(أشباح المخابرات1) من الفصل السادس الى العاشر
بقلم أية محمد رفعت
نهض يتحرك صوب النيران، يعد له ما طلب، فاذا به يقول بحماس:
_يبقى كرم منك لو عملتي مع القهوة بيض بالبسطرمة وياريت تكترلي الشطة.
استدار يرمقه بغضب، فتابع “زين” وهو يدعي الحزن:
_أعملك إيه نفسك في الأكل بيفكرني بأمي، وهي وحشتني فوق ما تتخيل بحاول أعوض فقداني ليها ولأكلها بيك!
وأضاف بحنق مضحك:
_مشوفتش أمي بقالي سنة ونص إيه برودة المشاعر اللي بقت عندك دي يا جارحي!
وتابع وهو يشير على الثلاجة الضخمة المجاورة له:
_خدلك لفة كده يمكن تلاقي جلاش أو رقاق تعملهولي باللحمة تبقى قدمتلي حضن دافي وعميق من الست الوالدة.
اقترب منه “ياسين” بغضب، وطرق الرخام بقوة أفزعت “زين” حتى كاد بالسقوط عن المقعد:
_هسيب المهمة باللي فيها وهبقى طباخ جنابك أنا، إنت صاحي تهرج على الصبح ولا إيه!!
سحب الحاسوب إليه بعدما شمله بنفور:
_خلاص مش عايز حاجة، نفسي اتسدت!
ضم “ياسين” شفتيه بضيق، فعاد يستكمل صنع كوب القهوة، وفجأة سحب المقلاة وشرع بصنع البيض مثلما طلب والآخر يراقبه بطرف عينيه بابتسامة ماكرة، وكأنه يعلم بأنه لن يهون على رفيقه.
عاد “ياسين” يضع من أمامه فنجان القهوة، والمقلاة ومد له طبق الخبز، طرق “زين” بيديه وشرع بتناول طعامه وهو يهتف بسعادة:
_هو ده الكلام، كده نشتغل بضمير.
أغلق عينيه بتلذذ مع أول لقمة تناولها وهو يغني باشادة:
_الله عليك يا حبيب والديك.
تبسم رغما عنه، وعاد إلى مقعده يرتشف الكوب بينما تحوم عينيه إلى باب غرفتها العلوي، متسائلًا:
_وصلت لحاجة من مراقبتك ليه؟
أجابه “زين” وهو يتناول طعامه:
_لا، بس حاسس إن الشخص ده وراه كوارث، وزي ما أنت عارف أنا مستني أي مدخل ليه.
هز “ياسين” رأسه بتفهمٍ، فتساءل “زين” هو الآخر:
_وإنت وصلت لحاجة؟
أجابه ومازال بصره يراقب الطابق العلوي:
_اتاكدنا إن العاملات مالهمش علاقة بأعمالهم المشبوهة دي، لذا مرين هتتحرك على طول.
توقف عن مضغ الطعام، وقال بجدية تامة:
_بالسرعة دي؟
تطلع له “ياسين”، وقال:
_مفيش وقت يا زين، كل ما اتحركنا بسرعة يكون أفضل لينا.
وأضاف وهو يسحب شيئًا من جيب سترة الترينج الرياضي الذي يرتديه:
_إنت عارف إنك لازم تعمل ده قبل ما هي تطلع من هنا.
راقب ما يقربه منه، وعاد يستكمل طعامه قائلًا:
_إنسى يا حبيبي، أنا مزاجي رايق النهاردة ومش هعكره مع مروان اشطا، أنا بتنازلك عن المهمة دي بصدر رحب.
