ممرضه دمرت حياتي

ابتلع غنيم ريقه بصعوبة وقد أثرت كلماتها فى رجولته ،فحدث نفسه قائلا ..هو فى ايه ؟
وشايفنى ازاى بالظبط ؟
مش شايفين انى راجل كبير ولا هما عايزين منى ايه بالظبط
ثم رد على نفسه قائلا .. لا فوق يا حاج .

انت عارف اكيد أن ورا البت دى مش طبيعى ، واكيد طمعانة فيا أو غيرانة من حلا .

ثم تذوق على لسانه حلاوة نطق اسمها فابتسم .
وظنت علا أنها تبسم لها فرددت …ياه اخيرا شوفت ضحكتك الحلوة دى يا حاج ، لو اعرف انى هشوف ضحكتك دى ، كنت حكتلك اللى فى قلبى من زمان .
غنيم وقد تبدلت ملامحه قائلا …بت أنتِ انا مش فايق لحركاتك المفقوسة دى وعرفها كويس .
ومش هتجيب معايا سكة ، لانى فاهمك كويس اوى .
وفاهم الدور ومش عيلة زيك اللى هتعلب عليا وانا فى السن ده .
عيب عيب والله .
شعرت علا بالحرج من كلماته وكأنه صب عليها دلوا من البارد ولم تنطق.
علا محدثة نفسها …يخربيته ، ده طلع هارش الموضوع .
يادى الكسفة السودة ، اعمل معاه ايه ده اكتر من كده ؟
انا بحسب عشان راجل كبير وما هيصدق وحدة فى سنى تهتم بيه ، فيقع فيها على طول .

لكن هو غير الرجالة كلهم ، طيب ده مفتاحه ايه ؟
انا غلبت فيه صراحة ومش عارفة اعمل معاه ايه ؟
فقطع تفكيرها حديثه الحاد بقوله …بصى يا علا يا بنتى .
لو عايزة تاكلى عيش معايا هنا وتستمرى فى الشغل .
يبقا تبطلى حركاتك دى ، وتهتمى بشغلك وبس .

ولو صممتى على اللى فى دماغك وبرده مش ناوية تعقلى، فروحى ربنا يسهلك الحال مع واحد غيرى ، تقدرى تضحكى عليه ، وهتلاقى فعلا ، لأن المغفلين كتير .
لكن انا لأ.

وجدت نفسها علا بعد كلمات الحاج غنيم تتراجع للوراء بدون أن تنطق بكلمة وكأنها تقول …يا ارض انشقى وابلعينى .
ولاحظت حركات وجهها عزة فابتسمت بمكر قائلة …الجواب باين من عنوانه .

والراجل ده طلع مش سهل فعلا ، واحنا اللى كنا فاكرينه سهل ويضحك عليه .
لكن طلع مية من تحت تبن ، وعلا شكلها هتنفجر .
لما اروح اروق دمها بكلمتين .
فأسرعت إليها ، فوجدت عينيها تنبعث بشرار يكاد يحرق المكان كله .
علا بانفعال عندما رأتها ..ارجوكى يا عزة سبينى لوحدى دلوقتى عشان مش طايقة نفسى وممكن اعمل جريمة .
فربتت عزة على ظهرها بحنو قائلة …يا بت يا خايبة هتحرقى دمك على راجل ميستهلكيش برده .
سبيه يا اختى ومتعبرهوش تانى ، والرجالة مالية السوق ، والف مين يتمنى ضفرك .
علا …بس صعب عليا يا بت يا عزة ، كل شوية يكسفنى كده .
وياريت يعنى ملهوش فى الصنف الا ده هيموت على البت المقشفة دى حلا ،الهى ما تسمى ويكون جالنا خبرها ، عشان كده مجتش النهاردة .
عزة …يبقى بيحبها بجد يا علا ، فسيبك منها وخليها تشربه .
علا بغل….وتتهنى على العز ده كله لوحدها ، لا طبعا .
يستحيل ده يحصل ،وبدال مش عايزنى ، يبقى برده ميخدهاش المسهوكة دى .