كاره النساء ج1

اخذ مالك ( الروشتة) من عمه لكي يشتري الدواء..بعد أن احضره قال له عمه:
-مالك ياولدي أنا حاروح الشغل دلوك..اصلهم رنوا عليا خليك أنت إهنيه ياولدي ..لحسن يعوزوا حاجة معهلش ياولد اخويا حتعبك معايا.
-متجولش إكده ياعمي..أنا زي ولدك بردك.
-تسلم ياولدي.
قالها خالد وهو يربت على كتفه بامتنان..ثم انصرف حيث عمله.
******************************
بعد مرور بضعة ساعات فاقت نريمان من نومها على ألآم رهيبة فصرخت وهي تنادي امها:
-آاااااه…ياماما الحقيني ألم فظيييع في رجلي ودراعي …وجسمي كله واجعني.
هبت والدتها التي كانت جالسة بجوارها فأردفت بحنان:
-يقطعني ياضنايا الف سلامة عليكي..يمكن المسكن مفعوله راح.. استني انا حديكي المسكن تاني عشان الألم ال أنتي حاسة بيه يخف.
قالت و وجهها محتقن بفعل الألم:
-بسرعة ياماما..بسرعة مش قادرة استحمل.
فأعطتها والدتها المسكن..وظلت تمسح على شعرها في حنان بالغ ولسانها يتمتم بالدعاء لها..هدأ الألم قليلا فهمست نريمان لأمها:
-ماما..عايزة أروح الحمام بسرعة.
داعبت وداد ذقنها في حيرة ..كيف تقدر على حملها وهي في تلك الأربطة؟ تخشى إن رفعتها تسبب لها مضاعفات..صرخت نريمان في أمها قائلة:
-أيه ياماما بتفكري في أيه، بقولك عايزة أروح الحمام بسرعة.
-اييه يابنتي خضتيني..أنا بفكر ازاي أشيلك وانتي متجبسة كده..اخاف ارفعك بحركة غلط اوجعك.
-طب وبعدين أنا مش قادرة خلاص.
-بصي أنا حاروح أنده لابن عمك يشيلك لحد الباب وانا اساعدك جوه في الباقي بقى.
حدقت عينى نريمان في صدمة وصرخت قائلة:
-أيييييه.. مييين..مين ده ال يشيلني ياماما الجلف ده..لا لا استحالة طبعا.
– يابنتي المضطر بقى..حنعمل أيه بجبسك ده محدش ينفع غيره..والا خلاص بقى خليكي كده.
زفرت نريمان استسلاما للأمر ..فابتسمت وداد للرضوخ ابنتها وقامت لكي تستدعي مالك من حجرته..دقائق وأتى مالك فأشاحت بوجهها بعيدا عنه عند رؤيته..ليس لأنها لا تطيق النظر له..ولكن لتخفي تلك النبضات التي علت عندما رأته..ولا تعلم لماذا؟ هل لأن مشهد حمله لها عندما سقطت حضر أمام عينيها بمجرد رؤيته، وأنفاسه التي تقسم أن عبقها مازال منتشرا في خلاياها، ودقات قلبها التي أمتزجت مع دقاته.. ومع ذلك طغت عجرفتها على ذلك الشعور ربما ارادت أن توئده أو أنها تكذبه..فقالت له وهو يهم بحملها:
-بقولك ايه أوعى تشيلني بغشامة انا بقولك اهو.
تراجع مالك عن حملها ونصب قامته وهو يزفر بملل مردفا:
-أنا بجول تشوفيلها حد غيري احسن يامرة عمي اجولك هاتيلها ونش يشيلها أحسن