الثلاثة يحبونها ج١

قال يحيي بعتاب:
وموافقتى يا راوية ملهاش أي إعتبار عندك ..ولا رأيي تحصيل حاصل بالنسبة لك؟

إلتمعت عينا راوية بالدموع وهي تقول:
تفتكر إن مكانتك عندى قليلة أوى كدة عشان أستخف برأيك؟..كل الموضوع إن أنا حاسة بيك وعارفة اللى فى قلبك يايحيي.

أطرق يحيي برأسه قائلا بحزن:
إنتى متعرفيش حاجة.

مدت يدها ترفع ذقنه لتواجهها عيناه وتقول هي بتقرير:
أنا عارفة إنك بتحبها.

إتسعت عينا يحيي فى صدمة لتستطرد قائلة:
بتحبها من زمان..وأنا كنت عارفة..ولغاية النهاردة مقدرتش تحب غيرها.. بسمعك بتنادى إسمها فى أحلامك..لإنك مش قادر تكون معاها فى الحقيقة..إتجوزت هي أخوك وإتجوزت إنت أختها..بس القدر أهو بيديلكم فرصة تانية وكأن قصتكم مش مكتوب لها تنتهى بالفراق..وكأن مصيركم إنكم تكونوا لبعض مهما حاولوا يفرقوكم.

إنتفض يحيي واقفا وهو يقول:
إنتى بتقولى إيه بس..قصة إيه ومصير مين؟إنتى جرى لمخك حاجة؟

إبتسمت راوية بحزن:
الموت لما بيكون قريب منك بيخليك تشوف كل حاجة صح وبتحاول تصحح حاجات كتير غلط فى حياتك وحياة اللى حواليك واللى يهموك..وانا عمرى ماكنت صح أد النهاردة..متحاولش تنكر حبك..اللى بيبان جوة عيونك ..فى قاعهم اللى حاولت تخبى حبك فيه..وبيظهر فيهم بس لما بتسمع إسمها ..وعشان كدة محيته من حياتنا كلنا..عشان بيفكرك بيها ..بيفكرك بحبك الأول والأخير.

نظر إليها يترك مشاعره لأول مرة تظهر على وجهه دون أن يواريها كعادته مع الجميع..ليجلس مجددا وهو يقول بألم:
هي السبب..هي اللى إتخلت عنى ياراوية وخانتنى..و مع مين..مع أخويا..محت إسمها من قلبى قبل ماأمحيها من حياتنا كلها..ياريت تقفلى على الموضوع ده لأنه بيوجع أوى..الموضوع ده منتهى بالنسبة لى..وبعدين مش انتى مراتى برده.. إزاي بس تطلبى منى أعمل حاجة زي دى؟

قالت راوية بحزن:
لإنى هموت قريب اوى بطلبها منك ..لإنى مش هكون موجودة فى حياتك وحياة إبننا بطلبها منك ..بطلبها وقلبى بينزف بس لازم أكون واقعية وأطلبها منك.. لإنى لو مطلبتهاش.. وإنت لو موعدتنيش ..مش هتعملها يايحيي.

نهض يحيي يقول بعصبية:
ايوة مش هعملها..لإنى مستحيل هقدر أسامحها..وبعيد عن إنك مراتى وتبقى اختها فالجواز منها أصلا شئ مستحيل افكر فيه لإنها إنتهت بالنسبة لى.. ..فجوازى منها مستحيل هيحصل وده قرارى النهائى ياراوية.