عازف بنيران قلبي ج1

ربتت والدتها على ظهرها وحثتها على الدخول
– طيب يالولة ادخلي غيري وصلي العصر هكون جهزت السفرة.. وكان كريم وصل كمان… أومأت بالموافقة وتحركت سريعا لغرفتها هروبا من والدتها كي لا تفحص عينيها عما تشعر به

بعد قليل إنتهت من طعامها واتجهت لغرفتها تجلس بالشرفة على طاولةدائرية وتضع بعد الأوراق الخاصة بشغلها… دلفت والدتها وقطبت جبينها متسائلة

– ليلى مش كنتي بتقولي هتنامي يابنتي.. إيه هتشتغلي كمان في البيت!!

وضعت خديها على كفيها وهي ترمق المخطوطات أمامها ثم تحدثت بصوتها الرقيق:

– مشروعي أتقبل ياست الكل.. وأنا عايزة أكون قده.. فبالتالي لازم أخلصه وأسلمه في ميعاده

مسحت على وجهها ورفعت بصرها لوالدتها
– لو ينفع ياست الكل فنجان قهوة تقيل.. يظبط مخوخ بنتك

مسدت على خصلاتها بحنو بالغ وأردفت
– ربنا يقويكي يابنتي.. وأحلى فنجان قهوة لأجمل مهندسة
رفعت يد والدتها وقبلتها وأجابتها بلمعة سعادة من عينيها:
– ربنا يخليكي ليا ياست الكل ودايما تدعيلي كدا.. ادعيلي ياأمي دايما

ضمت رأسها ومازالت تمسد على خصلاتها
– ربنا يريح قلبك ويسعدك ياليلى يابنت سمية يارب.. أمنت على دعاء والدتها التي تحركت للخارج

تلألأت عبراتها بعينيها وهي تردف لنفسها
– يارب ياماما يريح قلبي اللي مش مريحني دا… ضغطت على جفنيها بقوة
– وبعدهالك ياراكان بعد الشهور دي كلها.. وبعد ماأتقلمت على نسيانك ترجع تهد كياني ليه وتشغل عقلي ليه؟

اتجهت بأنظارها للخارج وتذكرت ذاك اليوم
فلاش باك
وصلت قسم الشرطة بصحبة آسر أبن عمها ودموعها تتساقط عبر وجنتيها كالشلال
وقفت أمام الضابط المسؤل في ذاك الوقت
– لو سمحت عايزة أعرف بابا فين

نهض الضابط مضيقًا عيناه فتسائل:
– إنتِ بتسألي على مين… قاطعه آسر عندما أردف:
– الشرطة من ساعتين قبضوا على واحد اسمه عاصم المحجوب بتهمة الأختلاس وعرفنا أنه هنا

أومأ الضابط برأسه ثم تحدث:
– آه دا شكله مزقوق عليه من ناس واصلة.. ياريت تجيبوله محامي كويس.. أصله دخل على وكيل النيابة على طول

قطب آسر حاجبيه وتسائل
– ممكن توضح أكتر… جلس الضابط وهو ينادي على المسؤل عن مكتبه (العسكري)

– ياعسكري.. دلف أحدهم فأشار الضابط على ليلى وآسر
– وديهم مكتب وكيل النيابة يابني.. في قضية الراجل المغتلس