(أشباح المخابرات1) من الفصل السادس الى العاشر
بقلم أية محمد رفعت
رفع عينيه له بتعبٍ وقد فاض به تحمل ما يفعله “هارون” به، بينما يحتد “عثمان” غاضبًا:
_أخوك وبعدين رزان، وبعد كده ابن فالتاني!!
وابتسم ساخرًا:
_بتكتر من نقاط ضعفك عشان وقت وقوعك ميكنش ليك قومة!!
تعمق بالتطلع لعينيه باحثًا عن شيء كان وسيظل غامضًا، وفجأة نطق بصوتٍ متقطع من فرط ألمه:
_عثمان!!!
اختزل الحزن رماديتاه، وقال بقوة لم تتخلَّ عنه:
_جاهز تعيش اللي أنا عيشته زمان؟
هز رأسه ينفي ذلك، ومال على ركبتيه يبكي باختناقٍ وهو يردد بدموع اشتقت من رجلٍ لم يعلم الضعف طريقه إليه:
_قلبي ومشاعري مش خيوط بحركها بين صوابعي يا عثمان.
وأضاف ووجهه مطموس بالارض:
_من ناحية في أخويا الوحيد ومن ناحية تانية رزان! وأنا بينهم عاجز!
حرك مقعده صوبه، ومال يسحبه ليستند على ركبتيه بينما يهزه بعنفٍ:
_لو شافوك وإنت محني كده هيخلصوا عليك، بالذات هارون! قوم اصلب طولك وبالذات قدامي أنا، قولتهالك ألف مرة وهرجع أقولك تاني اوعى تأمنلي!
كان يستند على ركبتيه وبقى بنفس طوله، مازال “عثمان” يسانده بمسكه لذراعيه، فمال على كتفه يبكي:
_تعبت ومبقتش قادر لكل ده، عايز أنام وأقوم ألقى نفسي شخص تاني، شخص عادي قادر يأسس حياة وأسرة مع البنت اللي قلبه يختارها.
لمس ضعفه الشديد، فأحاطه بين ذراعيه، وقال ومازال رأس “كِنان” على كتفه العريض:
_لا إنت شخص عادي ولا حلمك هيبقى حقيقة في يوم من الأيام.
وأبعده بعدما تركه يفرغ دمعاته التي يشعر بها كلاهما للمرة الاولى، أبعده يطالعه بقوةٍ وصاح بخشونة:
_حالًا تقف على رجليك وتنزل من هنا وإنت بشموخ وكبرياء، أوعا تدي فرصة لهارون يحس إن اللي بيعمله هيجيب نتيجة معاك.
هز رأسه بخفة وازاح دموعه بقوة، بينما يهمس ببسمة خافتة:
_وحشتني أوي على فكرة.
ارتسمت بسمة ساخرة على وجه “عثمان” وقال بثبات:
_وإنت لا، ومش عايز أشوفك أبدًا طول ما أنت بالوضع ده.
وأضاف وهو يحرك المقعد بعيدًا عنه:
_ماتيو.
حضر الألي لسيده على الحال، فاذا به يخفض صوته إليه بأمرٍ ما، اتخذ دقيقتين حتى حضر إليه، التقط “عثمان” منه عُلبة الدواء، وعاد بمقعده صوبه يشير له بالإقتراب.
تنهد “كِنان” ورنا يهتف بنزق:
_اخترعت إيه تاني؟
منحه نظرة نارية جعلته يقف أمامه بثبات واتزان لا يعلم من أين استحضره، بينما يقذف تجاهه “عثمان” العُلبة ولولا أنه تلقفها سريعًا لكانت أدمت وجهه.
