الثلاثة يحبونها ج٢

ضمها يحيي بقوة إلى صدره أكثر.. يقول بحنان:
أنا كمان ياقلب يحيي.. كنت بموت وأنا بتخيلك معاه..بس الحمد لله ربنا حفظك لية وخلاكى ترجعيلى من تانى.

خرجت رحمة من بين ذراعيه وهي تنظر إليه قائلة بعتاب:
بس أنا مش أول واحدة فى حياتك يايحيي..زي ما كنت انت اول واحد فيها.

قال يحيي بعشق وهو يرفع يده يمررها على طول وجنتها الناعمة الرقيقة :
هتصدقينى لو قلتلك إنك أول واحدة وآخر واحدة فى حياتى يارحمة.

قالت رحمة فى سخرية:
وراوية دى كانت إيه يايحيي ..مجرد زوجة بالإسم..مش هصدقك طبعا ..والدليل ..هاشم.

قرص وجنتها بخفة قائلا بمزاح:
حبيبتى الغيورة .

أبعدت يده عنها وقد عادت إليها مشاعر الغضب من مزاحه وإستخفافه بغيرتها ليعتدل قائلا بجدية:
أنا إتجوزت راوية صحيح..بس ده كان عشان خاطر جدى هاشم طلب منى أتجوزها..إنتى عارفة إن راوية اختك كانت اكتر حفيدة بيحبها جدك..يمكن عشان كانت بتشبه جدتك عايدة..أو يمكن لإنها بنت سعاد مرات إبنه الأولانية واللى كان بيحبها جدا.. وقهرتها من والدك لما إتجوز والدتك عليها موتتها..

أومأت رحمة برأسها فى حزن فهي تعرف كل ذلك ليستطرد يحيي قائلا:
جدك كان عارف إنها بتحبنى وكان فاكر إن حبها لية ممكن ينسينى حبك ..بس كان غلطان..فضلت أحبك حتى بعد ماإتجوزتها..فضل بينى وبينها سد..حاجز..بينى وبينها إنتى..رحمة أختها..كانت حاسة إنى بحب واحدة غيرها وساكتة..إستحملت ومتكلمتش..كان إحساسها إنى جنبها وإسمها على إسمى مكفيها ..لحد ما فى يوم جدى قاللى إنك فى المستشفى عشان وقعتى والبيبى اللى إنتى كنتى حامل فيه نزل..هشام لما كلمه قاله كدة..أكيد كان بيحاول يوصل لينا إن حياتكم طبيعية ..أو يوصل لية أنا بالذات الكلام ده..وفعلا..الخبر ده جننى..فكرت..أنا بتعذب فى بعدك عنى..وإنتى عايشة حياتك ولا همك..شربت ..شربت عشان أنسى بس مقدرتش أنسى ..فضلت أشرب وأشرب لغاية مبقتش شايف أدامى ولما رجعت لقيتها مستنيانى ..غصب عنى شفتها إنتى ..قربتلها على إنها إنتى..فضلت أهمس بإسمك جوايا..وأنا بقولك على كل مشاعرى..لغاية ما حصل اللى حصل وفقت تانى يوم لقيتها جنبى ..كانت بتعيط..بتقول كلام غريب على إنها غلطت..وإنى مش هقدر أنسى وإنها لازم تصلح غلطها..حاولت أفهم منها حاجة مقدرتش..سيبتها وسافرت..إحساسى بالذنب ناحيتها كان أكبر من إنى أتحمله..ورجعت لما جدى بلغنى إنها حامل..وعشت معاها بس زي ما كنا قبل الليلة دى..زوجين بالإسم وبس ..هي عارفة إنى بحب ومش هقدر أكون لغير حبيبتى .. مكتفية بوجودى فى حياتها ووجود هاشم..لغاية ما تعبت وبعتتلك..عشان تدخلى حياتى من تانى يارحمة .