عرفته واحببته وزوجته في يوم واحد ج3
بقلم راندا عبد الحميد
مش عارف احيانًا بحس أن فاضل للجنون شعره… حسيت الدنيا أتهدت لما شفت محمود علوي وهو في الشالية وواقف وأنتي مسنوده على الحيطة وهو محاوطك باديه… أفتكرت تهديده وانك هتكوني ليه… أفتكرت انه فعلاً نفذ وعده وتهديده… وانك بقيتي ليه… مقدرتش اتحمل الصدمة… بالرغم من أنه ما لمسكيش يومها… إلا أنى حسيت أن قلبى في اللحظة دى هيخرج من مكانه… وما أخدتش بالى من خوفك… وما شفتش إلا راسك اللي بتتهز بالموافقة علي كلامه…
ولما سمعته بيقول أنه بيحبك وأنتي معترضتيش… وكمان هيبقى الراجل الوحيد في حياتك حسيت قلبي هيقف… عارفة يا روني أحساسي وقتها إيه؟… كنت حاسس أنى سراب… حسيت أنك مسحتينى من الوجود وماليش أثر.. حسيت أن وجودى وهم… حسيت أن سنين حبي وشوقي ليكي وهم… عمرى ما اتكسرت قد اللحظه دي… حسيت أنى متهأن… ومن مين؟… منك يا أغلى الناس… وجعتينى قوى يا روني… وما حستش بنفسي… حسيت أنه مش أنا البيعمل فيكى كده… كان قلبي موجوع وبيصرخ… كان حب السنين بيبكي… كان حلم أتهد بيتنفض… كل ما أحاول أسيطر على غضبى وتكوينى دموعك وصوتك… أحس أنك بتدافعى عنه ضدي… أشوف راسك وهي بتتهز بالموافقة علي أتفاقكم… كنت عايزك تحسي بالمرارة اللي جوايا… بس برجع أحس أنك بتكدبى عليا…
قلبى قال لحظة أصدقك بس رجع مات… لما رجعلى صوته وأنه الراجل الوحيد في حياتك… كسرنى قوى… كنت عارف أنى بغير عليكى حتي من النظرة… مش الكلمة ولا الفعل… بغير عليكي من الهوا… بغير من عليكي من كل الناس بجنون… كتير بفكر أحبسك عن عيون الناس… مش عايز يعرفوا بوجودك… حاسس أنك كنز غالى والكل هيطمع فيه… وأنتي فعلا نادرة وملكيش زيي… وعنيا ما شافتش غيرك من كل بنات الكون…
بس أعمل إيه ياروني؟… حبك واحتياجى ليكى زمان اتبدلوا دلوقت… وبأتمنى أنك كنتي رفضتى تيجى معايا… ورفضتى تكونى ليا… بالرغم من العذاب اللي كنت هتعذبه… إلا إن عزايا أنك هتبقى بعيدة عن اى ألم سببته ليكى… سامحينى يا اغلى ناسى وكل حبايبي.. سامحينى يا روني…
أنا عارف أنى اذيتك قوي… وأنتي ما تستحقيش كده…
عارف أنى لا قدرت أحميكى من الحواليا… ولا حتى من نفسى…
عارف أنى ما استحقش اى شئ منك إلا الكره وإلاحتقار…
غصب عنى يا حبيبتى الأولى والأخيرة… بس بوعدك أنى أفضل طول عمرى جنبك أكفر عن جنوني فيكى… وهيفضل عشقى ليكى ساكن جوايا… وأنا وما أملك ليك رهن إشارتك…وهافضل أعمل كل حاجة عشان راحتك وسعادتك… وعمرى ما هعمل إلا اللي يرضيكي ويسعدك…
وهفضل أصلى وادعى ربنا أنه يجى اليوم الاقدر أمسح وجعك… وارجع البسمة البريئة بتاعةك… وأصلح اللي كسرته بغبائي… واداوى جراح قلبك منى يا حبيبت قلبى…
