عرفته واحببته وزوجته في يوم واحد ج2
بقلم راندا عبد الحميد
وكانت روني بترجع لورا بإرتباك وهي عماله تشاور وتتكلم بتلعثم لغاية لما داست علي ديل الفستان اللي بيجر وراها.. فوقعت…
فانتفض وليد مع صرختها وهي بتقع….وراح شالها ونيمها علي السرير… ومسك رجلها وفك الصندل بالراحة وهي بتتألم وبتطلب منه يسيبها… وهو بص ناحيتها لحظة…. وفاجأها وعمل حركة في رجلها أتعلمها من العلاج الطبيعي خلاها صرخت بشدة… وبعدها هدي الألم وهي كمان… فنامت علي السرير وغمضت عنيه عشان ترتاح….
فابتسم وليد وقعد جمبها وقال بمشاغبة : لما أنتوا مش قد الكعب بتلبسوه ليه؟…
روني كانت مدايقة لأن كده وليد حس حتي لبس الكعب العالي زي البنات مش بتعرف تلبسه… وضاع تعبها في التدريبات عشان تعرف تمشى بيه قدامه كويس ويحس أنها زي البنات اللي بيشوفها… وأنه صعب عليها تبقى زي أى بنت وتلبس كعب عالي… ولما قال كده أدايقت أكتر وفتحت عنيها وقالت بحدة كأنها بتبرأ نفسها : مش أنت اللي جايبة….
فقال وليد بلامبالاة : وأنا كنت أعرف من اين أنك مش زى البنات…
فدمعت عيون روني… وحاولت أنها تتحكم في دموعها وبعدت عنيها عنه عشان متظهرش أن الكلمة جرحتها … وقعدت وقلعت الصندل الثاني من رجلها ورمته علي الأرض بغضب وقالت بصوت مخنوق وهي بترجع تنام وتدفن وشها في المخدة : أنا فعلًا مش زي البنات…. روح شوف واحدة غيري تلبسه…
فابتسم وليد وشدها.. وقفها معاه غصب عنها وشغل الموسيقي من تاني وقال : هديكي فرصة تانية… أرقصي معايا يلا يمكن أغير رأيي ويطلع في أمل…
فاضايقت روني من استفزازه ليها… وبعدته عنها وضربت علي صدره وهتفت : وأنا مش عايزة ارقص معاك… ومش عايزة أبقي زي البنات… روح دور علي واحدة غيري تناسب مواصفاتك وتقدر تنفذ طلباتك وحقوقك وكل اللي عايزه واللي بتحكي عنه.. وما تتعبش نفسك معايا بعد كده…
ولفت عشان تخرج من الأوضة فشد وليد الشال من على كتفها فشهقت روني ولفت درعاها علي كتفها…
فابتسم وليد بانتصار وقال وعنيه بتلمع : دلوقت بس بقا قدامي دليل أنك زي باقي البنات…
ورما الشال على الأرض…. فنزلت روني بسرعة عشان تجيبه وتخبي كتفها بيه…. فشدها وليد قبل ما تلمسه… وبدأ يرقص معاها… فحاولت روني تبعد عنه وهي مكسوفة من شكلها كده بس هو فضل متمسك بيها وقال بهمس : سيبيه يا روني… ده وبس…
فاتكسفت روني وأرتبكت ووشها حمر وبعدت عنيها عن عنيه اللي بدأت تتأملها بحرية… وكل شوية وليد يعلق تعليق يكسفها… فتيجي تبعد عنه فيشدها ويرفض بعدها…. وفي الأخر دفنت وشها في كتفه من الإحراج لغاية لما خلصوا رقص….
