاجة بس في أصول في أحترام أنهم مش لوحدهم دي البت زي ما تكون قاصدة تسمع الحي كله هما بيعملوا إيه.

ربتت سهر كتف صفية وقالت:
– معلش يا خالتي سيبيهم براحتهم المهم إن محمود مبسوط ولاقي اللي تسعده أنتِ بذمتك مش فرحانة إنه عايش حياته طبيعي دلوقتي وربنا إن شاء الله يرزقه بالذرية الصالحة وإن كان على الصوت نسد ودانا يا خالتي متنسيش إنه بيتها دلوقتي.

تنهدت صفية وهي تبتعد عن سهر تكمل تجهيز الطعام وقالت:
– افضلي كدا هاتي لهم فحجج لحد ما تاخدي على دماغك أنتِ الظاهر لسه خايبة زي ما أنتِ.

نظرت لها سهر وقالت:
– المهم يا خالتي تفتكري أفاتح محمود بالموضوع اللي أتكلمنا فيه ولا أستنى شوية يعني علشان لسه عريس وكده.

أجابتها صفية:
– وهو الموضوع ده عايز إذن ده حقك يا بنتي ومحدش يقدر ينكره أنتِ بردوا مراته وواجبه يراعيكِ ولو مكسوفة تكلميه أنا هكلمه لما يجي.

هزت سهر رأسها وقالت:
– لا يا خالتي أنا هكلمه بيني وبينه لما يرجع من الشغل بلاش أنتِ أنا مش عايزة تشدوا سوا بسببي.

نهرتها صفية وقالت:
– يختاي هتشليني يا سهر يا بت بقول حقك ومحمود ميقدرش يرفض ومافيش خناق ولا شد معاه وياستي خلاص مش هدخل هسيبك منك له.

كانت سهر وصفية تتحدثان ولم يعلما أن هناك أذنًا وقفت تتسمع لحوارهم لتدب نيران الغيرة في قلبها واشتعلت غضبا لتتسلل لغرفتها وهي تقول:
– قال وأنا اللي فكرة إن محمود هيبقى لي لوحدي أهي الست سهر وحماتي هيبدأو يشتغلوني عايزة تشاركيني جوزي يا سهر ده بعدك أما نشوف محمود أزاي هيوافق على خطتكم دي قال يديها حقها ويراعيها جت كسر حوقك منك ليها أنا هتصل بماما هي اللي هتعرف تساعدني ويا أنا يا أنتِ فالبيت ده يا سهر.