عرفته واحببته وزوجته في يوم واحد ج3
بقلم راندا عبد الحميد
ومع مرور الأيام بدأ أولاد روني في التحرك والمشاغبة… ولاحظ وليد حالتها بتتحسن وهما حواليها… واحيانًا بتتفاعل معاهم ومع لعبهم ومشاغبتهم… وده من خلال مراقبته ليها من خلال (الاب توب) وكاميرات المراقبة عن بعد….
فحاول وليد من خلال الأولاد أنه يجذبها للخروج معاه عشان تشوف الناسوتنغمس من جديد في الحياة… وكان بينتهز فرصة لما حد في الأولاد يتعب… ويطلب منها مشاركتهم في الخروج عشان يكشفوا عليه…. بس هي كانت بترفض تخرج معاه….
وهو كمان كان بيرفض يخرج مع البيبى سيتر عشان يكشفوا للأولاد…. فإما بياخد هو الولد يكشفله أوبيطلب الدكتور يجى في البيت… وكان بيهتم بمواعيد التطعيمات والمراجعة الدورية بتاعتهم بنفسه…
روني كانت بتخاف تخرج معاه ليغدر بيها ويسيبها في أي مكان ويمشي…
وهيا تتحرم من الأولاد… فكانت بترفض تروح معاه… ورفضت أنها تكمل مع العلاج النفسى كمان…. لأنها خافت يكون هيديها حاجة تموتها… ووليد وافق ومحبش يضغط عليها في دي كمان… وبدأ يتابع حالتها مع الدكتور من غير هي ما تعرف… ومكنتش بتاخد أي علاجات؟؟؟ إلا لو حالتها تطورت للأسوء… فبيضطر وليد يديها ومعاه الممرضة منوم أو مهدئ… وهو كان بيتابعها من على الاب من خلال كاميرات المراقبة اللي كان عاملها في البيت…
حتى أوضة نومها كان عامل فيها كاميرة مراقبة سرية بدون علمها…
وكان بيتابعها هيا والأولاد كل ما أتيحت الظروف ليه…
لدرجة لما بينام كان بيفضل مشغل “الاب” ومعلى الصوت ومخليه جنبه… عشان لو روني حلمت حلم وحش أو حصل ليها إنهيار في أي لحظة كان بيسمع صوت صريخها ويصحي…
احيانًا وليد كان بيروح يشوف روني وهيا نايمة من ورا الزجاج بما إن البلكونة مشتركة بين أوضته وأوضتها…
وكتير شاف لحظات أنهيار واكتئاب معاها من غير ما هي تحس بيه… وكان بيصعب عليه خوفها وأنها كل شوية بتتلفت حواليها من خوفها أنه يظهر ليها من أي مكان…
روني فقدت الثقة في وليد نهائيًا… بعد ما أمنت ليه وفرحت بحياتها معاه… وهو غدر بيها… فإزاي تقدر تامنله من تانى… وتعيش معاه كأن ما فيش حاجة حصلت… وترجع تثق فيه وتحبه من جديد… زي ما بيطلب منها دايمًا…
،،،،،،،،،،،
فى مرة من المرات بعد ما وليد رجع من التمرين سمع صوت روني فى
الجنينة… فاْستغرب لاْنه مانع الموبيلات من البيت من خوفه لا تتصل بحد
ممكن يبعدها عنه… وبرضوا هي مش بتتكلم مع الناس الشغالين اللي في البيت لأنها ما بتعرفش لغات… يبقي مين معاها دلوقت وبتكلمه بالعربي كمان؟…
…………………..
