الثلاثة يحبونها ج١
بقلم الكاتبة شاهندة
إبتلعت ريقها بصعوبة وهي تشعر بإقترابه منها قائلة:
أنا..أنا بخير.
مد يده يداعب وجنة صغيره الذى إبتسم له مرحبا قائلا:
إنت كمان وحشتنى.
لينظر إلى عينيها الدخانيتين مستطردا:
وحشتنى أوى.
إبتلعت رحمة ريقها مجددا فى صعوبة..تشعر بكلماته موجهة إليها ..تذيب قلبها وتزيد حرارة جسدها..تنسيها ماض شقي..تنسيها عذابها بأكمله..تود الغفران ولكن كل الإنذارت الحمراء تقيدها..تجبرها ان لا تستسلم مجددا لعشق عند أول عقبة فى طريقه سيتصدع وينهار..لتشيح بوجهها عنه..تبتعد عن سحر عيناه المسلطتان على عينيها..وقد لاحظت غفوة الصغير على صدرها..لتحمله إلى سريره تمدده عليه وهي تميل لتقبله على رأسه بحنو يتابعها يحيي..إعتدلت وكادت ان تغادر الحجرة بهدوء متجاهلة وجود يحيي خلفها ليوقفها صوته وهو يقول بهدوء:
رحمة..إحنا لازم نتكلم.
إلتفتت تواجهه.. تنظر مباشرة إلى عينيه وقد احتلت عينيها البرودة قائلة:
هنتكلم فى إيه ؟
بادلها برودها على الفور ببرود كالصقيع إحتل ملامحه ردا على برودة قسماتها..وهو يقول:
فى حاجات كتير..أولهم وصية المرحومة راوية.
إتسعت عيناها بصدمة قائلة:
أظن مش وقت الكلام ده ولا هنا المكان المناسب كمان..ولا إيه؟..أنا أختى لسة ميتة من أيام على فكرة..على الأقل سيبنى أحزن عليها شوية..ومثل إنت شوية إنها كانت مراتك وزعلان عليها.
أحس بالغليان ليحمر وجهه..وتنتفض عروقه..وتشتعل عيناه بشرارات الغضب ..لتدرك رحمة أنها تعدت كل الحدود..تراجعت لخطوة عندما اقترب منها خطوتين يقول بغضب:
مش انا اللى أمثل يارحمة..أنا فعلا حزين على راوية لإنها قبل ما تكون مراتى كانت بنت عمى الطيبة..الروح الوحيدة النقية فى عيلة الشناوي كلهم..كانت بتدى من غير ماتنتظر أي حاجة فى المقابل..غيرها خد ومداش غير الغدر.
نظرت إلى عينيه قائلة بمرارة نطقت بها أحرفها وتلك الدموع التى ترقرقت بعينيها:
غيرها ده اللى هو أنا مش كدة؟
أوجعته دموعها ولكنه أظهر البرود وهو يتأملها بنظرة..(نعم أنتى من أقصدها بكلامى)..لتستطرد بصوت يقطر ألما:
ولما أنت عارف إن أنا وحشة أوى كدة ..يبقى لازمته إيه الكلام..إنسى وصيتها خالص ولا كأنها كانت موجودة من الأساس؟
مال عليها تلفحها أنفاسه الغاضبة وهو يقول:
مش أنا اللى يوعد بحاجة وميوفيش بيها..وصية راوية هنفذها..أكيد مش حبا فيكى..لإن الحب كان غلطة حياتى..الحب كلمة مبقاش ممكن أعترف بيها..مسحتها من قاموسى ومن زمان ..ومش ناوى أعيد غلطاتى من جديد..بس كلمتى ووعدى لازم أحافظ عليهم حتى لو شايف إنك متستاهليش إسمى ..بس راوية شافت إنك هتكونى أم كويسة لإبنى..وبما إنى مش ناوى أرتبط تانى بعد راوية..يبقى عشان خاطر هاشم مستعد أتنازل وأتجوزك.
