دينا ج٢
ـ طب وليه يا أمي نعمل في بعض كده؟ المفروض نكون إيد واحدة ونشيل بعض لو حد وقع… لازم أي اتنين يحسوا ببعض ويقدروا بعض. الجواز يا أمي مشاركة، ومش عيب إن الراجل يشيل مراته وقت تعبها أو يستعر من إنه يغسل المواعين أو يطبخ… بالعكس، ده كده يبقى بيتحلى بصفات وأخلاقيات الرسول. يبقى مين أنا عشان أعترض أو أتكسف؟ وليلى أشيلها في عيوني وقلبي… دي وصية الرسول صلى الله عليه وسلم.
♡…
اللي يحب بجد… بيشيل، وبيهون، وبيعوض… مش بيثقل على اللي بيحبه، والشريك الصح مش اللي يسيبك تتعبي لوحدك… الشريك الصح هو اللي يتعب علشانك.🤎🤎🦋
ال14
ـ الحق يا سيف، أمك بتموت!
ـ برضه نزلتي من غيرها؟ مش قولتلك خليها تنزل عشان تجهز الأكل؟
= يوووه وأنا مالي، ابنك هو اللي قالي انزلي جهزيه إنتي.
ـ ده إيه ده؟ اشمعنا بقى إن شاء الله؟ والشملولة مراته منزلتش هي ليه؟
= أصلهم خارجين.
ـ هو اللي قالك كده يا بت؟
= لا، بس كانوا بيجهزوا، أكيد يعني خارجين مش محتاجة ذكاء.
ـ امم… وبعدين مع بنت فاطمة؟ هو كل شوية خروجات؟ ما كان لسه مخرجها الأسبوع اللي فات! لااا، البت دي مش هتعمر معانا، أنا عارفة من الأول.
= ده حتى مفكرش ياخدنا معاه، وهو عارف إننا مش بنخرج خالص.
ـ قوة قلبه علينا! بنت فاطمة بقت عايزاه ليها لوحدها.
= طيب وهنعمل إيه؟ أنا نفسي أخرج، زهقت وأنا قاعدة بين أربع حيطان.
مردتش عليها كوثر، وكان باين عليها إنها بتخطط لحاجة في دماغها.
= سكتي ليه يا أمي؟ يعني معقول هتسيبي البت دي تخرج وتنبسط وإحنا نفضل قاعدين كده؟
ـ وإنتي تعرفي عن أمك كده برضه؟
= بجد؟ طيب ناوية تعملي إيه؟
ـ ركزي معايا في كل كلمة هقولها، مش عايزة غبائك يدمر الدنيا وبنت فاطمة تنتصر علينا.
ـــــــــــــــــــــــــــــــــــــــــــ♡…
ـ طب أعمل إيه في جمال أمك ده؟ أشيلك يعني في شوال وأمشي بيه؟
= ههههه… طب قولي إيه رأيك بقى؟
ـ قمر طبعًا، هو أنا ممكن أقول غير كده؟ عشان كده هيتغير حالًا.
= إيه! حرام عليك بقى يا سيف، أنا كده خلصت كل الفساتين اللي عندي.
ـ بسيطة، أطلب لك فستان تاني يجيلك لغاية عندك.
= بجد؟ ضحكتني! إنت عارف عايزنا نتأخر أكتر من كده؟
ـ أعمل إيه؟ إنتي اللي كل يوم بتحلوي أكتر.
