غيبات تمر بالعشق ج2


واستطردت بحسرة قائلة : إذا كان أكتر راجل حبيته عيب فيا والتاني بيطالب باللي كان بيشوفه مني مع قصي قدام الناس.
جحظت نورا بعينيها قائلة : أنتِ لسه بتحبي قصي يا ريحانة ؟.اوعي تكوني كده فعلًا قصي ميستحقش حتى نظرتك له النهارده في الفرح.
ثم سألتها قائلة : ليه متعطيش زيدان فرصة ؟
حاولت أن تهرب من الإجابة ولكن ما باليد حيلة فهذه نورا لا يمر الأمر من بين يديها كمرور الكرام فتنهدت قائلة : النهارده كان هيكون أول فرصة له وكنت هعطيهاله بكل حب أنا نفسي استغربت من استسلامي.
كانت تسرد الأمر وهي تسترجع ما حدث مبتسمه إلى أن وصلت إلى النقطة التي أدمت قلبها فاستكملت بمرارة قائلة : بس في وسط ده كله كان عايز يقول حاجة ورجع في كلامه، ولما قلت ليه مالك وعلى فكرة أنا رجعت في لحظة وقلتله مش عايز أعرف.
وتعالت شهقاتها قائلة : بس هو رد ببساطة وأكد ليا انه معاهم.
جحظت نورا بعينيها غير مصدقة وقالت : أنتِ متأكده انه قالك انه معاهم ؟ بس ده مستحيل يا ريحانة هيستفاد ايه لما يكون معاهم .
ثم زاد اندهاشها قائلة : شذى كده ولا كده معدتش هتنفعه وسمر هو مش بيطيقها.
تنهدت ريحانة بتعب قائلة : هو واطي زيهم يا نورا وعلى فكرة أمير أوطى منه كمان خلي بالك منه.
وصارحتها قائلة : أنا وافقت أتجوز زيدان تحت ضغط منه لأنه هددني بيكي.
توترت نورا وارتبكت قائلة : ضغط عليكي بيا طب وأنا مالي وماله وبعدين خلي أمير على جمب لو سمحتى أه هو بتاع قمار.
واستكملت وهي تدافع عنه قائلة : بس مفيش حد بيفضل على حاله.
ابتسمت ريحانة بسخرية قائلة : للدرجة دي قدر يضحك عليكي بكلمتين في ساعة زمن واحدة لا وايه أخدتوا أرقام بعض ووصلك أنتِ ومامتك.
واستطردت بخبث قائلة : وكمان قالك ان زيدان غضبان عنده.
ضحكت نورا بتكبر قائلة : أه هو بصراحة يقدر يضحك على بلد بس مش على نورا الغريب يا ريحانة وأنتِ عارفة كده كويس .
ثم غمزتها قائلة : وهتتأكدي من كلامي قريب.
ابتسمت ريحانة بسخرية قائلة : يمكن كلامك يطلع صح في يوم من الأيام عن أمير..لكن عن زيدان ما أظنش.
واستطردت بشرود قائلة : ..زيدان ده في دماغه حاجات ومحدش يقدر يتوقعه بس هي ايه الله أعلم.
رفعت نورا كتفيها بلا مبالاة قائلة : وأنتِ مالك ومال اللي في دماغه طالما أخد عهد على نفسه انه مش هيأذيكي.
ثم استطردت بلا مبالاة قائلة : وبصراحة كده تلاقي حوار انه معاهم اضطر يقوله ليكي علشان يضايقك مش أكتر.
قطبت ريحانة جبينها قائلة : أنتِ مالك بدافعي عنه كده ليه ؟ زي ما يكون متفقة معاه أنتِ نسيتي أول مرة لمحتيه في المصنع عملتي ايه.
وذكرتها أكثر قائلة : نسيتي لما كنت بتقوليلي ارفضيه؟
ارتبكت نورا قائلة : فاكرة كل حاجة يا ريحانة كأنه امبارح..بس هو أثبت حسن نيته معاكي، وعرفك مين المقصود من ده كله.
واستطردت تحاول تليين قلبها قائلة : وجايز يا ريحانة نفسه يقولك على حاجات تانية.
جحظت ريحانة بعينيها قائلة : حاجات تانية ! نورا أنتِ تعرفي حاجة عنه ؟ لو تعرفي قوليلي على الأقل أخرج من الحيرة اللي أنا فيها.
واستطردت بحيرة قائلة : بس برضه ..ليه أكد ليا انه معاهم؟
عضت نورا على شفتيها بخوف قائلة : بصراحة كده أنا سمعت انه له شغل تبع المافيا هو وأمير، ويمكن كان عايز يصارحك بالحقيقة بحكم إنك مراته.
واستطردت وهي خائفة من ردة فعل ريحانة وقالت : بس أكيد خايف لتهربي منه.
انفجرت ريحانة من الضحك الهستيرى الغير معهود لها وقالت من بين ضحكاتها : هههههه أيوة بقا. هو ده اللي كان ناقص، يا خبتي السودة التقيلة من قصي المنيل لزيدان التعبان.
ثم علت ضحكاتها قائلة : المافيا ويخطفوني بقا ويهددوه بيا عاااااا.
ضربت نورا على جبهتها غير قادرة على كتم ضحكاتها هي الأخرى قائلة : أيوة بقا أموت في حرب العصابات وخطف الفتيات الحسناوات أتخطف معاكي والنبي.
واستطردت بلهفة وشغف قائلة : قوليلهم اني عشيقة أميرالأمراء، وربنا احنا بركة.
توقفت فجأة نوبة الهيستريا التي اجتاحت ريحانة وتحول لون جسدها إلى اللون الازرق خوفًا وهلعًا من حقيقة ما تقوله نورا التي توقفت هي الأخرى عن الضحك.
تتظاهر النساء بالقوة ولكن من يقترب منهن وخاصة وهو يستخدم دروب العشق يجعلهم مثل الأكياس البلاستيكية اللينة تفسد بالعشق بمجرد الضغط عليها بأول كلمة من عاشق ولكن هذا لا يعطي الحق لأي شخص أن يعبث بهن وبمشاعرهن ويقوم باستغلالهن، وهذا ما بدأت تستخدمه ريحانة ولكن مع الشخص الخطأ الذي أجازته لغيره الذي لا يستحق توقفت عنده وقالت لا يجوز لك أن تملكني أو تطرق باب قلبي تعاملت معه بحرص لا يستحقه بل هو يستحق الإفراط والمزايدة منها ولكن جاء لها بعد فرضها لقوانين العشق وما أن أطاحت بقوانين عشقها وعادت من جديد حتى صدمت من الوحش الضاري الذي تفوق موجته الموجات القديمة.