(أشباح المخابرات1) من الفصل السادس الى العاشر

تجاهلت ما يقول، واقتربت تقف قبالته وجهًا لوجه، لا يفصلهما سوى لوح الرخام الفاصل بينهما، تنحنح مبتسمًا وهو يخطف نظرة للسكاكين الموضوعة بالحامل جوارهما:
_أوعي عقلك يتهور وتسحبي سكينه منهم، بالله عيونك قاتلة أكتر منهم!

تخلفت عما قال، وحررت قباع غضبها بقولٍ لفته بمكر:
_سيادتك إيه الخطوة الجاية اللي المفروض نعملها بعد ما اتاكدنا إن العاملات مش متورطين بالشغل الشمال إياه، وبعد ما استغلتني عشان تبلغ القادة بالنقطة دي امبارح.

سحب رشفة طويلة من المج الذي يحمله، ومن ثم تطلع لها وهو يجيد صنع الدهشة فجأة:
_أنا استغليتك يا ميري!! إيه الكلام العجيب المريب ده!

أدمت شفتيها السفلية بغضب قاتل، وأخفضت بصرها لساعة يده ساخرة منه:
_بقولك إيه يا قائد بلاش تتصرف وكأن مفيش حد ذكي في الفريق غيرك، إنت تعمدت تروح الكافيه امبارح وإنت عارف انه بيقفل بالمعاد ده، وقفت ترغي على البار وتعمدت تخليني أعمل مشكلة مع الشخص الوحيد اللي كان موجود هناك في نفس فترة تواجدنا، عشان تقدر تسلم الساعة اللي عليها شفرة المعلومات اللي جمعتها.

أبصرها ببراءة لا تمس له بصلة:
_ازاي وساعتي لابسها أهي!

ضيق زُرقتها الفاتنة بسخرية، فضحك وهو يستكمل تناول كوبه، مرددًا:
_حاولي تثبتي إننا بدلنا الساعات، مش هتعرفي، أنا ظاهر بالكاميرات وأنا داخل وخارج بيها، شغل مخابرات بقى!

تغاضت عن تلك المشاجرة الخاسرة أمامه، وتساءلت وهي تكبت غضبها بتحكمٍ:
_إيه الخطوة اللي المفروض أخدها دلوقتي يا سيادة القائد.

راق له ما تحاول فعله لتتفاداه، فسحب الكوب، يرتشف منه وهو يتطلع لها بثبات ورثه بجدارة عن “الدنجوان”، ثم نطق بحروف ثقيلة عليه:
_هتنزلي تقدمي في الوظيفة.

ورفع الساعة يتفحص الوقت بضيق ملحوظ:
_هتكوني هناك بعد ساعة تقريبًا، يدوب تستعدي.

احتلتها ابتسامة حماس لما هو قادم، فتركته وصعدت للاعلى بصمت، جعله يتابعها والقلق عليها يساوره رغمًا عن أنفه، فاذا به ينتبه ل” زين” الذي يرنو إليه وهو يضع الحاسوب على الرخام ويهتف بارهاقٍ:
_عايز قهوة يا جارحي.

سدد له نظرة حارقة، وصاح:
_خدامك سعاتك أنا!

أجابه وهو يعيد فتح حاسوبه:
_ما أنت عارف أمور المطبخ دي ماليش فيها، ومكنش عندي فرصة أتعلم حاجة أصلًا، زائد رحيم زيدان مكنش سايبلي فرصة اعمل حاجة في حياتي غير التدريبات والاسلحة، والله أعلم لو كان قفشني في المطبخ بعد كل التمارين دي كان هيعمل معايا إيه!