عرفته واحببته وزوجته في يوم واحد ج2

اللي روني ما تعرفهوش أن وليد غير الساعة عشان تطمن وتفضل براحتها باللبس وهو يجي فجأة ويشوفها وبكده يكون قدر شوية من الخجل بينهم…

فقالت روني بحيرة وإرتباك: والله أنا أول مرة أتجنن والبس لبس بالشكل ده من غير هدوم فوقيه… بس أصل أنا… أصل لقيت شكله حلو وكان نفسي البسه وأشوف نفسي بالمرايا مرة بيه… بس والله يا وليد صدقني دى أول مرة البس وأشوف نفسي في المرايا بحاجة زي كده… وحتي كنت كل شوية ببص للساعة عشان لما تيجى تلاقينى بلبس محترم…. صدقني والله شوف حتى بنفسك لسه فاضل ساعتين على ميعاد رجوعك..
فقال وليد بغضب : أنا مليش دعوة بالساعة… افرضي بايظة… افرضي مقدمة… ولا ماخرة… المهم اللي أنتي لبساه… عايزة الناس تقول عليا إيه؟ مرآتى بتلبس كده في بيتى…
فارتبكت روني أكتر وعنيها اتملت دموع ومش قادرة تبصله وحسيت أنها نزلت من نظره فعلا… وكان نفسها تولع في كل الهدوم…

عرفته وأحببته وتزوجته في يوم واحد..

بقلم : راندا عبد الحميد

((الحلقة السابعة))

لما قرأت روني الرسالة حست أن وليد اللي أتعلقت بيه وحبته رجعلها… رجع يفكرها بهمساته وحبه… وكلماته الرقيقة… ويسقيها من حنانه… مش وليد المتهور اللي صدمها وخوفها… وبقت مش فاهمة… إيه اللي غيره كده ولا عمل ليه كده….
وبدأت تهدأ شوية وتطمن أنه مش هيرجع تاني يكرر اللي حصل… ومع تكرارها لكلماته وأبياته رجعلها الأمان من بين حروفه…. فارتاحت أنه عايز يعتذر وحس أنه غلط ومش عايزها تسيبه وتمشى… وده أكد كلامه بأنها فهمت كلامه غلط… بس تصرفاته إزاي تفهما غلط؟… هي كمان عايزة تفهم هو عمل ليه كده… يعني بيعاقبها؟ طيب علي أيه؟ يعني معقول لبسها لحاجة زي دي في مكان مقفول عليها وجوه بيتها يستحق عقاب بالشكل ده…. ولا ده مش عقاب وهي اللي مش فاهمة ردود أفعاله وقناعاته ومبادئه…. يعني لما قال أنه عايزها تلبس كده كل يوم كان بيختبرها…. وبدليل عقابه بعدها… وهو عمل كده عشان ما تكررش ده تاني… وفضلت تفكر لغاية لما نامت من غير ما توصل لحاجة….
،،،،،،،،،،،
في الفجر صحيت روني على صوت وليد قريب منها… وأول ما فتحت عنيها بعد من جمبها… ووقف من علي السرير… وقال وهو بيخرج من الأوضة : يلا عشان ننزل نصلي الفجر…
وسابها وخرج من الأوضة…
أما روني كانت لسه بلبس الخروج اللي عايزة تسافر بيه… وأخدت بالها أنه ما لمسهاش زى ما بيصحيها كل يوم… بالرغم من قربه منها وهو بيصحيها… وهيا ارتاحت لده… ولما خرج… وقفت وغيرت هدومها للبس يناسب البيت واتوضت ووقفت تصلى الفجر…