دينا ج٢
وهجمت عليها، قبضة بإيديها على شعرها، وسيف واقف بينهم بيحاول يبعد ليلي عنها، بس كانت متحكمة في قبضة إيدها.
ليلي وهي بتوحّط رأسها يمين وشمال بقوة، لدرجة إن شعر روان خرج من الطرحة:
ـ بقى إنتي بتقولي لجوزي أشيلك في عيوني؟ ها؟ هاا؟ سمعيني كده قولي قولي بدل ما أموتك في إيدي! هو إنتي معندكوش مراية في بيتكوا؟ ده إنتي يا بت شعرك سلك مواعين!
روان مش قادرة تدافع عن نفسها وعمّالة تعيط، مسكت في إيد سيف وبتترجاه:
= الحقني يا سيف، خلي مراتك المفترية دي تسيبني!
ليلي مسكت إيديها اللي حطتها على سيف جامد وزقتها بعيد عنه:
ـ آه يا زبالة، أوعي تكوني فاكرة إني مش فاهمة حركاتك الرخيصة دي عشان تاخدي جوزي مني، بس ده بعينك! عارفة ليه؟ عشان بيحبني أنا وبس يا بومة!
سيف: يا ليلي خلاص سيبيها، شعرها هيطلع في إيدك.
= خليه يطلع عشان تحرم تبص تحت عينيها على حاجة مش بتاعتها بعد كده.
مسك سيف إيد ليلي اللي مسك بها شعر روان وبعدها عنها بأعجوبة:
ـ يا ليلي يا حبيبتي خلاص، عشان خاطري، هي مش هتعمل كده تاني.
= عشان خاطرك إنت يا جوزي يا حبيبي يا نور عيني أنا وبس.
وبصت لروان اللي واقفة مكانها لسه بتعيط وإيديها حطاها على شعرها مكان مسكة ليلي:
= وأي حد بس يفكر يبصلك، أشيل عينيه من مكانهم.
عند كوثر وغادة، كانوا واقفين قدام باب شقة ليلي بعد ما سمعوا صويت روان.
غادة: يا لهوي يا أمي، البت روان كانت بتصوت كده ليه؟ هي عملت فيها إيه يا ترى؟
= مش عارفة، معقول الغبية معرفتش تنفذ الخطة زي ما قولتلها؟
ـ أنا قلتلك بلاش روان، دي غبية وهتفضحنا.
= أيوه طالعة غبية زيك، يا خسارة محدش يعرف يطلع منكوا بمنفعة أبداً. خبّطي خبّطي يا بت معايا، لحسن كده البت ممكن تموت تحت إيد المفترية اللي جوا.
فضلوا يخبطوا على الباب جامد.
كوثر: سيف سيف افتحلي الباب ده….
خرج سيف من المطبخ وهو ماسك إيد ليلي، خاف يسيبها مع روان تمسكها تاني.
فتح الباب ليهم دخلوا على طول.
ـ إيه صوت الصريخ اللي طالع من الشقة ده يا بني؟
روان خرجت من المطبخ أول ما سمعت صوت خالتي:
= خالتي الحقيني يا خالتي!
كوثر اتخضت أول ما شافت شكلها:
ـ مين يا بت اللي عمل فيكي كده؟ انطقي!
