نفوس قاسية ج2

قطع على سهر إكمال جملتها صوت رنين الهاتف فأجابت سهر ونادت على صفية وقالت:
– ماما دي طنط سميرة عايزاكي.

تحدثت صفية مع سميرة وأغلقت الهاتف وقالت لسهر:
– هطلع أشوفها مالها بتقول تعبانة أنا مش هغيب لو دكتور هاني جه وأنا فوق قعديه فالصالة ورني عليا وأنا هنزل على طول.

جلست سهر بقرب النافذة تراقب البحر وتبتسم وهي تتذكر سعادتها بالأمس وهي تجري وتلعب مع الأمواج وسط ضحكات صفية التي شجعتها على الخروج بعدما سافر محمود، أفاقت من شرودها على رنين هاتفها فأجابت وهي تضحك:
– أيوة يا ماما.

سمعت سهر صوت تنهد الطرف الثاني يقول:
– كل مرة متعرفيش صوتي أنا آدم يا سهر اللي بتصل بيكِ علشان وحشني صوتك يا فتنة.

همست سهر باضطراب:
– آدم.

أجابها آدم بتنهيدة حارقة:
– أيوة آدم اللي لعبتي بيه.

أجابته سهر بحدة وقد فاض بها الكيل:
– بقولك أيه يا آدم بلاش تمثل عليا وعلى نفسك أكتر من كده وتعيش دور الضحية، وبدل ما تتريق عليا وتعايرني روح بص لنفسك الأول، أنا لو كنت اتجوزت محمود ف ده لأسباب وظروف مريت بيها، إنما أنت أيه حجتك لما كذبت عليا وهربت وروحت اتجوزت هايدي وخلفت منها بعد ما وهمتني أنك هتغير دينك، يا آدم لو في حد فينا جرح التاني فيبقى أنت، أنت اللي جرحتني وخدعتني وأنا عمري ما هنسى وجعي وأنا مستنياك تيجي زي ما قولت، أنا فضلت مستنية شهر بحاله تيجي تنفذ وعدك ليا وأنت اتاريك عايش مع مراتك، بص يا آدم كفاية أني سبتك تجرح فيا براحتك المرة اللي فاتت إنما خلاص دلوقتي مش هسمح لك تقول حرف فيه إهانة ليا تاني، ومن الأخر كده الرقم ده تمسحه ومتتصلش عليه تاني فاهم ولا أقولك أنا هرميه زي ما رميت حبك من قلبي وخرجتك برا حياتي كلها.

أغلقت سهر الهاتف تحاول تمالك أعصابه وأفعالها، فقلبها يؤلمها لشعورها بآلام آدم فقذفت هاتفها بالحائط وهي تبكي بتساؤل لما هو مصر على اتهامها بخداعه، وهي التي قضت لياليها تبكي والدها الذي قتل وتبكيه الآن في حين لم يف بعهده معها، هزت سهر رأسها وصرخت بألم:
– ليه تخليني أوجعك بالشكل ده حرام عليك يا آدم حرام عليك بجد.

حدق آدم بهاتفه بعدما أغلقت سهر في وجهه الاتصال وهو يشعر بالتيه فهو لم يعد يفهم شيء وتساءل من خدعها وأخبرها أكاذيب عنه هكذا؟ من أوهمها بزواجه من هايدي؟ أحس آدم أن عليه مواجه سهر بما قالته ليثبت لها أنه وفى بوعده وأنه بحث عنها كثيرا ليثبت لها أنها هي من خانت اتفاقهما معًا وتزوجت بمحمود.