نفوس قاسية ج1

لزمت الصمت طوال الطريق وتابعته وهو يتبع خطاه إلى الأعلى لا تعلم ما عليها فعله أتلحق به وتتحدث إليه أم تنفذ ما أمرها به، لم تدر سهر لما صعدت لتُخبرها صفية عن وجوده بالأعلى فاستكملت خطاها وصعدت إليه، ووقفت تحدق بظهره المتصلب وتقدمت منه باضطراب ولمست كتفه لينتفض محمود أثر لمستها فالتفت إليها وحدق بها بغضب وأشاح بوجهه عنها مرة أخرى، زادتها نظراته ندمًا فاستسلمت لدموعها ليأتيها صوته يسألها بصوتٍ غاضب:
– كنتِ عند آدم بتعملي إيه يا سهر وكنتِ بتعيطي ليه وقت ما دخلنا عليكم، عايز أعرف وافهم بأي حق يديكي هدية غالية زي دي، وهو مين أصلًا علشان تقبلي حاجة منه وكنتِ هترديهاله إزاي يا آنسة يا محترمة ولا أنتِ مش عارفة أن هدية غالية كده لازم تترد ويدفع تمنها.

لم تدر سهر بما تجيب فخفصت عيناها أرضًا لتزيد بتصرفها من غضبه ليصرخ بوجهها قائلًا:
– ردي عليا يا سهر أيه بينك وبينه علشان يقدملك الهدية دا غير موضوع الشغل اللي ظهر وأنا نايم على وداني.

تراجعت عنه خطوة بفزع وهزت رأسها بالنفي وأجابته:
– مافيش أي حاجة بيني وبينه وموضوع الشغل هو قال أتكلم عنه علشان ينقذني من الموقف اللي اتحطيت فيه.

أثارت غيرته عليها بدفاع آدم عنها فقبض محمود على ساعدها بقوة سألها بحدة:
– يعني أيه ينقذك وهو عرف أزاي أننا طلعين، أتكلمي متخلنيش أطلع عليكِ جناني وغضبي وصدقيني هزعلك.

أجابته سهر على مضض:
– الأستاذ عصام اتصل وقال للأستاذ آدم على اللي حصل وهو طلب مني أني اسكت وهو اللي هيتصرف، والله يا محمود هو مدنيش حاجة أنا طلعت علشان علشان أرتب الجناح.

رفع محمود حاجبه ساخطًا وأردف ساخرًا:
– سمعيني تاني كدا طلعتي ليه علشان ترتبي الجناح، طيب قولي سبب مقنع شوية يا سهر ولا أنتِ شيفاني مغفل وهصدق أي كلام منك، دا غير أنك كنتِ معاه ومكنش في أي أدوات معاكِ يبقى هترتبي أزاي.

وقبض على كتفيها غارسًا أصابعه بقوة ألمتها أكثر وسألها:
– كنتِ معاه ليه يا سهر اتكلمي بدل ما أقت\لك.

بكت سهر وقالت:
– والله مافيش بيني وبينه حاجة أنا طلعت أبلغه أني هسيب الشغل ومش هشتغل معاه زي ما طلب، وعيطت لما عرفت أنهم بيتهموني بالسرقة وخوفت يظن أني بسيب الشغل علشان سرقت، بس هو مصدقش وقال اللي قاله أنا والله ما أخدت هدايا منه ولا عمري أقبل بحاجة مقدرش على تمنها.